Amadéu

      Con esti nomatu conozse a la pieza de 5 pesetes de plata acuñada durante'l reiná d'Amadéu I de Saboya (1870-1873). Al ser un reináu de lo más efímero, nun dio tiempu a diseñar toa una serie de monedes, tanto en pesetes como en céntimos, y "presentar en sociedá" al nuevu rei. Les acuñaciones d'oru, en valores de veinticinco y cien pesetes, nun pasaron de ser meres prebes. Y en plata tan solo apaeció el duru, les cinco pesetes, moneda emblemática por ser la sucesora del míticu real d'a ocho, primer divisa internacional del mundu, práuticamente dende los tiempos de Carlos I (1516-1558). 

Ver ficha

     La fama d'esta moneda foi debío al so emplegu durante llargu tiempu, más allá del propiu reináu d'Amadéu, pues siguió acuñándose durante la Primer República (1870) ya inclusu 1875, añu en que sedría entronizáu Alfonsu XII (1875-1885) como rei d'España. Anque durante los siguientes periodos, reinaos de los Alfonsos (XII y XIII) y la II República, nun foi una moneda de cursu llegal, la xente atropó abondes pola lleenda de que, gracies a les barbes del rei, hubo d'emplegase más plata de lo normal. Por desgracia pa estos ayalgueiros, tres la Guerra Civil tovieron de sacales de los sos esconderites, primero, como moneda fiable pa la merca de productos de primer necesidá nel estraperlu y más tarde, por orde del nuevu Gobiernu franquista, qu'esixía la saca de monedes de metal noble (oru, plata y cobre) pa enllenar les arques del Estáu, so pena de multa y cárcel. Anguañu ye una moneda perfácil d'atopar nos mercaos numismáticos y, según l'añu acuñación, atopala nuna calidá MBC o superior a un bon preciu.