N’abril de
1996 el Conseyu d’Asuntos Económicos y Financieros de la Xunión Europea
(ECOFIN) alcordó les carauterístiques comunes que debíen tener toles monedes de
la nueva divisa. Alcordose tamién que les monedes diben tener una cara común
(reversu) cuyu diseñu corría a cargu del mesmu ECOFIN xunto a la Comisión
Europea, y una cara nacional (anversu) pa cada miembru diseñada polos bancos centrales de
cada país.
El
primeru de xineru de 2002, namás comer les uves y deseamos Feliz Añu Nuevu, ya
pudimos entamar a pagar con euros. En total, 12 países de la Xunión Europea
compartieron esti añu moneda: Alemaña, Austria, Bélxica, España, Finlandia,
Francia, Grecia, Irlanda, Italia, Luxemburgu, Países Baxos y Portugal.
Hai que sumar tamién
a otros paises fora de la XE qu’emiten tamién moneda euru col permisu de la XE:
Mónacu, Ciudá del Vaticanu y Sanmarín.
Otros paises q’usen la nuesa divisa pero nun la emiten:
Kosovu y Montenegru.
Carauterístiques de la divisa
L’euru dixébrase
en cien céntimos. Los documentos oficiales de la XE usen les abreviatures euro y cent, siempres en singular ya ensin puntos. Na fala coloquial, ensin
embargu, tórnase cent pol semeyu en cada idioma (n´asturianu céntimu, en griegu
λεπτό, n´italianu centésimo, etc.) y fai el plural según l’usu habitual de la
llingua emplegada. Pal euru, lo mesmo (ευρώ en griegu, евро en búlgaru, ewro en maltés)
Les monedes -d’1, 2, 5, 10, 20 y 50
céntimos y 1 y 2 euros- tienen el mesmu reversu en tolos países, pero distintu
anversu (cara nacional). De toles maneres y a pesar d’esti anversu propiu de
cada país emisor, los euros tienen validez en cualisquier país de la eurozona.
El logu (€)
El símbolu del euru (€), desarrolláu pola
Comisión Europea, inspírase na lletra épsilon (ε) del alfabetu griegu. Escoyose
esti símbolu como referencia a la inicial d’Europa, E. Les dos llínies
paraleles fain referencia a la estabilidá dientro la zona euru.
L’abreviatura
internacional oficial pal euru ye EUR
y ta rexistrada na Organización Internacional de Normalización (ISO); utilízase
con fines empresariales, comerciales y financieros.
Nun esiste un
símbolu oficial pal céntimu, pero úsase a menudu una c minúscula o, como
n’España, ct (plural cts) n’alcordanza del céntimu de la peseta. N’Irlanda
úsase delles vegaes nes tiendes el símbolu ¢.
Tabla de dimensiones
Les monedes
tamién tienen unes dimensiones específiques pa cada valor.
El reversu común
nes monedes del 2002
Pal diseñu de la
cara común l’ECOFIN y la Comisión Europea convocaron un concursu públicu a
nivel européu. La norma del diseñu yera bien cenciella: la moneda ha de llevar
el so nome oficial (euro, euro cent) y la denominación (valor facial)
orientándose’l diseñu haza un d’estos tres temes: Arquiteutura y estilos decorativos; Obxetivos ya idegales de la XE; La
identidá d’Europa. De los 36 diseños recibíos, un grupu d’espertos escoyíos
pol d’aquella secretariu xeneral de la Comisión Europea, barón David
Williamson, amenorgaron a 9 el so númberu, presentándolos llueu a los ciudadanos
pa qu’éstos escoyeran el que más -yos prestare.
El diseñu ganador de la cara
común de les monedes ye obra de Luc Luycx de la Real Fábrica de Monedes de
Bélxica, y nada menos que col 64% de los votos.
Decantose’l belga pol tema La Identidá d’Europa y, casualmente,
el so diseñu foi l’únicu qu’incluyía un mapa d’europa. Ensin embargu, el diseñu
camuda un migayu en función del valor nominal que represente y al material usáu
pa la so fabricación, polo que falaríemos realmente de tres diseños.
Toles monedes van cola firma’l diseñador,
una doble L estilizada.
El diseñu pa les
monedes d’1, 2 y 5 céntimos
Les monedines d’1,
2 y 5 céntimos son d’aceru recubiertu de
cobre (94,35% d’aceru), d’ehí esi color rubiu rellumante cuando ta recién
la moneda y que s’escurez col pasu del tiempu. Na cara común apaez Europa (solo los 15 países de la XE nel 2002) centrada na moneda, con
parte d’África y Asia nun globu terráqueu atravesáu por 6 llínies qu’emparexen les 12
estrelles de la XE; el valor nominal de la moneda va seguío de la lleenda EURO
CENT. La firma del diseñaor, a mandrecha’l mapamundi. El cantu ye llisu nes
monedes d’1 y 5 céntimos; na de 2 céntimos el cantu ye llisu con una
ranura paralela al cantu.
