 |
| La reina rexente |
El fiu póstumu d’Alfonsu XII foi proclamáu rei namás nacer el 17 mayu del
1886. So má, Maria Cristina d’Habsburgo-Lorena, exerció la rexencia hasta que’l
rapaz algamó los 16 años y asumió los sos Poderes de Gobiernu. Reinó hasta’l 12
d’abril del 1931. Dos díes más tarde, proclamose la II República.
A pesar de los años de rexencia de so má, toles monedes acuñaes durante’l
so reináu lleven el bustu d’Alfonsu XIII, polo qu’aparecen cinco series dixebres según diba creciendo’l neñu-rei.
La primer
serie conozse en numismática como la del Pelón ya qu’aparez el bustu del rei-bebé
con un añu d’edá (enantes, aún se seguíen acuñando monedes de so pá, nes
estrelles aparecen les feches d’acuñación de 1886 y 1887. (Ver Alfonsu XII).
La segunda
serie, nómase de los Bucles, por salir un rei de seis años col pelu rizáu.
La tercer
serie lleva un rei con 10 años y un flequillu a lo
xole, conozse como la del Tupé.
La cuarta
serie ye la de un xoven rei de 16 años uniformáu,
nomándose la del Cadete.
Y pa finar, la quinta serie col rei adultu, 26 años, y como capitán xeneral. N’esta estaya aparecen
monedes ensin bustu real, coincidiendu col periodu de la Dictadura de Primo de
Rivera.
Hasta 1897 acuñáronse tamién monedes pa les colonies d’ultramar de
Filipines y Puertu Ricu. Tres la guerra de 1898 escontra los Estáos Xuníos,
estes colonies pasen a ser controlaes polos gringos
xuntu con Cuba, desaniciándose asina los retayos del antíguu Imperiu español.
Primer serie: El Pelón
(1887-1892)
 |
| Fonsín el pelón y so má |
Gregorio Sellán foi l’encargáu del diseñu
del bustu del rei bebé. Acuñáronse, de mou masivu, monedes de 5 pesetes;
acuñáronse tamién monedes d´oru de 20 pesetes en llugar de les de 25,
cumpliendo asina col Decretu de 1868 basáu nes direutrices marcaes pola Xunión
Monetaria Llatina.
Segunda serie: Bucles
(1892-1894)
 |
| Fonsín el rizosín |
En 1891 Gregorio Sellán volvió a diseñar
l’anversu de les pesetes; esta vegada grabó un rei de seis años rizosín, gordín
y sanu como un coral. Una Real Orde del 17 d´agostu de 1891 reguló la so
acuñación, la qu’entamó al añu siguiente.
6.3 Tercer serie: Tupé (1896-1902)
 |
| 1901. 15 años |
En 1895 el grabador Bartolomé Maura
Montaner fexo un nuevu diseñu pa les pesetes tomando de referencia a un rei de
10 años con un mechoncín a lo xole. El nuevu troquel entamó a furrular nel añu 1896.
Ye la única serie del rei onde la Casa la Moneda acuña pieces d
’oru de 100 pesetes.
50 céntimos
1 peseta
6.4 Cuarta serie: Cadete (1903-1910)
 |
| Fonsu de cadete |
A partir de 1903 Bartolomé Maura diseñó un
nuevu bustu del rei como xoven cadete uniformáu, coincidiendo precisamente cola
fin de la rexencia de Mª Cristina y el pasu de poderes a la so persona. Ye
tamién la primer vez que s’acuñen monedes de cobre col valor d’1 y 2 céntimos cola
efixe d’esti monarca; una llei de 1881 nun permitía l’acuñación d’estes pieces
pola bayura d’elles que circulaben pel Estáu (y eso que nun s’acuñaren más
dende 1870); poro, retiráronse y fundiéronse monedes desgastaes pa sacar les
nueves.
3.814 foron les monedes de 20 pesetes
d’oru que s’acuñaron, un númberu testimonial. Les de 100 pesetes desaparecen a
partir de 1906 al ser sustituyíes por billetes del mesmu valor.
Quinta serie: Adultu (1910-1931)
 |
| El rei Alfonsu XIII |
Bartolomé Maura fexo una cabera actualización del bustu del rei, esta vegada ya
como home adultu y col uniforme de capitán xeneral.
