2020: Jan van Eyck

 

Semeya: Eurocoin

Motivu conmemorativu: 630 Aniversariu del nacimientu del pintor Jan van Eyck 

Volume d’emisión: 155.000         Fecha d’emisión: 15 d’ochobre

 

     Johannes van Eyck (1390-1441) ta consideráu como ún de los meyores pintores del norte d’Europa del sieglu XV. Xunto colos sos hermanos y l’artista Robert Campin conformen l’embrión de la nomada Escuela Flamenca. Quicias la so obra más conocida seya’l polípticu de Gante, asitiáu anguañu na sée de Gante y más conocíu pol nomatu de El Corderu místicu, codiciáu, y robáu delles vegaes, asina como dellos intentos d’agresión y que llegó a tener un pequeñu papel protagonista na película americana Monuments Men cola so recuperación nuna mina sal nos caberos díes de la II Guerra Mundial; falta-y dende 1934 una tabla robada. Pero no que más destacó esti artista foi nes pintures a vírxenes y retratos, siendo’l Retratu de los esposos Arnolfini consideráu como la so obra cume.

 

     La moneda en sí ye un amestáu de dos obres del artista flamencu; per un llau, aparez un detalle del cuadru tituláu Retratu d’un home con turbante, fechu en 1433 y que nun ye otra que’l so autorretratu con un xapirón colos picos anudaos enriba la so tiesta (asemeyándose a un turbante árabe). Y per otru llau aparez la robla que l’artista dexó n’otra emblemática obra de so, el Retratu de Giovanni Arnolfini y la so muyer, fecháu nel 1434.

 

     Nel intre aparez la figura principal del retratu Home con turbante, xunto cola robla del artista. Al so llau hai uan paleta de pintor onde aparecen les iniciales del diseñador Luc Luycx, LL; vense tamién la marca de la ceca  d’Utrech (Países Baxos) y la de la  direutora de la ceca de Bruseles. Tres la nuca l’añu d’emisión 2020 (con un ceru floríu) y les iniciales del país emisor BE. Enriba’l diseñu lléese’l nome del homenaxeáu J. van Eyck

     Nel aniellu esterior, les doce estrelles de la Xunión europea.

     Como nota informativa pa los colleicionistes, indicar qu’esta moneda nun va ponese’n circulación, solo va poder mercase en coincard o calidá proof.

     Fontes: Numismática Visual (castellán)

                   Wikipedia: Jan van Eyck