 |
| Semeya: Coin collection market |
Motivu conmemorativu: 50 Aniversariu de los fechos de Mayu
de 1968 en Bélxica
Volume d’emisión:
260.000 Fecha
d’emisión: 18 xunu
A pesar de nun ser tan conocíu como’l francés, el Mayu del 68 belga foi
l’únicu capaz d’esbarrumbar un gobiernu. Tamién ye verdá que los enguedeyos
estudiantiles belgues entamaron en 1960 y nun tovieron que ver un res con temes
revolucionarios o lluches internacionalistes, sinon más bien con una tema
netamente llocal como yera la lligüística. Los eternos puxos ente les dos
rexones belgues de Flandes (de fala neerlandesa) y Valonia (de fala francesa)
algamaron un puntu de tensión nel tarrén flamencu al ver peligrar la so fala en
favor del francés y col beneplácitu del Gobiernu belga. Les grandes protestes
del Movimientu Flamencu fexo que’l gobiernu centralista de Bélxica marcare les
llendes definitives ente les dos rexones en griesca y encaminare’l país haza un
estáu federal.
Tres una relativa calma, torna la griesca a la Universidá católica de
Leuven (Lovaina). La Ilesia, col sofitu del Gobiernu del primer ministru
Jacques Lefèvre, non solo refuga desaniciar los departamentos francófonos de la
Universidá sinon que pretende amplialos de magar que tea en Flandes. Frente a
les protestes de los flamencos, los obispos llanzaron una pastoral escontra’l treslláu
de los estudios francófonos a Valonia. Los estudiantes flamencos, al glayíu de Leuven-Vlaams
(Lovaina-Flamenca) sofitaron la brenga. Tres delles protestes a lo llongo los
años, foi nel famosu 1968 cuando la cosa foi a mayores y les brengues
estudiantiles pasaron a ser asuntu nacional: a les reclamaciones lligüístiques
entamaron, agora sí, a incluyise proclames revolucionaries, antiburgueses y
anticlericales. En febrero d’esi añu, cayo’l gobiernu belga cristianu-lliberal
de Paul Vanden Boeynants nel que tamién españó la brenga pola tema llinguística
ente miembros del mesmu partíu pero distinta identidá rexonal. El nuevu
Gobiernu, de tipu centrista, desanició tolos estudios francófonos de Lovaina y
treslladolos a otra universidá, Louvain-la-Neuve (Lovaina la Nueva). Lo meyor
de too ye que la Ilesia nun puso un euru pa iguar l’enguedeyu por ella fechu.
Total, que cuando Francia españó en mayu, Bélxica ya taba calmo, poro,
nun pue falase d’un Mayu belga realmente.
No que refier a l’acuñación de la moneda, detacar qu’a partir d’esti añu
la ceca encargada d’acuñar moneda belga va sel la d’Utrech (países Baxos) pol
pieslle de la de bruselles; ensin embargu, la marca’l direutor qu’aparez ye la
del de la ceca de Bruselles.
Nel intre la moneda aparecen
dos estudiantes con una bandera y unos panfletos delantre d’un auditoriu. Riba,
la fecha conmemorativa en neerlandés y francés “mei-mai-1968”. A manzorga, la
marca del direutor de la ceca de Bruseles y la de la ceca d’Utrech (Países
Baxos), l’añu d’acuñación 2018, la identificación del país emisor BE y la marca
del diseñador Luc Luycx, LL.
Nel aniellu
esterior, les doce estrelles de la Xunión europea.
Fontes: Coin Collection Market (castellán)
El Diario Montañés: “Bélgica recuerda que mayo del 68 empezó meses antes en su país” (28 d’abril del 2008). (Castellán)
Silkens, Frank “Leuven-Vlaams: El movimiento del ’68 en Bélgica”. (Artículu espublizáu na revista Equis, númberu 5, Ciudá de
Méxicu, setiembre de 1998, pax. 81-83). (Castellán)
No hay comentarios:
Publicar un comentario