Nel añu 395 muerre l’emperador Teodosiu I y l’Imperiu Romanu xébrase’n dos partes conocíes como Imperiu Romanu d’Occidente ya Imperiu Romanu d’Oriente, quedando como emperador occidental Honoriu. Esta debilidá imperial facilita la migración de los nomaos pueblos bárbaros dende los sos territorios nel centru y oriente d’Europa haza occidente trespasando la llende natural del ríu Rhin, delles vegaes, col parabién del emperador, tan necesitáu de fuercies militares. Agora los bárbaros diben formar parte tamién del xuegu d’intrigues imperiales pal esbarrumbe y asitiamientu de césares nel tronu de Roma.
 |
| Mapa 1: Gallaecia en tiempos de Dioclecianu (298 d. C.) |
Ente Roma y los bárbaros
Ye sabío que’l poder y control de Roma sobre los teritorios conquistaos basábase principalmente nes sos llexones y el so cuerpu de funcionarios. Hasta finales del sieglu IV, la presencia de tropes romanes nel nuesu territoriu reducíase a una llexón, la VII Gemina, asitiada en Llión y delles cohortes asitiaes en Lucus Augusti (Lugo, Galicia), Petavonium (Rosinos de Vidriales, Zamora) y Bracara Augusti (Braga, Portugal). La guerra ente l’emperador llexítimu Honoriu y l’usurpador Constantín (proclamáu emperador poles sos tropes de la Britania y llueu poles llexones de la Galia) en territoriu hispanu, fexo que toes estes tropes colaren pa defender la Península. Nun se volvió a saber un res d’elles nin tornaron al territoriu nueves tropes pa xupliles. Les suposiciones históriques son qu’hebo una griesca pela Meseta norte, ganada pol exércitu de Tante, que cuntaba ente les sos tropes ausiliares con Honoraci (guerreros bárbaros) que tres la vitoria percuerren los nomaos Campos Palentinos saqueando al preste. Tres esto, son colocaos como vixilantes nos pasos de los Pirineos y evitar asina el pasu a Hispania d’otros bárbaros “non gratos” que ya dende’l 406 andaben faciendo lo propio pela Galia.
La marcha de les llexones y de los funcionarios ensin apegu na rexón, provoca un vacíu de poder qu’ha de ser xuplíu dalgún mou. Ye de suponer que dellos personaxes poderosos llocales, d’orixe principalmente hispanorromanu, ocuparen estos espacios y los xestionaren provisionalmente hasta saber qué yera lo que diba pasar. Mentantu, la vida sigue y el comerciu tién de seguir, y pa ello, fai falta moneda, polo menos nos principales puntos poblacionales. A falta referencies y ordenances dende Roma, ye de suponer qu’estos señores llocales ordenaren batir moneda, principalmente menudo, pal mercadéu diariu del so territoriu y, pa non distorsionar el numberariu con otros, tendieren a fabricar monedes semeyes a les que ya emplegaben, esto ye, la moneda imperial que manexaben, pero de fechura propia. A estes acuñaciones conócense, nel mundiu numismáticu como “monedes d’imitación” (monedes calcaes a les romanes pero ensin tar baxo’l control de l’alministración imperial). La única novedá, y perimportante pa los estudios arqueolóxicos, foi’l xuplir les marques identitaries de Roma (la palma y el caducéu) por unes iniciales que dellos estudiosos identifiquen como marques de ceques provinciales, siendo les de Bracara Augusta (Braga, Portugal) y Lucus Augusti (Lugo, Galicia) les más principales (equí hai que dexar bien claro que los estudios, hasta agora, nun son a demostrar si l’aparición d’estes marques llocales ya se dieron n’esta estaya o foi daqué introducío polos futuros amos del llugar, los suevos, que tamién acuñaron pieces d’imitación romano).
La población indíxena d’Asturies ya diba tiempu viviendo de nuevu nos vieyos castros, lo que provocó que la xente tornare otra vegada al emplegu del ancestral troquéu, que’n realidá nunca nun desapareciere. Los caberos ya inestables años del Imperiu y la falta real de control sobro la población astur fexo posible esti cambiu, que quicias nun se notare tanto en poblaciones más controlaes por asturromanos como Noega (Xixón) o Lucus Asturum (Lugo Llanera). Lo que ta claro ye que los astures tresmontanos recuperaron de nuevu el so mou de vida y asina los pilló la desaparición efeutiva del poder de Roma nel país. Nun hai constancia real de la esistencia de ceca o taller nengún en tol territoriu astur, lo que complicaría la llabra de moneda provincial equí; quicias, n’Asturica Augusta (Astorga) pudo esistir, si non un taller d’acuñación, sí una circulación más o menos bayurosa de moneda por ser un puntu comercial importante ente Bracara, Emerita, Lucus Augusti y hasta Caesar Augusta (Zaragoza). Llión y Coyança (Valencia Don Xuan) tamién yeren places fuertes baxu control hispanorromanu.
