Xuan Carlos I

     Añu 1975. Franco muerre’l 20 payares y el 22 proclámase rei d’España Xuan Carlos I, ñetu d’Alfonsu XIII. El 19 d’avientu díctase l’entamu d’acuñación de moneda del nuevu xefe l’estáu y entamando a circular en 1976.

     Cuatru series de pesetes s’acuñaron sol so reináu, hasta’l nacimientu del euru y en toes elles van apareciendo dellos cambios a la par que la sociedá española va madurando, por fin, dientro d’una vida democrática.

 Primer serie: La Preconstitucional (1975-1980)

     N’esta estaya les nueves monedes del rei convivieron coles monedes del dictador. Dafechu, les monedes mantuvieron les mesmes carauterístiques na so fabricación: aleaciones, pesu, módulu, etc… No primero que difirieron foi nel cambiu de la efixe nel anversu, agora diba ser la del rei Xuan Carlos I col so títulu de rey de España.

     Nel reversu, ensin embargu, nun diba haber cambios no concerniente al escudu nes monedes d’1 peseta, nin nel diseñu de los 50 céntimos. El cambiu d’escudu diba vese nes monedes de 5, 25 y 50 pesetes.

     Otra moneda que s’acuño de mou masivu pero de pocu recorríu, foi la de 100 pesetes cola efixe real pero con escudu franquista, asemeyáu al escudu de la vieya moneda de 5 pesetes de 1949.

 50 céntimos

1 peseta

5 pesetes

25 pesetes

50 pesetes

100 pesetes

Segunda serie: La del Mundial. España-82 (1980-1982)

     En 1980 España ye escoyía como sée del Mundial de Futbol de 1982, evento que foi aprovecháu pol Gobiernu pa facer dellos cambios nes monedes, reflexáos nel Real Decretu del 20 d’agostu de 1980.

     L’anversu nun sufre cambios, sigue la efixe’l rei col so títulu, salvo l’añu d’emisión grabáu nel exergu que pasa a ser el de 1980. 

     El reversu sufre’l cambiu más radical, pues aprovéchase pa troquelar dellos grabáos alegóricos del eventu a celebrar. Nel casu la peseta, aparte del grabáu del so valor nominal en grandes dimensiones, inda aparez un escudu franquista (denomináu preconstitucional dende l’aprobación de la nueva Constitución de 1977). Na moneda 100 pesetes aparecen les armes de los antiguos reinos despiezáos y faciendo un corru. 

     Los cantos mantienen inda les lleendes franquistes d’UNA GRANDE Y LIBRE nes monedes de mayor valor.

     No referente a les carauterístiques de les monedes, módulu, pesu, aleación… mantiénense igual que les anteriores (les de 5, 25 y 50 pesetes, pesen daqué menos).

50 céntimos

1 peseta

5 pesetes

25 pesetes

50 pesetes

100 pesetes

Tercer serie: La M coronada (1982-1990)

     Nuevos cambios pa la nueva serie; de mano, la peseta torna al so color primixéniu y, anque nun se fai de plata sinon d’aluminiu, dexa de ser la rubia y sustitúi l’escudu preconstitucional pol real. El cambiu de metal débese ente otres coses pola baxa resistencia al desgaste del cobre, asina como la carestía del mesmu, que facía que’l cospel de la peseta fuere más caru que’l valor facial de la moneda. Sigue conservando’l mesmu módulu.

     Les monedes de 5, 25 y 50 pesetes recuperen el reversu de la primer serie. Acúñase tamien una moneda de 2 pesetes por primer y única vez, asina como un nuevu valor, el de 200 pesetes. Aparecen tamien nuevos diseños pa les monedes de 10 y 100 pesetes. La moneda de 50 céntimos ya nun tenía sen, polo que foi desaniciada.

     A partir d’esta serie desaparecen les estrelles de la ceca madrilana coles feches d’acuñación; a partir d’agora toles monedes llevarán una M coronada como marca de la moderna Fábrica Nacional de Moneda y Timbre-Real Casa de la Moneda (FNMT-RCM); asina mesmo, la fecha impresa nel exergu pasa a ser la d’acuñación y non la d’emisión.