Esti periodu dixébrase en dos estayes, dende’l puntu de vista numismáticu: una primer estaya tradicional, esto ye, acuñación de monedes col tipu de siempre: efixe real uniformada nel anversu y escudu real nel reversu. La segunda estaya refiérse a la Dictadura de Primo de Rivera, momentu nel que s’aprecien cambios radicales nos tipos de les monedes.
Les monedes del rei
(1910-1913)
Les emisiones foron bien probes, ya que namás que s’acuñaron monedes de dellos valores de céntimos.
1 céntimu
2 céntimos
50 céntimos
Acuñaciones durante
la Dictadura de Primo de Rivera (1923-1930)
El cambiu radical nos tipos de les monedes
puede apreciase en dos monedes de 25 céntimos, valor atípicu hasta agora, que
nun lleven bustu real nin marca de ceca, poro, ensin añu d’acuñación grabáu.
Atípicu ye tamién el tipu d’aleación usáu na so fabricación, cuproníquel. Como
yeren unes monedes que se desgastaben rápidamente, yera perfácil confundila
cola moneda de 2 pesetes, polo que nel segundu diseñu optose por face-y un
furacu en mediu. Dambes dos monedes foron diseñaes por José Espinós Guisbert.
A partir
d’equí, l’Estáu español ruempe colos cánones afitaos pola, ya desaniciada
n’Europa, Xunidá Monetaria Llatina. La carestía de los metales nobles (oru y
plata), asina como l’esbarrumbe de la economía europea tres la Gran Guerra,
faen que los estaos busquen nuevos materiales pa l’acuñación de moneda, dexando
ésta de tener un valor intrínsecu (el que-y daba el metal col que taba fecha)
pa tener un meru valor nominal (el grabáu na moneda). El pueblu ya nun podrá
ayalgar más que cobre (y pocu, que tamién andaba bien solicitáu).
Durante la dictadura de Primo de Rivera
acúñase tamién una nueva moneda de 50 céntimos (1926) grabada por Enrique Vaquer
Atienza n’estilu modernista cola efixe real ensin uniforme y un reversu con
escudu ovaláu y llixeramente diferente al tradicional.
Monedes d’ultramar (Filipines y
Puertu Ricu)
1898 nomose l’Añu del desastre. Na guerra
escontra los Estaos Xuníos, España perdía toles poques posesiones d’ultramar qu’inda
conservaba (Cuba, Puertu Ricu y Filipines). Hasta entós, entá dio tiempu a
acuñar delles monedes pa les colonies na ceca Madrid col bustu diseñáu por
Bartolomé Maura pa la tercer serie (la del tupé).
La marca de la ceca pa les colonies yera una estrella de cinco puntes.
La falta de numberariu menor nes Filipines fexo que la ceca de Madrid
sacare unes prebes con valor d’un y dos centavos cola idega de reabrir la ceca
de Manila, unviándo-yos los cuños diseñaos na metrópoli por Bartolomé Maura
(del la estaya del tupé, anque
retocáu llixeramente: tuvo qu’aplachá-y los pelucos pa qu’entraren na moneda). Estos
centavos, a pesar de traer estampáu l’añu 1894, foron acuñaos en 1896 y dellos,
pocos, llegaron a les islles en 1897 a causa de la cellebración del cumpleaños
de la reina rexente y repartios ente’l Cabildu y les más detacaes autoridaes.
El restu nin salió d’España por cuenta de los fechos de Cavite, entamu de la
fin del dominiu español nel archipiélagu. Otra vegada, la idega d’implantar la
peseta como divisa única del territoriu español, foi refugada.
Si bien los centavos nun cumplien nin tan siquier cola métrica de los
céntimos de peseta, la moneda d’un pesu si yera igual que la de les 5 pesetes
en toles sos dimensiones.
1 centavu
2 centavos
1 pesu
Monedes de Puertu Ricu
Les monedes de Puertu Ricu tamién foron llabraes na ceca Madrid, pero
identificaes con una estrella anepígrafa de 5 puntes, la mesma que la de Les
Islles Filipines. Otra vegada refugaron emplegar el valor en pesetes, salvo na
d’un pesu, onde aparecen igualaos los dos valores. Lo que sí respetaron foron
les dimensiones de les monedes, asemeyando los centavos mayores coles pesetes
menores y la d’un pesu col duru, y respetando tamién los diseños anversu/reversu
de les pesetes, esceutu la de 5 centavos, pieza que nun tién semeyanza ente les
pesetes.
.bmp)
No hay comentarios:
Publicar un comentario