2022: Serie Bundesländer: Thüringen

 

Semeya: colectorcoins

Motivu conmemorativu: Estáu de Turinxa

Volume d’emisión: 30.000.000         Fecha d’emisión: 25 xineru

     Thüringen asitiase pel centru d’Alemaña, llindiando cola Saxonia, Babiera y Hesse. La so capital ye Erfurt. El so nome vien de los turinxos, tribu xermana afincada nel llugar allá pel añu 300. Tres la II Guerra Mundial, quedó baxu control soviéticu y formó parte de la RDA, onde los estaos federales foron disueltos. Tres la Rexuntanza alemana, tornó a ser estáu pero con llixeros cambios nes sos llendes.

 

     El castiellu de Wartburg asitiase nel cantu un precipiciu sobre la ciudá d’Eisenach. Foi declarú Patrimoniu de la Humanidá nel añu 1999, por ser un monumentu sobresaliente de la estaya feudal en Centroeuropa. Construyíu pel 1067, foi sée de los Gobernadores de Turinxa, asina como testigu de dellos fechos importantes pa la hestoria alemana ya europea. Como centru cultural cortesán, abeyugó pel 1207 un concursu trovadores de gran valía (¿l’aniciu d’Eurovisión?). Ellí tamién residió Isabel d’Hungría, canonizada pola ilesia católica como santa. El reformista Martín Luteru tuvo ellí refuxáu tres la so excomunión y Goethe pasaba ellí delles temporaes. Detaca tamién una xuntanza d’estudiantes en 1817, pa cellebrar la vitoria bélica escontra Napoleón y facer  un apellidamientu en pro d’una xuntanza alemana (polo que ta considerada, xunto al aconceyamientu de 1848, como semiente de la futura nación alemana).

 

     Con esta moneda fina la primer serie de los Länder alemanes (a traviés del so Patrimoniu de la Unesco) entamada en 2006. En total, 16 monedes por ca Estáu más una dedicada al Bundesrat, sée del Conseyu Federal Alemán y onde aconceyen tolos Länder. A partir del 2022, saldrá una segunda serie col mesmu patrón.

 

     Nel intre la moneda apaez una vista del castiellu xunto al precipiciu. So elli, el nome del länder THÜRINGEN y la lletra identificativa del país emisor, D. Riba, a manzorga, l’añu acuñación 2022 y, a mandrecha, la marca de la ceca y la marca del diseñador Olaf Stoy, OS (na muria).

     Nel aniellu esterior, les doce estrelles de la Xunión europea.

 

     Fontes: Wikipedia. Turinxa.

                                    Castillo de Wartburg (castellán)

                  Numismática visual (castellán)