Nómase asina a una moneda d’oru acuñada nos condaos de Barcelona y El Roselló por orde del conde Ferrán II (conocíu ente nós como Fernandu’l Católicu, el d’Isabel I de Castiella). Nes cortes catalanes de 1493, detácase la falta de monedes d’oru nel principat de Catalunya y la proliferación de falsificaciones, polo que, “Nós Don Fernandu, vistu’l poder a min atribuyíu por trés estamentos de la Corte Xeneral d’esti, nuesu Principáu de Cataluña, polo cual mos pertenez, con consentimientu y aprobación de diches Cortes. Primeramente pronunciamos declaramos y ordenamos que seya batida moneda oru finu de la llei del Ducáu y que se llame Principat” (del orixinal en catalán). El ducáu al que se refier la cita ye la moneda d’oru veneciana que taba sirviendo de referencia al restu territorios de la contornera a la hora llabrar les sos propies monedes. La Corona d’Aragón foi la primera n’introducir el ducáu en tierres hispániques, pa llueu introducilu en Castiella, de la man de los Reis Católicos, tres la Pragmática de Medina del Campo de 1497.
Los principats d’oru acuñáronse en valores de mediu, un, dos y diez, con una llei de 23 quilates y ¾ (unes 990 milésimes d’oru). Xenéricamente, el diseñu de los tipos diba basase nel bustu del conde pal anversu y les sos armes nel reversu ya incuyendo unes lleendes col so nome y títulos; ensin embargu, na práutica los diseños dixebrábense según el tamañu la pieza y l’añu acuñación.
Los principats barceloneses de Ferrán II
La pieza más pequeña ye la de mediu principat, d’unos 1,75 gramos de pesu y 16 milímetros de módulu. Nel anversu apaez el bustu del conde, mirando de llau y llindiáu pola lleenda FERDINANDVS D(EI) G(RATIA) REX. Pel reversu atopamos les armes de la corona d’Aragón ya identificatives tamién del Principat de Catalunya, coronaes y cola lleenda CASTELL(A)E ARA(GONIAE) CO(MES) BA(RCINONENSIS). O lo que ye lo mesmo, Fernandu pola gracia Dios rei de Castiella, Aragón y conde de Barcelona. Un primer diseñu ye más toscu y lleva lletres romániques, mientres que’l segundu ya ta un pocuñín más ellaboráu y con lletres gótiques, lo que mos fae pensar na esistencia de dos series na acuñación de los principats, como se verá na pieza de la unidá.
 |
|
Mediu principat románicu |
 |
|
Mediu principat góticu |
La pieza nomada principat yera la equivalente al ducáu venecián, con un pesu aprosimáu de 3,50 gramos y un módulu de 22 milímetros. Va ser la pieza más batida de tola serie, poro, la información grabada n’ella va ser más completa. Nel anversu, apaez el bustu del conde/rei cola so típica lleenda de Fernandu rei pola gracia Dios, pero col añadíu d’un pequeñu escudu heráldicu con un llión dientru y que identifica a Alfonsu Sánchez, Tesoreru Real ente 1488 y 1522. Nel reversu ye onde s’atopa el cambiu más radical; apaez l’escudu d’armes propiu de los Reis Católicos, coles enseñes de les corones de Castiella y Aragón, too ello llindiao pola consabida leenda consecutiva de la del anversu, Castiella, Aragón y conde de Barcelona. Na mayor parte de les acuñaciones, apaez una B como marca de ceca (delles vegaes, duplicada). La esistencia de dos series d’acuñaciones detácase equí pola ausencia nun de los casos, y la presencia nel otru, del escudu de Granada, lo que mos fae suponer que la primer pieza s’acuñare enantes de la reforma castellana de 1497.
 |
|
Principat ensin Granada |
 |
|
Principat con Granada |
La pieza de dos principats (o doble principat) pesaba unos 7 gramos y tenía un módulu aprosimáu de 28 milímetros. Al ser más grande, permitía abreviar menos les lleendes. Caltién l’anversu típicu del bustu real col escudu del tesoreru real y la lleenda de "Fernandu pola gracia Dios rei". El cambiu radical asitiase nel reversu, onde solo apaecen les armes de la corona d’Aragón y la lleenda ARAGONVM COMES BARC(INO)N(ENSIS), escluyendo equí a Castiella.
