Conseyu Municipal d’Ibi

     La localidá d’Ibi (Alacant) ye perconocía pola so historia fabril de xuguetes, destacando les factoríes de Payá y Rico. Entamada la contienda civil, dambes dos factoríes foron incautaes y xunies nuna sola col nome de Industrias Payá y Rico Socializadas pala fabricación de material bélicu y xestionaes pol sindicatu mayoritariu nes dos fabriques, la UXT.  Caberamente, la fábrica foi denominada Cooperativa Rai.

     Precisamente foi de la factoría de Payá, onde se concentrare tola maquinaria de les dos empreses, d’aú salen les monedes de necesidá pa esta localidá por orde del Conseyu Municipal. Los valores acuñados foron d’una peseta y 25 céntimos.

1 peseta (1937)

     Na sesión del 24 de xunu de 1937, el Conseyu apreba facer 10.000 pieces con valor d’1 peseta. La idega inicial yera facer los cospeles de níquel macizu; les prebes feches con dichu material (créese q’un centenar) salieron con dellos defeutos de fabricación debío a la dureza del metal, polo que s’optó por emplegar cobre niquelao. 

     Nel mercáu numismáticu ye perdifícil mercar les prebes de níquel; tienen un diámetru de 24 milímetros y un pesu de 6,24 gramos. El so preciu, a 2016, pue tar nos 300 euros.

     Falando de la moneda de 25 céntimos, el Conseyu Municipal decidió, na sesión del 2 de payares de 1937, acuñar 10.000 pieces en bronce (en dellos catálogos aseguren que solo llegaron a salir 7.000 d’esti metal) pala so distribución, pero atopáronse con que los conceyos vecinos les atropaben pa emplegales ellos mesmos. Esto fizo que’l Conseyu aprovare otra partida de 10.000 pieces, esta vez feches en cobre. Ye por ello que d’esta moneda tengamos 3 variantes pal anversu:

25 céntimos, la del mapa

     1. La tirada en bronce lleva nel anvesu una especie mapa supuestamente de la Península Ibérica coles llendes d’unes supuestes rexones.

    
  Nes de cobre alcontramos les otres dos variantes:

  2. La rodiella del 2 (de 25) tá grabada enriba la C (de céntimos);

      3. La rodiella del 2 (de 25) tá grabada enriba la E (de céntimos). Tamién podemos ver que les lletres de la leenda tán menos comprimíes que l’anterior y qu’ente el 2 y el 5 hai menos campu (tán más xuntos).

     Detallar tamién que, al facese les monedes con distintu material, camuden tamién el pesu y el grosor (ver fiches).

     Otru avisu: Esisten falsificaciones, sobre too de la del mapa, ya que una colleición d’estes monedes cotízase perbien. Hai que tener en cuenta que foron acuñaes bien poques (dafechu tán catalogaes como R, rares) lo que les fai pergoloses pa los colleicionistes.