Na numismática nun diba ser menos, y el
corderu va tener el so protagonismu. La representación del Agnus Dei nes
monedes ye estensible a tolos países y reinos europeos de base cristiana (por
muncho qu’anguañu la xente creya que la identificación nacional d’un país
frente a los sos enemigos ye un trapu collores, antanu, la única enseña identificativa
de los exércitos cristianos yera una cruz y puntu).
La primer representación del Agnus Dei nes
monedes foi n’una llimitadísima tirada del rei Æthelred II d’Inglaterra (968-1016)
allá pel añu 1009, según lo espubliza M. Ibáñez na revista El Eco Filatélico y Numismático (N. 1187; px. 44-45). Esti rei tuvo
serios problemes colos vikingos escandinavos y pela fecha de l’acuñación de la
moneda andaba a la griesca colos daneses, a los cualos tuvo que paga-yos un
fuerte tributu pa que lu dexaren tranquilu. Si queremos saber daqué más sobre
les monedes acuñaes por esti rei, Kate Willes espubliza na web History Today un
trabayín curtiu pero completu. Na moneda vese, nel anversu, al Agnus Dei cola
Biblia y la Cruz. Nel reversu vese una palomba como representación del Espíritu
Santu.
 |
| Agnus Dei d'Æthelred II |
El
rei danés Sweyn II (1019-1076) tamién emitió una moneda bien asemeyada a la del
inglés (de xuru que semeya de los tributos pagaos nel pasáu). Nun yera un res
raro que los símbolos relixosos suplantaren los rexos nes monedes, polo menos
n’una de les dos cares, poder relixosu y poder políticu diben bien amestaos o
agarradinos de la man durante tola Edá Media y yera un mou d’indicar a los
súbditos d’un reinu que’l so monarca taba sofitáu pola Ilesia, daqué
perimportante n’aquella estaya.
 |
| Agnus dei del rei Sweyn II |
Los sieglos XII y XIII foron bayurosos pa
esti tipu de moneda, quicias pola gran cantidá de campañes militares escontra
los “infieles” tanto per Palestina como pela Península Ibérica. Seya polo que
fuere, aparecen pieces con corderos en Bohemia, Nápoles, Sicilia, Namour, Saint
Guilles, Trípoli, Alsacia, Hungría, Silesia, Thienen y Meissen. La presente
semeya ye d’una acuñación de Raimundo II, conde de Trípoli (1115-1152); la so
estemada relixosidá nel tipu débese a qu’estes monedes acuñáronse cola fin de
sofitar les Cruzaes en tierres de Palestina.
 |
|
Agnus Dei del conde Raimundo II
|
Esta otra foi acuñada pol rei húngaru Bela IV (1206-1270), casualmente nun periodu bélicu escontra los mongoles, del cual
salió mal paráu, aunque depués –y tocó reconstruyir el so país tres la marcha
los invasores, pasando a la hestoria como´l “segundu fundador de la nación”.
 |
|
Agnus Dei de Bela IV
|
El cumal d’esta iconografía hai que
buscalu en Francia coles precioses Agnelsd’or o Moutons d’or (corderos
d’oru). Foi’l rei Louis IX, San Lluís (1214-1270) el que fincó les bases pa
emitir esti tipu de monedes dientro de la so reforma monetaria, aunque realmente
el primer Agnel d’or acuñáu del que
se tién noticies data del añu 1311 a cargu del rei Philippe IV (1268-1314).
 |
|
Agnel d’or de Philippe IV
|
Los caberos Moutons d’or acuñaos daten ya del sieglu XV y foron emitios pol rei
Charles VII (1403-1461). La so calidá y guapura fixeron qu’estes monedes
circularen per toa Centroeuropa y l’asemeyaran territorios de los Países Baxos,
Alemaña o Dinamarca. El tipu la moneda nun camuda en toa esta centuria llonga
d’esistencia: nel anversu, el corderu colos sos sacros atributos y allendáu
pola lleenda llatina AGN(US) D(E)I QVI
TOLL(IS)' PECA(TA) MV(N)DI MISERERE NOB(IS) (Corderu de Dios que quites
el pecáu del mundo ten piedá de nos). Nel reversu una cruz con flores de lis va
allendada pola lleenda XP’C° VINCIT° XP’C° REGNAT° XP’C° INPERAT (Cristu vence,
Cristu reina, Cristu ordena). Pa saber quién foi’l rei que l’acuñó, hai que
mirar so les pates del corderu, aú aparez l’abreviatura del monarca seguía del
títulu REX.
 |
|
Mouton
d’or de Jean II
|
Na Península Ibérica, del primer rei
qu’hai constancia de qu’acuñare moneda col corderu ye Xuan I de Castiella (1358-1390).
