2018: Serie Familia Gran Ducal

Semeya: Collectorcoins

Motivu conmemorativu: 175 Cabudañu del gran duque de Luxemburgu Guillermu I

Tirada: 500.000           Fecha d’emisión: Setiembre

     Willem Frederik van Oranje-Nassau (1772 - 1843), príncipe d’Orange y duque de Nassau-Dietz y de Fulda a partir de 1806, stadhouder hereditariu de les Provincies Xuníes de los Países Baxos como Guillermu VI ente 1813 y 1815, rei de los Países Baxos y gran duque de Luxemburgu ente 1815 y 1840 como Guillermu I.

     Vida bien abegosa la d’esti Guillermu; so pá Guilllermu V foi realmente l’últimu stadhouder (estatúder o llugarteniente) hereditariu de les Provincies Xuníes de los Países Baxos, un cargu daqué raru, teniendo en cuenta que los Países Baxos d’aquella catalogábense como República Xunida y que p’anriba, yera hereditariu… Bono, el casu ye qu’a esta familia toco-yos unos añinos bien engedeyaos: tovieron qu’esiliase n’Inglaterra tres la invasión del país poles fuercies revolucionaries franceses, cosa que nun-y prestó un res al xoven Guillermu, polo qu’intentó recuperar la so tierrina ensin ésitu; tornó al país en 1813 ya muertu so pá y tres la retirada francesa col títulu de príncipe soberanu en tol territoriu neerlandés y belga; en 1815 camudó a rei al enterase de que Napoleón Bonaparte tornare a los campos de batalla tres la so fuxida de la islla d’Alba (el so fiu Guillermu II lluchó en Waterloo); ente 1830 y 1839 sufrió la revuelta ya independencia de Bélxica lo qu’orixinó el cambiu de nome del país como Reinu de los Países Baxos (lo de Xuníu, alón) y coles provincies d’anguañu. En 1840 abdicó nel so fiu pa casase por segunda vez y colar pa Berlín, onde morriere en 1843.

     Nel intre aparecen les efixes de los grandes duques Henri I, a manzorga y Guillermu I. Ente dambos dos el nome del homenaxeáu coles feches de nacencia y muerte GUILLAUME I^er 1772-1843. Pel exergu, l’añu d’acuñación allendáu pola marca del llión luxemburgués y la de la ceca d’Utrech (países Baxos) col nome del país emisor LUXEMBOURG.

     Nel aniellu esterior les doce estrelles de la Xunión europea.

     Fontes: Wikipedia: Guillermo I (castellán) 

                                      Estatúder (castellán)