1 peseta

2 pesetes

5 pesetes

10 pesetes

25 pesetes

50 pesetes

100 pesetes

200 pesetes

Cuarta serie: Los nuevos diseños (1989-2001)

     N’esta cabera serie de pesetes desaparecen definitivamente tolos vestixos franquistes nes acuñaciones (ya yera hora...). Realmente faise un cambiu radical en toles estayes: aleaciones, medides, diseños… ya inclusu’l rei pierde’l protagonismu en delles monedes en favor de les Comunidáes Autónomes y capitales de  provincia, asina como dellos personaxes destacaos de la historia d’España u obres d’arte españoles; poro, cada añu van acuñase monedes de dellos valores dedicaos a una comunidá, provincia, eventu (Barcelona y Sevilla 92) u obra d’arte, cuasi como si foren monedes conmemoratives ideales pal colleicionismu.

La última peseta

     Destaca l’acuñación d’una moneda d’1 peseta de tamañu bien reducíu y refugada polos medios de comunicación, a lo que’l direutor de la FNMT retrucó-yos: “¿Qué quieren ustedes por una peseta?” dáu ya el so escasu valor.

  Colleicionable de 5 pesetes

     Toles monedes de 5 pesetes acuñaes durante esti periodu mantienen les mesmes carauterístiques no referente al pesu, módulu, aleación... difiriendo nel añu d’acuñación y el diseñu de los anversos y reversos, dedicaos a delles Comunidaes Autónomes y al Añu xacobéu de 1993, aparte de otra (1989-2001), con un anagrama real  de tipu mironianu.

1989-2001 (Anagrama real)

1993 (Añu Xacobéu)

1994 (Aragón)

1995 (Asturies)

1996 (La Rioxa)

1997 (Islles Balears)

1999 (Murcia)

Colleicionable de 10 pesetes

     Toles monedes de 10 pesetes acuñaes durante esti periodu mantienen les mesmes carauterístiques no referente al pesu, módulu, aleación... difiriendo nel añu d’acuñación y el diseñu de los anversos y reversos, dedicaos a personaxes del arte y el pensamientu, salvo una moneda inicial (1992-2000) que sigue los patrones ordinarios.

 

1992-2000






1993 (Miró)






1994 (Sarasate)

1995 (Quevedo)
 

1996 (Pardo Bazán)

 1997 (Séneca)

Colleicionable de 25 pesetes

     Toles monedes de 25 pesetes acuñaes durante esti periodu mantienen les mesmes carauterístiques no referente al pesu, módulu, aleación... difiriendo nel añu d’acuñación y el diseñu de los anversos y reversos, dedicaos a los acontecimientos del añu 1992 (Espo de Sevilla y Olimpiaes de Barcelona) asina como a delles Comunidáes Autónomes. La del 2000 ye pal rei y el Toisón d’Oru.

    

     Destaca un furacu central semeyando al de los 25 y 50 céntimos de Franco.

1990-91 (Xuegos Olímpicos Barcelona 92)

1990-91 (Xuegos Olímpicos Barcelona 92)

 1992 (Espo Sevilla 92)

1992 (Espo Sevilla 92)

1993 (Euskadi)

1994 (Islles Canaries)

1995 (Castiella y Llión)

1996 (Castiella La Mancha)

1997 (Melilla)

1998 (Ceuta)

1999 (Nafarroa)

2000

Colleicionable de 50 pesetes

     Toles monedes de 50 pesetes acuñaes durante esti periodu mantienen les mesmes carauterístiques no referente al pesu, módulu, aleación... difiriendo nel añu d’acuñación y el diseñu de los anversos y reversos, dedicaos a los acontecimientos del añu 1992 (Espo de Sevilla y Olimpiaes de Barcelona) asina como a dellos monumentos y personaxes históricos, salvo una moneda del 98 que sigue los patrones ordinarios.

     Destaca’l diseñu del cantu la moneda, llisu y con siete ranures fondes, idegáu pa les persones ciegues. Años más tarde foi copiáu nes monedes de 20 céntimos d’euru. Dende entós esti diseñu conozse col nomatu de Flor Española.