 |
| Doble principat |
La mayor tién valor de diez principats, con un pesu d’unos 35 gramos y 35 milímetros de módulu. Realmente, información al respeutu d’esta moneda nun hai; esta semeya ta sacada del cartafueyu d’Aureo y Calicó, pero nun apaez en nengún llistáu dixital pela rede, polo menos de los conocíos. Poro, lo identificable ye l’anversu col bustu de Fernandu cola lleenda indicativa de que ye rei d’Aragón, Sicilia y conde Barcelona. Lleva tamién la marca la ceca B. El reversu lleva los escudos de la corona aragonesa con unos xugos (seña d’identidá del rei) a los llaos. Precisamente na lleenda apréciase una referencia a ello: IVGVM MEVM SVAVO OSTETONVS MEVM LEVE (el mio xugu ye suave y la mio carga ye llixero).
 | |
|
Ferrán II del Roselló
El Roselló catalán siempres foi un territoriu codiciáu polos reis de Francia y Aragón. Xuan II, pá del católicu Fernandu, cediéralu en 1462 al rei de Francia, Lluis XI, a cambiu de qu’ésti lu sofitare na guerra de los remensas, alzamientu de los campesinos catalanes escontra los abusos señoriales. Tres décades de control francés, el Roselló vuelve a manes aragoneses tres la robla del tratáu de Barcelona de 1493 ente carlos VIII de Francia y el ya rei Católicu Fernandu II d’Aragón y V de Castiella. Ye per ello, seguramente, polo que los principats acuñaos en Perpinyà, capital del Condáu, lleven nel reversu grabáu l’escudu real coles armes de les corones de Castiella y Aragón. La lleenda repartía ente les dos cares, faen referencia al so nome y títulu, FERDINANDVS D(EI) G(RATIA) R(EX) C(A)S / TELE ET ARAGONUM COMES, o daqué aprosimao, ya qu’esisten dos variantes del tipu acuñáu. A dambos dos llaos del escudu apaecen dos PP como marca de la ceca.
 |
| Un principat. Tipu 1 |
 |
| Tipu 2 con roel tres la nuca |
Xuana y Carlos como condes de Barcelona y el Roselló
Xuana I y Carlos I d’Aragón, lleguen a Barcelona el 15 febreru de 1519 y convoquen les Cortes catalanes al día siguiente. Tres el discursu real inicial y les deliberaciones siguientes, los reis son xuraos como condes el 16 d’abril. Caltienen l’acuñación de principats tanto na ceca de Barcelona como na de Perpinyà (como condes del Roselló). Na barcelonesa acuñen pieces de mediu, ún, dos y cuatro principats y calteniendo les lligues y medíes aprovaes por Ferrán II.
Una primer acuñación de los medios principats fae referencia a Xuana (primero) y a Carlos como reis d’aragón y condes de Barcelona. Nel anversu apaecen les iniciales de los sos nomes y nel revesu les barres catalano-aragoneses
 |
|
Mediu principat. Tipu 1 |
Una segunda acuñación fae referencia n’esclusiva al so títulu condal.
 |
|
Mediu principat. Tipu 2 |
De la unidá del principat esisten un par de tipos onde apaecen los reis enfrentaos, nel so anversu, y titulaos como reis d’Aragón y condes de Barcelona. La diferencia de tipos asitiase nel reversu, apaeciendo nel primeru l’escudu de los domeños aragoneses (Aragón, Condáu de Barcelona y Reinu de les Dos Sicilies) y nel segundu l’escudu real heredáu de los Reis Católicos llindiáu pola marca la ceca B (dos vegaes). Detacar que nun apaez alusión nenguna al reinu de Castiella, nin al típicu “pola Gracia Dios”.
 |
|
Principat con escudu aragonés |
 |
|
Principat con escudu real |
Esisten delles variantes de la moneda del doble principat que van camudando a medía que lo va faciendo’l reináu d’esta singular parexa. La novedá n’estes monedes ye qu’apaez grabáu l’añu acuñación. El primer tipu acuñáu data del 1521. Nel anversu vense unos reis enfrentaos col cetru real nel centru y una allegoría al Toisón d’Oru enriba les sos tiestes y apaeciendo nel reversu l’escudu aragonés. No que se refier a les lleendes, lo típico, Xuana y Carlos reis d’Aragón y condes de Barcelona.