Lleguen los bárbaros
Nun resume rápidu, suevos, vándalos (asdingos y silingos) y alanos trespasen xuntos la frontera romana per Maguncia y lleguen hasta los Pirineos, pasando a Hispania nel añu 409 y asitiándose per tola provincia. Tres el repartu de la península, suevos y vándalos asdingos fínquense na Gallaecia allá pel 411. Como ente godos nun se podíen ver, les griesques ente estos dos pueblos faen que los vándalos colen pal norte d’África nel añu 429, quedando solo los suevos equí.
 |
| Mapa 2: Discutible mapa col repartu peninsular ente bárbaros. Wikipedia |
Debemos partir del fechu de que los estudios arqueolóxicos, no referente a la estaya bárbara, son bien escasos práuticamente en toa Europa. No que se refier a los suevos, ye tan probe qu’entá fai más abegosu el so estudiu. A ello hai que sumá-y esi espaciu escuru ente poderes ya mentáu: la marcha los poderes fácticos romanos y el control que dellos personaxes poderosos llocales, d’orixe principalmente hispanorromanu, faen n’estos espacios, xestionándolos provisionalmente hasta saber qué yera lo que diba pasar. Y lo que pasó foi que tres la vitoria de Constantín n’Hispania los honoraci son recompensaos por Xeronciu, ún de los xenerales ganadores, col llibre saquéu de los Campos Palentinos (conocíos años más tarde como Campos Góticos) y el so asitiamientu nos pasos pirenaicos a mou d’aduaneros. Esto nun-y prestó un res a Constante, otru xeneral y, a la par, fíu del emperador ususpador, entamando una engardieya ente ellos. Xeronciu retiró-y entós el so sofitu respaldando a otru xeneral, Máximu, como nuevu emperador. ¡Menudu enguedeyu!. Total, qu’a la fin, los aduaneros fainse los llocos, miren pa otru lláu y dexen pasar a los collacios d’esta hestoria bárbara.
Suevos y vándalos (asdingos)
Efeutivamente: nel añu 409 suevos, vándalos (asdingos y silingos) y alanos pasen xuntos los Pirineos y empobinen una carrera pa ver quién ye’l que más territoriu conquista y saquea. Como esti trabayu ta centráu nel nuesu territoriu (Asturies) vamos céntramos namás que nos pueblos invasores que perequí llegaron (estendiéndomos realmente a tola Gallaecia). Pel añu 411 dicen los llibros que fincaron equí los sos dominios vándalos asdingos y suevos. Sabemos tamién que dixebraron la Gallaecia en dos y repártinse’l control. Y equí, el primer enguedeyu. Volvemos a lo mesmo, sábese bien poco d’esta estaya, y los principales cronistes del momento son, como siempres, más o menos creyibles. Orosiu ya Hidaciu son dos cronistes d’esi tiempu y orixinarios del llugar, siendo l’últimu el que más s’esplayó escribiendo sobro los primeros años bárbaros. Sorprendentemente, dambos dos nun ufren nin un plizcu d’información sobre l’Asturies Tresmontana, la nuesa. San Martín de Braga tamién dexa dellos escritos y, años más tarde, San Isidoru de Sevilla, atropa la información de los tres, fai la so crónica y gánase la medayina de ser el mayor cronista de la época (y eso que nun la vivió).