 1990 (Espo Sevilla 92)

 1990 (Espo Sevilla 92)

1992 (Xuegos Olímpicos Barcelona 92)

1992 (Xuegos Olímpicos Barcelona 92)

1994 (Munumentos de Cantabria)

1995 (Monumentos de Madrid)

1996 (Felipe V)

1997 (Xuan d'Herrera y L'Escorial)

1998-2000

Colleicionable de 100 pesetes

     Toles monedes de 100 pesetes acuñaes durante esti periodu mantienen les mesmes carauterístiques no referente al pesu, módulu, aleación... difiriendo namás que nel añu acuñación y el diseñu de los reversos (la del 93 tamién l’anversu), dedicáes a dellos acontecimientos asina como a dellos monumentos, salvo un par d’elles que siguen los patrones ordinarios.

1992

1993 (Camín de Santiago)

1994 (Muséu del Prado)

1995 (F.A.O.)

1996 (Biblioteca Nacional)

1997 (Teatru Real)

1998-2000

 1999 (Añu Internacional de les Persones Mayores)

2001 (Cabera emisión de la peseta)

Colleicionable de 200 pesetes 

     Toles monedes de 200 pesetes acuñaes durante esti periodu mantienen les mesmes carauterístiques no referente al pesu, módulu, aleación..., difiriendo nel añu acuñación y el diseñu dellos anversos y reversos, dedicaos al arte en xeneral o personaxes relevantes españoles asina como a la capitalidá cultural europea de Madrid. Destaca l’anversu de dalgunes, onde van troquelaos xuntos el rei y el príncipe herederu.

 1990 (La Cibeles)

1991 (Madrid Capital Cultural Europea)

1992 (Madrid Capital Cultural Europea)

1992 (Madrid Capital Cultural Europea)

1993 (Xuan Lluis Vives)

1994 (Mayestros de la Pitura Española)

1995 (Mayestros de la Pitura Española)

1996 (Mayestros de la Pitura Española)

1997 (Xacintu Benavente)

1998-2000

Les monedes de 500 pesetes 

     Emitiéronse, por primer vez, namás que dos tipos de  monedes de 500 pesetes coles mesmes carauterístiques, difiriendo namás que nel añu acuñación y el diseñu de les cares, onde van troquelaos xuntos el rei y la reina. Les diferencies son casi inapreciables, la segunda moneda suaviza más les llínies de les imáxenes troqueláes y aparez nel reversu un círculu estriáu onde pue vese el logu de la ceca según lu posicionemos. L’aparición d’aniellos entellazáos nel cantu débese a qu’esta moneda foi acuñada en conmemoración de les bodes de plata de los reis españoles.

1987-90

1993-2000

Monedes de 2000 pesetes… de cursu llegal

      Anque ya s’acuñaren monedes conmemoratives nos años anteriores del so reináu, ye a partir de 1989, coincidiendu cola cercanía del V Centenariu del Descubrimientu d’América, cuandu la FNMT entama a emitir colleiciones y acuñaciones conmemoratives de monedes con metales nobles (oru y plata) bien pa circulación llegal, bien como moneda esclusiva pa colleicionistes.

          Nel añu 1994, con motivu del aconceyamientu del Fondu Monetariu Internacional  y el Bancu Mundial en Madrid, acuñáronse les primeres monedes de plata de circulación llegal con valor de 2000 pesetes. Anque nun taben catalogáes como conmemoratives y podíen ser usáes nes transacciones ordinaries del dia a dia, foron atropáes esclusivamente por colleicionistes ya que la mayoría de la xente desconocía que pudieren pagar con ella, veíenla más bien como un oxetu de colleición.

     Hai que tener cuidao porque tamién s’acuñaron monedes con valor facial de 2000 pesetes pero esclusives pa colleicionistes y numismáticos, son le denomináes de calidá proof o preba y dixébrense de les anteriores pol tamañu, pesu y calidá de la so factura (asemeyen espeyinos rellumantes frente a les otres que son mate, ensin brillu).

1994 (Aconceyamientu en Madrid del FMI y el BM)

1995 (Presidencia española del Conseyu de la XE)

1996 (250 aniversariu del nacimientu de Goya)

 1997 (450 aniversariu del nacimientu de Cervantes)

1998 (400 cabudañu de Felipe II)

1999 (Añu Xubilar Compostelanu)

 2000 (V centenariu del nacimientu del emperador Carlos V)

2001 (Cabera emisión de la peseta)

     El 19 xunu de 2001, acuñose la última peseta, concretamente la moneda de 100 pesetes que lleveba grabada nel reversu la mesma figura d'Hispania que la peseta de 1869.

Hispania 1869-2001