Segarra de Gaià

     El conceyu tarraconense de Santa Coloma de Queralt camudó’l so nome, nel añu 1937, pol de Segarra de Gaià. Esta operación nun foi un res rara ente los conceyos catalanes durante la Guerra Civil española; la idega primera yera facer desaparecer de los nomes de los pueblos toa indicación de tipu relixosu y en Catalunya más de cien conceyos sofitaron el plan. Finada la guerra en 1939, tornaron a los sos nomes orixinales.

     N’esti conceyu acuñáronse namás que pieces con valor d’1 peseta, de dos tipos y dellos materiales. La necesidá de valores más pequeños (céntimos) pal emplegu diariu supliose cola emisión de billetes.

     Según espubliza Antoni Turró i Martínez nel so trabayu "Les emissions monetàries oficial de la Guerra Civil (1936-1939) I: Andorra, Illes Balears i Catalunya (Generalitat i Locals)", l’11 de febrero de 1937 el conceyu aprueba facer una emisión de monedes de metal por valor d’1 peseta por un importe de 5000 pesetes. Foron feches en latón y teníen la particularidá de venir con un númberu identificativu propiu en cada pieza (dalgunos catálogos estimen la cantidá de 5000 pieces acuñaes; si facemos casu del númberu serie, el tope taría en 9999, poro, ye factible). El nome del emisor y el valor facial veníen troquelaos y pintaos de prieto nel anversu; el reversu nun lleva grabaos. Dalgunos estudiosos ven l’aprovechamientu d’unes fiches pa facer la moneda, d’ehí lo de la numberación. 

Tipu 1. Delles pieces numberaes. Cobre

     Al finase cola primer remesa bien lluéu fainse, según Turró, otres dos emisiones d’estes monedes ya conocíes pol nomatu de segarretes, esta vez de cobre y cuproníquel (en delles páxines web de venta de monedes indiquen que son de níquel). N’otru estudiu al respeutu, el tituláu “Les cooperatives catalanes 1850-1950” d’Antoni Lluch, identifica monedes feches n’alpaca (amestáu de zinc, cobre y níquel) y non de cuproníquel, aleación por ciertu que se dixebra de l’alpaca en que nun lleva zinc, pero qu’asemeyen el mesmu color. Tamién aparecieron delles monedes feches n’aluminiu, aunque nun tean tipificaes en nengún catálogu, probablemente porque seyan prebes y non circularon. Camuda’l tipu, agora son un pocu más ellaboraes, y sábese un pocu más de la so hestoria. De man, nel nuevu diseñu apréciense centraes les cuatro barres del escudu catalán y, tanto’l valor facial como’l nome del emisor, vienen en llingua catalana; el reversu sigue ensin grabaos. Foron encargaes por orde del alcalde en funciones Sr. Josep Niubó, Ninot, a la casa Metalls Vídua Solà de Barcelona; el so propietariu, Salvador Solá, yera orixinariu de Segarra, y conocíu del alcalde. Esti empresariu encargose de conseguir el metal pa facer los cospeles d’un mou, al parecer, daqué ilegal. Los troqueles y los cuños foron encargaos a la casa Fidel Armadams de Barcelona.

Tipu 2 en cobre, cuproníquel (o alpaca) y aluminiu

     Les tiraes más estendíes nes publicaciones especializaes falen de 20.000 pieces en cobre, 30.000 en cuproníquel y 5.000 n’aluminiu; otros solo falen de 5.000 pieces en cobre y otres tantes en cuproníquel. Curiosamente nun aparez tirada conocida en alpaca. De toles maneres nun hai que fiase d’esta información, ya que les monedes foron fabricaes de mou clandestín y a escondíes del Comité de Control del taller, polo que nun hai rexistros, nin albaranes nin factures del llabor.

     Y lo de siempre, cuidáu coles falsificaciones, sobremanera la tipu 2, devío a la so variedá de metales. Como pista, indícovos que na mayoría de les falsificaciones aparecíes hai un erru gramatical: escaecieron pone-y la tilde a la pallabra Gaià. La “desaparición” de los troqueles tamién ye motivu pa refugar de delles pieces, sobre too si tan nuevines….

 
 Fontes: Monedas durante la II República y La Guerra Civil Española (1931-1939). Javier Ovelleiro

              Imperio Numismático. (Foru numismáticu)