 |
|
Doble principat de 1521 |
 |
|
1531. Nuevu diseñu del escudu aragonés y marca de ceca BB |
 |
|
1532 con escudu real de Castiella y Aragón |
La pieza de 1536 ya vién con un notable cambiu nos grabaos. Siguen apaeciendo nel anversu los bustos enfrentaos de los reis, pero Carlos ya ostenta la corona d’emperador del Imperiu Sacru Romanu-Xermánicu (en 1520 foi escoyíu como emperador ellectu, pero nun foi coronáu pol papa hasta 1530). Y nel reversu grábase l’escudu real de Castiella y Aragón pero arropiáu pol aigla bicéfala y la corona zarriada, símbolos propios del títulu imperial. Esti escudu ya lu emplegare Carlos nos reales y escudos emitíos pa sufragar la so campaña militar en tierres arxelines y acuñaos en 1535 na propia ceca Barcelona.
 |
|
Doble principat de tipu imperial. 1536 |
 |
|
De 1542. Carlos con corona imperial, pero escudu castellán-aragonés |
La pieza mayor, de cuatro principats, detaca pola so alusión a les tierres americanes. Bono, realmente les Columnes d’Hércules y la lleenda PLVS VLTRA, yeren seña d’identidá propia de Carlos I, pero’l chisgu a les nueves provincies d’ultramar ye innegable. Ferrán II nun acuñare pieces n’esti valor, polo que siguiendo la norma impuesta pal tallaxe, estes monedes andaben polos 14 gramos de pesu y 38 milímetros de módulu.
 |
|
Cuatro principats PLVS OVLTRE (por VLTRA) |
Como condes del Roselló, acuñen moneda en Perpinyà d’un únicu valor de dos principats, del mesmu tipu que los barceloneses, con escudu condal, pero faciendo alusión na lleenda a los sos títulos de reis d’Aragón y condes del Roselló.
 |
|
Doble principat de 1522, ceca de Perpinyà |
Conde Felipe II de Barcelona
En 1556 Felipe II ye coronáu rei de Castiella y Aragón, poro, tamién conde de Barcelona. Ensin embargu, nun sedría hasta 1564 en que’l rei convocare Cortes nel Principat de Catalunya y asina xurar los Fueros y Privilexos del condáu barcelonés el primeru de marzu d’esi añu.
La peculiaridá de los principats del conde Felipe II ye que tan dedicaos a los Reis Católicos, los sos bisgüelos paternos. Acuñar moneda coles efixes de los Católicos foi de lo más normal durante los primeros años del so reináu, ya incluso durante tol reináu de so pá Carlos I, debío a la tovía bona fama que dexaren peles Cortes europées los sos escelentes. Cola Pragmática de la Nueva Estampa de 1566, los vieyos tipos dexarán d’acuñase y con ello, tamién los principats.
Los valores acuñaos pa estos caberos principats foron los de dos y 10 y con un mesmu tipu: nel anversu, los Reis Católicos enfrentaos y la lleenda FERNANDVS ET ELISABET REX ET REGINA y dexando pal reversu l’escudu real coles armes de Castiella y Aragón baxo una corona y arropiáu pel aigla de San Xuan, al que alude la lleenda SVB VMBRA ALA RVM TUA (Baxo la solombra de les tos ales).
 |
|
Doble principat |
 |
|
Diez principats |
Fontes:
Tratado de las monedas labradas en el Principado de Cataluña con instrumentos justificativos. Por el Doctor Don Josef Salat. Barcelona 1818
La heráldica monetaria castellana de Carlos I. Una afirmación de legitimidad dinástica y territorial. José María de Francisco Olmos.
Numismática española. Catálogo de todas las monedas emitidas desde los Reyes Católicos hasta Felipe VI. 1474 a 2020. Aureo y Calicó. Barcelona 2019
Numista.es. Monedes de Fernando II d’Aragón.
Facebook: Páxina La Corona d’Aragó. Artículu de Jordi plens.
Páxina Maravedis.net. Artículu de Victor Wild
Wikipedia: Fernando II de Aragón. Carlos I de España. Felipe II de España. Cortes de Monzón-Barcelona (1563)
No hay comentarios:
Publicar un comentario