Lituania (República)

Enllaz: 2 euros conmemorativos lituanos

Primer serie (2015- )

     A pesar d’entrar na familia del euru el primeru de xineru del 2015, Lituania siempre foi per delantre comparada coles sos vecines. Nel 2002, namás entrar a circularla nueva moneda, ya teníen afitáu’l tipu de cambiu definitivu pa col euru (y eso que nun entraron na Xunión Europea hasta’l 2004). Una vez dientro, fixose la so entrada na divisa europea pal 2007, pero una bayura problemes, principalmente económicos (con una inflación descomanada ente otres coses) fexo que’l so ingresu fuere retrasándose añu tres añu hasta’l 2015. Ellos, tan previsores, ya teníen los diseños de los tipos de les sos monedes dende’l 2004 ¡tres una encuesta popular! (ya-y dieron, ya). Tantu corrieron que nel añu de la so hipotética entrada (2007) ya teníenacuáes unes 10.000 pieces (una tirada per piquiñina, pero suficiente pa ver les ganes de ser más europeos que teníen los lituanos).

    

      Lituania tién Casa de la Moneda propia (Lietuvos monetų kalykla). El so logu vién grabáu nes monedes a mou de monograma coles iniciales LMK allendáes por un círculu.

     El diseñu de les monedes ye obra del escultor Antanas Žukauskas y muestra l’escudu d’armes de la República de Lituania: un caballeru bien armáu d’escudu y espada engoláu nel so caballu, fincáu de los cuartos traseros y llistos dambos dos pa la grieca. Esti motivu conozse como Vytis y tiénse constancia de la so esistencia dende l’añu 1366, cuandu yera emblema del Gran Ducáu de Lituania. Sieglos más tarde la República de Lituania tomolu como seña d’identidá tres la so dixebra de la URSS en 1990. Poro, nun ye un res raro qu’esti guerreru seya una de les másimes identidáes nacionales de los lituanos y qu’ellis lu escoyeran como tipu pa los sos euros.

     Los diseños son práuticamente iguales; la dixebra tá nos fondos de les estrelles de la XE: mentantu que nos cobres el fondu ye nidiu, nos céntimos doraos ye un rayáu horizontal, que se torna a vertical nos euros. les pates del caballu sálense un pocuñín de les llendes del diseñu, pero como nun altera la distribución de les estrelles, pues como que lu damos por válidu. Pa finar, l’identificador del país ye’l so propiu nome en lituanu: LIETUVA. l’añu grabáu na impronta ye’l d’emisión (los primeros puestos oficialmente en circulación daten del 2015) y como ya diximos, tamién aparez la marca de ceca.

     Nel cantu la moneda de dos euros aparez la lleenda Llibertá, Unidá, Bienestar ente estrelles:

Enllaz: 2 euros conmemorativos lituanos