Alemaña (República Federal)

Enllaz: 2 euros conmemorativos alemanes

Primer serie (2002)

     Los primeros euros alemanes van dataos col añu 2002, a pesar de que ya llevaren acuñándolos dende’l 1999, poro, l’añu que vien grabáu nes monedes xermanes ye’l d’emisión. L’esquema de los tipos grabaos ye’l típicu 2-3-3.

      Alemaña tien cinco Cases de la Moneda o ceques espardíes pel país y ca una va identificada por una lletra grabada na moneda:

      A   Berlín (Staatliche Münze Berlin) 

     D   Munich (Bayerisches Hauptmünzamt)

     F   Stuttgart (Staatliche Münzen Baden-Württemberg: PrägestätteStuttgart)

     G  Karlsruhe (Staatliche Münzen Baden-Württemberg: Prägestätte Karlsruhe)

     J   Hamburgu (Hamburgische Münze)

      Les monedes nun lleven marca identificativa’l país, polo que ya nun cumplen una norma de diseñu mandá por Europa. Otru incumplimientu ta nos céntimos de cobre: les estrelles de la bandera europea tan grabaes en baxurrelieve y tienen de tar en relieve.

1, 2 y 5 céntimos

     L’anversu ye’l mesmu pa les 3 monedes. Reproduz una cañina de   carbayu con fueyes y bellotes; esti diseñu ya ornamentaba los anteriores céntimos (pfennig) del marcu alemán (Deutsche Mark, DM). Aparez tamién l’añu d’emisión y una pequeña lletra que ye la marca identificativa de la ceca. Llíndia’l diseñu un aniellu coles 12 estrelles de la Xunión en baxurrelieve. El diseñu foi fechu pol catedráticu Rolf Lederbogen.      

10, 20 y 50 céntimos

    L’anversu ye’l mesmu pa les 3 monedes. Reproduz la Puerta de Brandeburgu, emplegada n’esti casu como símbolu de la dixebra d’Alemaña tres la II Guerra Mundial y de la so cabera xuntanza en 1989. Aparez tamién l’añu d’emisión y una pequeña lletra que ye la marca identificativa de la ceca. Llíndia’l diseñu un aniellu coles 12 estrelles de la Xunión en relieve. La perspeutiva adoptada n’esti diseñu, obra de Renhard Heinsdorff, restaya l’apertura de la puerta, cola fin d’amosar la xuntanza d’Alemaña y Europa.

1 y 2 euros

    L’anversu ye’l mesmu pa les 2 monedes, salvo polo del bimetalismu. Representación d’un aigla, símbolu tradicional de la soberanía alemana que ya aparecía nos marcos alemanes. Aparez tamién l’añu d’emisión y una pequeña lletra que ye la marca identificativa de la ceca. Llíndia’l diseñu un aniellu coles 12 estrelles de la Xunión en relieve.

    Los autores d’esti diseñu foron Heinz Hoyer y la so esposa Sneschana Russewa-Hoyer.

     

     

     Nel cantu la moneda de 2 euros aparez una lleenda que ya venía grabada nel cantu l’antígua moneda de 2 marcos: Xunidá y Xusticia y Llibertá (y l'aigla):

Enllaz: 2 euros conmemorativos alemanes