Pues eso, que’l primer enguedeyu históricu ye’l de saber ónde s’asitiare ca pueblu invasor. Los primeros estudios asitien a los vándalos ente la costa y el ríu Miño y a los suevos ente’l Miño y el Dueru (mapa 2). Nuevos estudios refuguen d’esta partición y fainla norte-sur en vez d’oeste-este, quedando entós los suevos pal occidente controlando los conventos de Braga y Lugo, y los vándalos col conventu astur, Cantabria y la tierra los vacceos. Pa lo que mos interesa, independientemente de la partición, los nuevos “amos” d’Asturies diben ser los vándalos asdingos. L’arqueoloxía dexa constatao la so presencia n’Asturies colos descubrimientos de l’ayalga de Chapipi en Gráu (monedes escondíes pa evitar el so saquéu) y los restos de la villa romana de Memorana (L.lena) onde apaecieron restos calcinaos d’un posible incendiu tres el so saquéu. Llugo Llanera tamién ufrió la so “visita”, de magar que delles vieyes cróniques aseguren que los vándalos nun solo nun la destruyeron, sinon que la potenciaron. De l’Asturies cismontana nun falen d’engardieyes, ya que les principales ciudaes, Llión, Astorga y Coyança (Valencia Don Xuan) taben perbien protexíes por muries y castiellu. Total, que les incursiones vándales diben centrase principalmente nel occidente astur, tierra de los pésicos, pola imposibilidá de controlar les ciudaes fortificaes asina como a los astures montañeses.
Pocu –yos duró esti “reinu” a los vándalos. Nel 417 entren na Península Ibérica los visigodos por orde de Roma, el so cometíu, eliminar a los revoltosos alanos y vándalos silingos asitiaos nel centru y sur de la península. Tres la derrota, los restos de vándalos silingos y alanos entren en territoriu asdingu, amestándose con ellos. Al añu siguiente, hai seca, males colleches y munches boques afamiaes, poro, vándalos y suevos engárdiense ente sí hasta que los primeros son vencíos (con trampa, diben ganando, pero los suevos recibieron ayuda de los hispanoromanos de la Betica y la Lusitania) y finen colando pal norte d’África nel 429.
D’esti pueblu nun hai constancia de qu’acuñaren moneda propia, igual nin la necesitaben o nun –yos dio tiempu a ponese a ello (colo que rapiñaben yera bastante). Tamién ye cierto que tovieron ente nós solo 18 años (menos n’Asturies si cuntamos que la griesca escontra los suevos finó pel 419).
Suevos y solo suevos
Cola marcha de los vándalos y de les fuercies romanes, los suevos ocupen to’l espaciu abandonáu y seguirán ampliando’l so reinu hasta qu’atopen tamién colos visigodos y desapaezan de la nuesa hestoria. A diferencia d’otros pueblos bárbaros, los suevos foron más práuticos nes sos conquistes: foron, digamos, menos bárbaros nes incursiones militares y llegaron a alcuerdos colos xefes hispanoromanos llocales, hasta’l puntu de pautar matrimonios ente d’ambos dos pueblos. Tamién ye perimportante detacar que los suevos finen abrazando la relixón católica frente a la arriana, lo que –yos fae tar bien vistos tanto pola población llocal como, como non, pola casta eclesial, respetando la dixebra del territoriu en conventus y parroquies. La capital del so reinu asitiáronla en Bracara Augusta (Braga, Portugal).
Hasta agora nun se nomó nengún rei, vándalu o suevu, pa nun enguedeyar entá más esti rollu que vos suelto, pero agora que ya solo hai unos “amos” con cuasi 175 años d’hestoria y dalgunes acuñaciones monetales, pues ye menester falar d’ellos.
Primer reinu suevu (411-456) y el so numberariu
Si tenemos poca información sobro los suevos, menos entá tenemos de les sos acuñaciones. Praúticamente tolos estudios al respeutu básense en supuestos y deducciones sacaes de vieyos escritos ya intervenciones arqueolóxiques. Ye por ello qu’estes cosines hai que garrales con pinces. De man, sabemos que les primeres monedes sueves foron acuñaes asemeyando les romanes, que pa eso yeren les que circulaben pel territoriu. Poro, les pieces acuñaes centráronse nos sólidos y tremises (o trientes) n’oru y silicues en plata. Según dexó escrito San Isidoru nes sos “Etimoloxíes”, el numberariu suevu ceñiríase al sistema d’ocho silicues de plata igual a un triente d’oru, y tres trientes igual a un sólidu. El bronce práuticamente ta desaniciáu. Y equí lo falao enantes: apaecen les marques de ceca nes monedes, detacando la de Bracara coles iniciales BA. Si bien ye verdá que nun sabemos si esti fechu asocedió so’l gobiernu de los señores hispanorromanos, sí sabemos que foi emplegáu polos suevos nes sos acuñaciones, lo que fai que seya la primer vez na Península Ibérica qu’esto asocede.
El primer rei conocíu de los suevos na Penínsua Ibérica foi Hermericu (409-438). Elli foi’l que dirixó al so pueblu dende la so llonxana tierra xermana xunto colos sos compañeros vándalos y alanos. Asitiose na Gallaecia y robló un foedus col emperador Honoriu faciendo d’esta provincia un reinu asociáu al imperiu (dafechu, ye la primer vez qu’apaez esta institución política n’Europa y ye l’orixe del antíguu reinu de Galicia). Asitia la capital del so reinu en Bracara Augusta. Tres la marcha de los vándalos, faise col control de tola Gallaecia. Nel 438 abdica por enfermedá nel so fíu Rekhila, co-gobernando con elli hasta la so muerte nel 441.
Años 420-422. L’usurpador de la Hispania Maximilianu ye derrotáu por un exércitu formáu por romanos fieles al emperador Honoriu y tropes tanto visigodes como sueves. Pa conmemorar tal fechu, acuñose esti sólidu pel añu 423. Vense nel reversu les sigles BR propies de Bracara, lo cual nun quier indicar que fore acuñada ellí. Pola so perfeuta fechura, ta catalogáu como “oficial” y non “d’imitación”, poro,batíu nuna ceca imperial y non nuna llocal, pero pa circular nun llugar concretu, n’esti casu, nel territoriu controláu pol rei Hermericu, la Gallaecia con capital en Bracara. Ye de suponer qu’esta moneda fuere la primera en circular pol reinu suevu.
 |
| Sólidu oficial d’Honoriu. Semeya: In Tempore Suevorum |
Nel anversu vemos el bustu del emperador Honoriu cola lleenda DN HONORI VS PF AVG (DOMINI NOSTER HONORIVS PIVS FELIX AVGVSTVS) y nel reversu vémoslu de cuerpu enteru pisando a un vencíu (ye lo que se conoz como calcatio colli, el vencedor písa-y el cuellu al rival soxulgáu) y garrando coles manes un estandarte y una bola sobre la qu’apaez una Niké coronándolu con lloréu y la lleenda VICTORI AAVGGG (estes repeticiones de lletres fain referencia a la presencia de dellos Augustos, propio del sistema tetrárquicu impuestu por Dioclecián nel añu 294). El términu COMOB fai referencia a que la moneda ye una emisión imperial (COM, comitatus) y que ta fecha con oru puru de Constantinopla (OB, obryziacum aureum); vamos, una marca calidá.
Partiendo d’esti orixinal, apaecen bayuroses versiones de tipu llocal, les famoses “d’imitación”, nes que nin s’esmolecen en camudar les marques de la ceca d’orixe o la de la calidá bizantina. Estes monedes van seguir acuñándose a lo llargo’l tiempu inclusu tres la muerte del emperador y por dellos reis suevos.
 |
| Sólidu d’imitación ensin marca ceca |
 |
| Sólidu d’imitación. Ceca MD (Mediolanum, Milano; Italia) |
 |
| Sólidu d’imitación. Marca de ceca H-NR |
Como curiosidá, esti sólidu apaecíu nuna escavación na ciudá de Vigo cola efixe del emperador rival Constantín III. Mesmu tipu nes dos cares y cola lleenda DN CONSTANTINVS PF AVG repetía n’anversu y reversu (cola conocía marca CONOB). La marca de ceca ye L D (Lugdunum, Lyon, Francia). A la fin, da igual el focicu grabáu, perres son perres, sobremanera si son d’oru.
 |
| Sólidu de Constantín III. In Tempore Suevorum |
Siguiendo cola historia de los reis suevos, Rékhila espardió inda más les llendes del so reinu, ocupó la Lusitania, la Betica y gran parte de la Cartaginense. Foi’l másimu espansionismu suevu na península, dixebrando la capitalidá del reinu ente Bracara y Emerita Augusta. A la so muerte, xube al tronu el so fiu Rekhiariu, nel 448. Rekhiariu robla trataos colos visigodos, conviértese al catolicismu y emite moneda propio, pero la so idega de fincar definitivamente un reinu suevu na Península, failu enfrentase a los sos antíguos aliaos, romanos y visigodos, consiguiendo tolo contrario; na batalla del ríu Órbigu, el rei visigodu Teodoricu II, failu fuxir pa Oporto, onde morrería asesináu nel añu 456.