El diseñu pa les
monedes de 10, 20 y 50 céntimos
Les monedes de 50, 20 y 10 céntimos
tan feches con una aleación denominada oru
nórdicu, mui d’acordies col so color doráu y que nun ye otra cosa q’un
amestáu de metales na proporción: 89% cobre; 5% aluminiu; 5% zinc y 1% estañu.
Na cara común apaez la Xunión europea
enantes de l’ampliación del primeru de mayu de 2004 coles llendes bien definíes
y atravesada por 6 llínies qu’emparexen les 12 estrelles de la Xunión; el valor
nominal de la moneda lleva embaxo la lleenda EURO CENT. La firma del diseñador,
a mandrecha’l valor facial. El cantu nes monedes de 10 y 50 lleva un estriáu gruesu que’n numismática denomínase cantu festoneáu. El de la de 10 céntimos ye llisu con 7 ranures mui
grueses y que ye nomáu flor española.
El diseñu pa les
monedes d’1 y 2 euros
Les monedes
d’euru propiamente diches pertenecen a un grupu de monedes denomináu bimetáliques, lo cual queda n’evidencia
namás veles. Estes partes bien definíes denomínense centru, pal intre y aniellu pa l’esterior. Más que nada pa diferenciales un pocu, les aleaciones d’ambes dos
partes s’intercambien nes monedes según su valor facial; asina, el centru de la
moneda d’1 euru y l’aniellu de la de 2 tan fechos de la mesma aleación de
cobre-níquel. Y a la inversa, l’aniellu de la d’1 euru y el centru de la de 2
lleven tres capes: níquel-latón (aleación metálica de cobre y zinc), níquel, y
latón-níquel. Na cara común apaez la Xunión europea enantes de l’ampliación del
primeru de mayu de 2004 coles llendes bien definíes y atravesada por 6 llínies
qu’emparexen les 12 estrelles de la XE; el valor nominal de la moneda va seguío
de la lleenda EURO. La firma del diseñador, a mandrecha so la O d’euro. El cantu de la moneda d’1 euru lleva un
estriáu discontínuu con 29 ranures cada grupu d’estríes, y el de la de 2 ye
estriáu contínuu y con lleenda grabada (que varía según el país).
Cambios na cara común (2008)
Cuandu l’euru
entró nel 2002 nes nueses carteres, la XE taba formada por quince paises, doce
de los cuales entamaron a emitir la nueva moneda, aparte de los 3 microestaos
fora la Xunión. Nel 2004 entraron diez nuevos miembros, de los cuales cinco
entamaron a emitir euros.
Nel 2008, los
países na XE yeren 27, de los cuales 17 teníen como divisa nacional l’euru. Nel 2014 son 18
los países con divisa euru de los 28 y un nuevu microestáu fora de la XE.
L’aumentu de
miembros del 2004 fexo que
s’aprovaren unes modificaciones pa les monedes, en concretu nes monedes de 10,
20 y 50 céntimos, 1 y 2 euros; modificaciones por ciertu que’l públicu en
xeneral nin alvirtió.
Les
modificaciones lleváronse a cabu na cara común, esto ye, na representación
gráfica d’Europa nes monedes. El primer
cambiu ye’l que sustitúi el mapa grabáu del 2002, nel que solo salíen representaos
los países miembros de la XE daquella, por un mapa completu d’Europa. El
segundu cambiu ye que tamién desapaecen les llendes nacionales qu’apaecíen
nos céntimos doraos, tresmitiendo asina una idega de mayor xuntanza ente
europeos. Como remate, los contornos de la moneda tan más suavizaos.
Una curiosidá:
Dao que na cara común de los euros tienen de venir grabaos tolos países
europeos a escala reducida y dao que’l tamañu de Malta ye mínimu comparáu col
restu paises y poro, que la so representación a escala yera inviable, optose por desaxerar la so escala frente al restu (casu únicu).
Otru detalle ye
qu’Islandia nun aparez. Quicias dientro d’unos años, si la islla entra na XE y
aceuta l’euru, veamos otru cambiu nel diseñu.
Esti cambiu foi
obligatoriu pa toles acuñaciones d’euros que se fixeron a partir del 2008
p’alantre. Eslovenia, qu’entamó a emitir euros nel 2007, ya aplicare la nueva
norma esi mesmu añu, xunto a dellos países: Alemaña, Bélxica, España,
Finlandia, Francia, Grecia, Irlanda, Luxemburgu, Mónacu y los Países Baxos. El
restu, Austria, Italia, Portugal, Sanmarín y la Ciudá del Vaticanu, fixéranlo
nel 2008, a la par que los nuevos estaos incorporaos al euru: Malta y Xipre.
Comparativa ente les
cares
Les monedes d’1,
2 y 5 céntimos nun sufren cambiu debío a que’l so grabáu (a pesar de que’l mapa
d’Europa reflexa solo la Europa de los quince) féxose cola
idega d’asitiar el nuesu continente nel globu terráqueu; poro, la Comisión
diolo por bonu.
Equí podemos ver
los cambios:
