2024: Serie Familia Gran Ducal: Gran duque Guillermu II

 

Semeya: collectorcoins

Motivu conmemorativu: 175 cabudañu del gran duque Guillermu II

Tirada: 127.500           Fecha d’emisión: 29 xineru

 

     Gullermu Federidu Xurde Lluis (1792-1849) rei de los Países Baxos y gran duque de Luxemburgu dende 1840. Con tres años tuvo de fuxir cola so familia a Inglaterra, tres la invasión del so país poles tropes revolucionaries franceses. Años más tarde, colaría pa Berlín, Prusia, llugar d’orixe de so ma, la reina Guillermina, fiya del rei Guillermu Federicu II de Prusia. Ellí entamaría la so formación militar, sirviendo nel exércitu prusianu y que completaría cola so formación académica na Universidá d’Oxford, Inglaterra. Integráu nel exércitu británicu, lluchó na Península Ibérica escontra los exércitos napoleónicos a les órdenes del duque de Wellington. En 1813 tornaría al so país tres recuperar so pá el tronu neerlandés. En 1815 participó na batalla de Waterloo, onde resultó feríu. En 1816 cásase cola fiya menor del zar de Rusia y en 1817 naz el so primer fíu. N’esti periodu reside’n Bruseles, onde ta bien consideráu, lo que –y permite algamar un bon alcuerdu diplomáticu colos revolucionarios belgas de 1830, plan que frayó so pá y que lu llevó a un enfrentamiento militar del que nacería un nuevu estáu nomáu Reinu de Bélxica. En 1840 xube al tronu tres l’abdicación de so pá y en 1848, temerosu d’un españíu revolucionariu n’Amsterdam, entama’l procesu democratizador del país, xurando en 1849 el primer gobiernu parllamentariu neerlandés, unos meses enantes de la so muerte.

     Nel intre la moneda apaez la efixe de So Alteza Real el gran duque Henri xunto a una pose ecuestre del gran duque Guillermu.  Riba, el so títulu real apaez en luxemburgués, GROUSSHERZOGE VU LËTZEBUERG, que fai tamién referencia al  país emisor, xunto col so nome, GUILLAUME II colos años de nacencia y muerte 1792-1849. Abaxo, l’añu emisión 2024 y un estilizáu 175, como seña del cabudañu y la marca de la diseñadora Chiara Principe. Tres la nuca d’Henri, les marques de ceca y direutor o grabador de la mesma (monedes acuñaes tanto en Francia como nos Países Baxos, poro, ca una cola so identificación).

 

Fontes: Numismática visual (castellán)

             Wikipedia: Guillermo II de los Países Bajos (castellán)

             Numista.es. 2 € 2024. Guillaume II, clásica o gofráu.