 |
| El reinu nos caberos años del rei Rekhiariu. Wikipedia |
Les silicues de Rekhiariu
Efeutivamente, Rekhiariu foi’l primer rei suevu n’acuñar moneda propia. Yeren siliques de plata col anversu a nome del emperador Honoriu, pero nes que s’apropia del reversu pa só. Ye braeramente una pieza perinteresante por dellos motivos. El primeru ye l’aparición del ya muertu, hai unos 25 años, emperador Honoriu nel anversu; al paecer Rekhiariu querría dexar bien clara la llexitimidá del pueblu suevu a controlar la Península frente a otros pueblos (los visigodos, caro) y cola efixe l’emperador fai alcordanza del tratáu (foedus) robláu ente ésti y el so güelu Hermericu. Apaez tamién nel reversu una cruz llatina, una clara señal de la conversión d’esti rei suevu a la fe católica y quedar bien asina delantre la casta eclesial galaica y los hispanorromanos del llugar. Raro ye tamién qu’esti rei acuñare esti tipu moneda, ya que la plata taba práuticamente desaniciada pa la fechura monedes en favor del oru y el bronce/cobre. Ye la primer vez q’un monarca “bárbaru” inclui’l so nome nuna moneda.
 |
| Desfecha, pero de bona factura. Muséu D. Diogo da Sousa, Braga |
Honoriu nel anversu colos atributos imperiales y los sos títulos: DN HONORI VS PF AVG y un reversu onde apaez una corona imperial con una cruz llatina dientro y les ya conocíes iniciales de ceca BR, cola lleenda IVSSV RECHIARI REGES (Por orde del rei Rekhiariu)
 |
| Semeya: In Tempore Suevorum |
No que se refier a Asturies, nun hai constancia de ceques nin descubrimientos monetarios d’esti primer reinu suevu n’escavaciones arqueolóxiques. Dafechu, nun hai constancia de que los primeros reis suevos pudieren domeñar territoriu nengún n’Asturies tresmontana salvo, posiblemente, la fastera occidental de los pésicos.
Un períodu de transición en dos tiempos (456-469) (469-549)
Tres la muerte de rekhiariu nel 456, los visigodos controlen el reinu baxo mandu d’Axiulfu, el cual refuga del so pueblu y faise coronar rei de los suevos. La so baxa popularidá, fai que los suevos ya hispanorromanos s’alzen escontra elli, lu maten y entren nuna guerra civil que xebra’l reinu en dos: el reinu suevu de la Lusitania y el de la Gallaecia. A la fin, sobro’l 464, Remismundu xune de nuevu el reinu, que frayó de nuevu poles sos actitudes violentes. De nuevu los visigodos fain de policíes del imperiu arrequexando al rei na zona de la Gallaecia. Según les cróniques d’Hidaciu, per estes feches los astures diben ufrir ataques tanto de los suevos pel este como de los visigodos pel sur, siendo la cismontana la más castigá.
Ente’l 469 y 549 hai un furacu históricu nel que nun apaecen referencies sobro’l pueblu suevu, salvo los nomes de dalgún rei; les cróniques d’Hidaciu lleguen hasta equí.
Segundu reinu suevu (550-585) y el so numberariu
Col estudiu de los rellatos de Gregoriu de Tours y Samartín de Braga, apaecen de nuevu los suevos. El primer rei del que tenemos noticies ye Carriacu (550-559), y gracies a un milagru, según el nuesu cronista. El fiu’l rei taba malu de llepra, salvándose gracies a la intercesión divina de Samartín de Tours, ello fexo que’l rei tornare al catolicismu (Remismundu pasárase al arrianismu pa quedar bien colos visigodos) y espardiera’l cultu haza esti santu pelos sos domeños.
Ensin embargu va ser el rei Miro (570-583) el más detacáu n’esta estaya al querer recuperar la grandeza del vieyu reinu, pero nun pasó de delles incursiones escontra los Luggones tresmontanos (y que les cróniques nomen Runcones o Ruccones).
Esiste un enguedeyu ente los estudiosos no referente a unes acuñaciones, en concretu, unos tremises d’oru d’imitación a nome de los emperadores Honoriu y Valentinianu III. Unos apuesten a que foron acuñaos ente los años 430 y 450 (feches, dafechu, más cercanes al períodu de gobernanza de dambos dos emperadores) y otros camienten que son más tardíos, propios d’esti segundu reináu suevu. Seya cual fuere, lo que sí ye claro ye que foron acuñaos nun momentu de gran esplendor del reinu y como afirmación de los drechos suevos sobre Hispania.
El tipu d’estos tremises son d’orixe romanu-oriental y nun foi introducíu n’occidente hasta unos años más tarde, en concretu, baxo’l gobiernu de Valentinianu III (425-455). Ye por ello que choca ver a Honoriu, ya fallecíu, n’estos tipos y ye por ello que los apaecíos en domeños suevos seyan d’imitación. Como siempres, nel anversu va la efixe l’emperador colos sos títulos, DN HONORI-VS PF AVG detacando nel reversu una cruz griega arrodiada d’una doble corona y la identificación bizantina CONOB.
 |
| Tremís d’Honoriu. Muséu arqueolóxicu Nacional (Ruth Pliego) |
Los tremises de Valentinianu III ya son más bayurosos. N’esti casu los estudiosos cataloguen estes monedes como pseudu-imperiales y non d’imitación, por cuenta de qu’entá nun s’atopare un tremis orixinal del que lluéu les ceques llocales fixeren les sos semeyes, poro, taríemos ante unes llabres de fechura totalmente autóctona. Ye por ello que tamién s’atopen toa una triba de variantes, delles de bona calidá y otres claramente dexeneratives, hasta’l puntu de desfigurar les mesmes lleendes. La idega orixinal sedría acuñar nel anversu el bustu del emperador colos sos títulos: DN VALENTINIANVS PF A y un reversu cola cruz coronada. Ensin embargu, d’unos 50 exemplares catalogaos y estuiaos, apaez un bustu d’emperador de llibre diseñu acompañáu delles vegaes pol títulu de PIVS. Asina mesmo, nos reversos, apaecen marques a mou de lletres (R, L y N son les catalogaes) o símbolos (media lluna, estrella o media estrella, punta llanza…) onde se quier interpretar una marca ceca.
 |
| Marca estrella |
 |
| Marca media lluna |
 |
| Valentinianu PIVS (Títulos dexeneraos) |
 |
| Un Valentinianu de chiste |
 |
| ¿Y barbudu? |
Serie MVNITA o LATINA MVNITA: Ceques astures
Misteriosa serie de monedes en plenu estudiu y numberoses suposiciones. Basándonos nos estudios más recientes y fiables, sacamos en conclusión que son tremises acuñaos a semeyanza de los anteriores de Valentinianu pero de pesu inferior (ente un 10 y un 15 % menor, teniendo en cunta que’l pesu mediu d’un triente taba nos 1,25 gramos) y nos que desapaecen la efixe y títulos imperiales a cambiu d’identificaciones llocales. Cronolóxicamente englóbenles a la par, o llixeramente posteriores, a los tremises del emperador, centrándolos nos reinaos de Teodomiru (559-570) y Miru (570-582) períodu marcáu poles fazañes béliques escontra Luggones y visigodos, asina como l’averamientu de los suevos a los merovinxos de la Galia.
Na mayor parte de los estudios espublizaos apaez el categóricu títulu de LATINA MVNITA pa falar d’esta serie monedes. Ensin embargu, esiste una bayura monedes nes que’l términu LATINA nun vién, poro, la nueva tendencia ye nomala, cenciellamente, serie MVNITA.
El primer enguedeyu qu’atopamos ye’l de descubrir quién fexo estes monedes, o en nome de quién y por qué. Les primeres hipótesis quieren da-y una identidá romana frente a la bárbara, esto ye, que los señores sedrán los suevos, pero los habitantes son hispanorromanos, d’ehí que’l términu LATINA MVNITA tórnese como “moneda romana”. Otra idega va pel camín relixosu, sedríen unes acuñaciones sueves marcando’l so sentir católicu frente al de los sos enemigos visigodos, de relixón arriana. Esta teoría ye interesante nel sen de que toles ceques tan identificaes nel Parrochiale Sueuun, llistáu de les parroquies católiques del reinu. L’aparición d’unes monedes d’esta serie col términu PAX fain sospechar d’acuñaciones pa cellebrar la fin de los enfrentamientos bélicos ente bárbaros (polo menos durante un tiempu). Pero lo más detacao ye l’apaición de nomes de llugares o personaxes ente los términos MVNITA y LATINA MVNITA. La principal causa d’estos cambios quier atopase nunes posible acuñaciones de tipu llocal, probablemente promovíes por detacaos personaxes del llugar o monetarii y, principalmente, en ceques llonxanes de la capital, Bracara. La dubia agora pasa por saber si estos personaxes fixeron les acuñaciones pola so propia cuenta o col preste del rei (posiblemente señores supeditaos al rei pero con cierta autonomía, o bastante, ya que’l control real de los territorios astures por parte los suevos, sedría na zona cismontana y en delles poblaciones de cierta entidá).
Ruth Pliego fai dellos grupos según la lleenda grabada nes pieces:
1. LATINA con un topónimu y MVNITA
2. LATINA con un antropónimu y MVNITA
3. LATINA con lletres non llexibles y MVNITA
4. Un topónimu seguío de MVNITA
5. Un topónimu seguío d’un antropónimu y MVNITA
6. Un topónimu seguío de MVNITA y ún d’estos dos términos: CLARA o PAX
7. Un antropónimu seguío de MVNITA PAX
Tamién ye perfácil atopar variantes como ver MVNETA, MONETA, MVNI, MV, WANITA (por dexeneración del diseñu)…
Gracies a les grabaciones toponímiques, ye agora cuando apaecen, claramente identificaes, ceques en tarrén astur (hasta esti momentu, polo menos, nun hai constancia de ceques del períodu suevu nel Conventus Asturiense).
 |
| Principales ceques de la serie MVNITA (en bermeyu) |
Bergio (Cacabelos o Villafranca), Leione (Llión), Laurentio, Senabria y Murello, son ceques ya confirmaes y toes elles n’Asturies Cismontana (esceutu Senabria, que taba integrada nel Conventu Auriense, Ourense), dafechu, los estudios numismáticos dan por válidos dos grupos principales d’esta serie basaos nos sos estilos d’acuñación: el berxidense y el llionés.
L’estilu de Bergidum ye’l que caltién les pieces de meyor fechura. Lleva la lleenda BERGIDENSE MVNITA nel anvesu y una B nel reversu como posible marca de ceca. La influyencia d’esti estilu tamién apaez en pieces atribuyíes a les ceques de Maurelos y Senabria, ya inclusu pue vese nuna moneda atribuyía a Llión, cola lleenda LEIO IACOTIS MVNITA y una L como marca de ceca.
L’estilu nomáu llionés suel venir cola marca L, ensin embargu, hai una pieza cola lleenda LEONES MONETA CLARA que lleva como marca una P.
Los dos tremises siguientes, tan sacaos del trabayu de Cebreiro Ares y son comparaos por esti autor pa identificar la so procedencia. Del primeru nun hai dubia, LEIONENSE MVNITA, pero el segundu, magar que se paeza al anterior (quicias más toscu) xenera dubies pola so lleenda LATINA ELI MVNITA. ¿Qué sitiu ye ELI, o quién ye? Dellos estudiosos atribúin a personaxes poderosos o detacaos l’aparición del so propiu nome na moneda, pero n’esti casu, Cebreiro Ares, basándose na similitú de les lletres, quier ver un topónimu averáu a llión pero coles lletres camudaes; poro, ELI pasaría a ser LEI (LEIO) y non un antropónimu.
 |
| Tremis LEIONENSE MVNITA |
 |
| Tremis LATINA ELI MVNITA |
Precisamente Ares mete nel grupu de les monedes con antropónimu a l’anterior mentada LEIO IACOTIS MVNITA, onde Iacotes, escrito en xenitivu, fadría referencia a un tal Iaco, d’oficiu monetarii y que tamién apaez en monedes de la Francia merovinxa.
Como curiosidá, la moneda de Morello, anguañu Cinfaes, Tras-Os-Montes, Portugal, pero que según el Parroquial suevu, pertenecía a la Diócesis d’Astorga:
 |
| Tremis MVRELENSE MVNITA. Muséu D. Diogo de Sousa, Braga |
 |
| Tremis LATINA EMERI MVNITA |
Efeutivamente, Mérida nun ye astur, y ye que delles acuñaciones fora de les nueces tierres, anden semando dubies pola so posible, o non, procedencia. Tenemos el casu d’una LATINA POLLEIIINA MV que se supón fai referencia a Palencia; otra paez referise a Tuy, Pontevedra, LATINA TVDE MVNITA y ye, de momentu, l’únicu casu en territoriu gallegu.
 |
| Tremis LATINA TVDE MVNITA. Bibliothéque Nationale de France |
 |
| Tremis LATINA POLLEIIINA MV. American Numismatic Society |
Hai dellos topónimos, o posibles, del grupu LATINA MVNITA qu’entá nun tan identificaos: ELI (que sedría LEI (O) pa Cebreiro Ares), BENE (¿Benavente?), GATTIC, o la que nun se sabe bien si na pieza trai MVNES o MVRES. Ensin embargu, los topónimos del grupu MVNITA son perbien conocíos: MVRELENSE, BERGIDENSE, LAVRINTINA, LEIONE(N)SE. Lo mesmo que les acompañaes polos posibles antropónimos: MVR(E)LLO IVLI, LEIO(NE) IACOTIS, SENAPRIA TALASSI.