A diferencia del francés, l’Agnus Dei
castellán yera una blanca de vellón perprobe en plata acuñada espresamente pa
los pagos interinos del reinu, ya que’l rei –y debía perres a mamplen a Xuan de Gante, duque de Lancaster (unes 465.000 dobles) como compensación pa qu’esti
s’escaeciere de pretender al tronu del reinu de Castiella (el de Lancaster taba
casáu cola fía de Pedro I de Castiella, rei derrocáu y muertu pol pá de Xuan I,
Enrique II de la casa Trastámara). Pa facer frente a esti pagu, hebo de retirar
tol oru circulante y suplilu cola blanca, lo que nun –yos prestó un res a los
sos súbditos. Aparte, la fía del supuestu pretendiente, Catalina de Lancaster,
debía casase con Enrique, fíu de Xuan I y herederu al tronu castellán. D’esti
alcuerdu sal un fechu trescendental pa la historia d’Asturies: Lancaster
introdució equí el títulu de príncipe pal herederu de la corona castellana a
imaxe de la inglesa, ellos teníen al príncipe de Gales y nos tendríemos al
príncipe d’Asturies (el Principáu, coles sos rentes, pasaba a ser patrimoniu
esclusivu del herederu) poro, el primer príncipe d’Asturies sedría Enrique de
Trastámara, futuru Enrique III.
Les blanques de vellón que s’acuñaren
hasta la fecha polos anteriores reis de Castiella, teníen un valor afitáu a 10
dineros, o lo que ye lo mesmo, valien un maravedí. Los Agnus Dei de Xuan I salieron
col mesmu valor, pero como la cantidá de plata emplegada na aleación yera
inferior en cantidá, nun –y quedó otra al rei que rebaxar el valor nun 40 %,
poro, nes Cortes convocaes en Briviesca n’avientu de 1387, hebo que rebaxalu a
6 dineros, o seya, 1/6 de maravedí (por ciertu que foi n’estes Cortes aú
nomaron al primer príncipe d’Asturies).
 |
|
Blanca
de Xuan I. Ceca de Burgos
|
Anque nun apareza’l nome’l rei, sí aparez
la so inicial coronada o monograma (Y de Yoanes, Xuan) nuna de les cares
allendáu pola ya conocida lleenda ANGVS DEI QVI TOL(L)IS; la otra cara, por
supuestu, ye pal corderín colos sacros atributos y la otra parte la lleenda PECATA
MVNDI MISE(RERE NOBIS). Foi una moneda de la que se batieron munches y en
delles ceques castellanes: Burgos, Córdoba, Coruña, Lleón, Segovia, Sevilla,
Soria, Toru, Toledo y Zamora. Les marques de diches ceques van grabaes na moneda, normalmente al llau del
monograma real.
Con Enrique III de Castiella (1379-1406),
la moneda ya diba bien desfasada, mentanto que pa la facienda real seguía
valiendo 1/6 de maravedí, a la hora mercar con ellos el valor cayía a 1/3. Cola
xente gafo, nun hebo otru remediu que depreciala hasta’l valor d’un cornáu de moneda vieya, según una
Disposición del 22 de xineru de 1391. Esi mesmu añu les Cortes aprobaben
llabrar nueva moneda según la moneda vieya; la depreciación de la blanca traxo
l’apreciación de la moneda d’oru y plata.
Xuan II de Castiella (1405-1454) sedría l’últimu
rei n’emplegar esti tipu de moneda, de la cual nun acuñó por muncho que se llea per dayures.
Una vez finada la Edá Media (y les guerres
ente cristianos y otres relixones, pa pasar a lluchar ente ellos mesmos)
l’Agnus Dei práuticamente desaparez como sínbolu identificativu nes monedes,
salvo dalguna curiosidá contemporánea:
 |
|
1 céntimu d’Andorra (2002)
|
Fontes:
Blognumismatico.com (Ruiz Calleja, Adolfo). “ElAgnus Dei en las monedas”
(en castellán) onde aparez la referencia: M. Ibáñez na revista El Eco Filatélico y
Numismático (N. 1187; px. 44-45)
Numismático (N. 1187; px. 44-45)
Maravedís.net. “Blanca del Agnus Dei de Juan I” (en castellán)
Kate Willes. History Today. “The Coins of Æthelred the Unready” (n’inglés)
Cgb.fr
numismàtica Paris (en castellán y francés)
Wikipedia:
Rei Æthelred II (en castellán)
Rei Sweyn II (n’inglés)
Raimundo II de Trípoli (en
castellán)
Rei Bela IV (en castellán)
Agnels d’or (en francés)
Rei Louis IX (en francés)
Rei Xuan I de Castiella (en
castellán)
No hay comentarios:
Publicar un comentario