Axentes peligrosos pa les monedes

      Parecen robustes, pero nun lo son. Les monedes tamién sufren el pasu del tiempu y l’aición del mediu que les arrodia. De man, el so principal enemigu ye la so composición: tan feches de metal, polo que tan espuestes al ferruñu y la corrosión. Conocer dellos de los riesgos pue ayudar na conservación, non solo d’una moneda y evitar asina intervenciones posteriores agresives y poco eficaces, sinon d’una colleición prestosa que podría devaluase (económica y sentimentalmente) a causa del desaniciu de dalguna de les pieces que la formen. Esti ye un llistáu de los axentes más peligrosos pa les nueses monedes.

L’aire

      Ye’l principal enemigu de les monedes, ya que ta en toles partes y ye per difícil aislales d’elli. Lo realmente peligroso nel aire son los contaminantes que lleva, como’l sulfuru d’hidróxenu (H₂S), causante principal del ferruñu nos metales, esto ye, que-yos sal una capa que los cubre, tapando asina el so brillu orixinal. Esta película nómase en xoyería y numismática pátina. La pátina muéstrase en delles tonalidaes de collores según el metal a ferruñar; por exemplu, na plata aparecen collores primeramente doraos y llueu azul-averdosaos que-y dan a la moneda un aspeutu agradable, ya inclusu hai colleicionistes qu’aprecien el resultáu; pero si’l procesu de ferruñu sigue, entós tendremos una pátina de collor prietu y d’una capa gruesa difícil de llimpiar llueu. Pa prevenir esti mal lo único que podemos facer ye aislar, na medía lo posible, la moneda del aire, lo cual ye bien de difícil sabiendo de la condición del aire como ente gaseosu. Poro, a mayor estanqueidá, meyor conservación.

Prestosa pátina qu'hai que protexer pa que nun vaiga a más

 

La humedá

      La humedá produz tamién ferruñu na moneda, lo que nesti mundín nómase cáncer de la moneda. La enfermedá preséntase en forma de manches polvorientes verdes (en cualisquier de les sos tonalidaes) y pue llegar a reducir a polvu la moneda. El metal de la pieza tamién pue ser un agravante más n’aceleración del ferruñu, como’l casu del cobre, metal más susceptible de sufrir esti mal.

Síntomes del ferruñu: zones averdosaes y d’aspeutu polvorientu onde’l metal ta desaniciáu

      Pa evitalo lo meyor ye conservar les monedes nun ambiente con temperatura media ideal de 20º C y una humedá relativa inferior al 35 %. Esto en munchos casos nun ye posible (n’Asturies la humedá relativa pasa del 85 %) si nun ye invirtiendo, como mínimu, nun bon deshumidificador calentador que tea les 24 hores furrulando nuna sala bien aislada; o tamién mercando unes bolsines de xel de sílice (silica gel), más barates que’l deshumidificador y que se puen colocar dientro les caxines o álbunes onde tengamos recoyíes les monedes. El xel ye un material cristalín que fai de regulaor de la humedá: chupa l’escesu d’humedá y devuélvela en casu de sequedá. Pue mercase nes drogueríes y suel venir dientro d’unes bolsines traspirables. Hai dos tipos de xel: de color blancu (una vez hincháu pola humedá hai que renovalu) y l’azul (que se torna rosa cuandu tá saturáu d’humedá) que ye reutilizable, ya que pue secase calentándolu a 150º C durante 3 hores (y si non, enriba’l radiador unes horuques más).

Les güelgues

      Por mui llímpies que tean les manes, realmente son un ñeru de grasa y ácidos. Poner un deu enriba una moneda recién acuñada pue convertise, nunos meses, nuna marca escura y fea per difícil llueu de quitar. Lo meyor pa evitalo ye usar guantes d’algodón o látex y garrar la moneda pel cantu (inclusu si nun tenemos guantes y nun mos queda otra, garrala siempre pel cantu).

La saliva (Monoxiu de Carbonu)

      Una moneda al aire ta espuesta tamién a la saliva d’un falante o la d’un espirríu; ello fai que na superficie la pieza salgan unes motines prietes. Estes manches son de carbonu (carbon spots) y queden incrustaes nel metal, faciendo imposible la so eliminación ensin causar dañu a la moneda. Les de cobre son les más sensibles a esti riesgu.

Manches prietes pa tola vida

 

El fumu

      El fumu afeuta a dellos metates, ente ellos la plata. Fumar y echar el fumu sobre una moneda de plata fai que’n pocu tiempu –y salga a la pieza una pátina na superficie.

Plásticos (pal almacenaxe)

      Hai que tener cuidao coles fundes de plásticu (coin flips) que venden pal almacenaxe de monedes; delles son de PVC, poro, contienen cloro, el cual emite gases de mou espontáneo capaces de ferruñar el metal hasta’l so desaniciu. Nes monedes aparecen unes manches averdosaes, como cola humedá. Les tires de plásticu, por exemplu, nes que se venden colleiciones de monedes del mundiu, nun son un res segures, valen pa tresportales pero non p’almacenales a llargu plazu. Lo meyor son les cápsules ríxides que nun son de vinilo ya inclusu son resistentes a güelpes.

Manches averdosaes pol PVC

Laques

      Delles vegaes recúbrese la moneda con una fina capa de laca como medida de proteición escontra’l ferruñu. Nun ye una téunica recomendable, ya qu’hai que filar fino pa nun pasase na concentración y provocar l’aparición de grietes col consiguiente perxuiciu pa la moneda.

      Básicamente estos son los axentes más comunes colos que mos podemos atopar, poro, tomar unes medíes básiques pal cuidáu de la nuesa ayalga ye vital pa caltener el so valor.

 

Fonte: Muñiz, Benjamín; Conservación y limpieza de monedas. Versión payares 2006. (Castellán).