Ente les más rares de clasificar, por nun saber bién de los fechos referíos, son les pieces alcontraes coles lleendes LEONES MONETA CLARA (moneda leonesa, sí, pero ¿?) y les identificaes con PAX (paz) quiciabes referente a la fin d’una guerra, pero que xeneren dubies poles sos lleendes: GALLICA MVNITA PAX (¿por paz na Gallaecia ente bárbaros? ¿o por referencia a la Galia merovinxa, aliaos católicos de los suevos escontra los visigodos?); ya IACOTES MONETA PAX (¿Una moneda fecha por Iaco pa cellebrar la paz?. Recordemos que tamién apaez un monetarii nomáu Iaco nes monedes merovinxes, de la Galia)
El reversu ye común, y perconocíu: la cruz arrodiada con círculos ornamentaos y cola lleenda CONOB (y variantes a magüeyu) pero xeneralmente invertida, como si la viéramos nun espeyu. Por norma xeneral equí tamién apaecen marques y lletres que de xuru fadrán referencia a la ceca.
Audeca y la fin del suañu suevu
Audeca (584-585) sedrá’l caberu rei suevu. Derrotáu pol visigodu Leovixildu II, sedría enzarráu nun monasteriu como monxu y la Gallaecia pasaría a formar parte del ya fincáu na Península Reinu Visigodu.
El Muséu Arqueolóxicu Nacional (MAN) tenía una moneda sueva, un tremís, que perdió. Ta desaparecía, sí, y lo único que quedó d’ella ye una semeya regulina. Lo que se sabe d’ella ye que creó series dubies ente los estudiosos. Pío Beltrán nun la catalogó a nengún rei, sinon que sumpuxo que, la lleenda OCOVIACCA apaecía na moneda, referíase al llugar de Coviacca, parroquia astur según el parroquial suevu. Otros, como Grierson, quieren ver, nuna poco lleíble lleenda OCOVIACCA (o ODIACA) REGES, una refencia al caberu rei suevu. Cebreiro Ares nun se decanta, pero detaca que’l diseñu de la moneda ya nun s’asemeya a les anteriores acuñaciones sueves, sinon que ye más asemeyada a les acuñaciones merovinxes y anglosaxones.
Tremís desaparecíu del MAN ¿Audeca?
Pa finar, Pio Beltrán espublizó información sobro otros tremises suevos y que Reinhart añadió nel so catálogu, en concretu, una a nome del rei Miru y otra a un tal Irucu, al que titula rei de Lugo. El restu d’estudiosos nun lo fain creyíble.
Fonte: IN TEMPORE SUEVORUM. Obres y estudios organizaos pola Diputación d’Ourense nel 2018 y qu’asoleyen dellos trabayos equí reflexaos:
El tipo monetal visigodo de victoria con palma y guirnalda acuñado en Hispania: buscando la destrucción del reino suevo de Miro (572-584). López Sánchez, Fernando. Wolfson College (Oxford, Reinu Xuníu)
La moneda de época sueva: Un destello fugaz en la historia monetaria de Gallaecia. Pliego, Ruth. Universidá de Sevilla.
Otres fontes:
Las primeras monedas suevas. Pío Beltrán
Monedas y billetes en la historia de Asturias. Dellos collaboraores. Editorial Prensa Asturiana, SL.
Dificultades que plantea el estudio de la Historia Monetaria sueva. Cebreiro Ares, Francisco. “Xornadas Internacionais de Historia Monetaria de Galicia”, paraninfu de la Universidade de Santiago de Compostela. 2010.
Hallazgo de un triente emeritense de la serie LATINA MVNITA en Cáceres. González García, Alberto; Martínez Chico, David.
Hallazgos y circulación de la moneda sueva. Núñez Meneses, Pablo. Blog de l’asociación ANVAR.
Suevos. Web Portal Fuenterrebollo
De la Asturias sueva y visigoda. Diego Santos, Francisco
Asturias visigoda. Web Gutiska Razda (El sitio de la lengua goda)
Monedas con ceca en León. Blog fonsado
Emisiones suevas, bizantinas y visigodas. Blog Tesorillo.com
Wikipedia: Gallaecia. Pueblo suevu. Vándalos. Alanos. Agiulfo. Andeca. Carriarico. Eborico. Hermerico. Malarico. Miro. Remismundo. Requiario. Requila. Teodemundo.
No hay comentarios:
Publicar un comentario