No referente al numberariu acuñáu por esta reina, que ye lo que braeramente nos importa, va vivise una estaya realmente revolucionaria; pasarase del sistema tradicional implantáu n’esti país en tiempu de los Reis Católicos y remocicáu según les modes del momentu polos Austria, pa ufrir llueu dellos cambios col primer Borbón, Felipe V, n’entamos del sieglu XVIII hasta estos tiempos nos que’l numberariu d’Europa diba adautándose a un nuevu sistema d’orixe francés nomáu Sistema Métricu.
Durante’l reináu d’Isabel II, el sistema
monetariu español va dixebrase’n tres estayes; la primera atropa los primeros
15 años del so reináu (1833-1848) y ye heriede direuta del sistema borbónicu.
La segunda estaya (1849-1865) tomará al real como unidá y entamará’l procesu de
cambiu al Sistema Métricu (dafechu, sufrirá un reaxuste en 1854, con mumberariu
nuevu incluyíu) el que será definitivu na tercer estaya (1865-1868) onde la
unidá monetaria sedrá l’escudu. Lo peor de too ye que, según diba camudando un
sistema por otru, les monedes del anterior nun diben desaniciándose, polo que’l
ciudadanu veíase furrulando con tres sistemes a la vez y calculando les sos
equivalencies; ¡menudu enguedeyu! A ello hai que suma-y la gran cantidá de
moneda estranxera (francesa, inglesa y portuguesa principalmente) que circulaba
pel país y que tamién tenía la so tabla equivalencies pal cambiu. Nun debemos
escaecer tampoco el numberariu acuñáu pa Catalunya (cuartos) y l’acuñáu pa les
colonies (Islles Filipines). Por suerte, too esto diba frayar cola llegada de
la peseta en 1869.
Primer numberariu 1833-1848
Períodu esti continuista al de so pá
Fernandu VII, nel que detaca non más que l’aprovación definitiva de la reforma
monetaria entamada en plena Guerra de la Independencia pol rei Xosé I tomando
como unidá de cuenta el real de vellón pa les monedes d’oru y plata; el cobre
emplegaríase pa batir maravedinos, afitando el so valor a 1 real de vellón
igual a 34 maravedinos. Como detalle, la vieya moneda del real d’a 8, conocía
col nomatu de Duru, ye suplía pola
moneda de 20 reales poro, el real d’a 8 afítase al valor de 20 reales de vellón.
Hai que tener en cuenta tamién qu’acaba d’españar
una guerra escontra’l so tíu Carlos por causa’l tronu, lo que provoca la
entrada de tropes estranxeres nel país (ingleses, franceses y portugueses) que
menudéen pel territoriu cola so propia moneda (llibres, francos y escudos) lo
qu’orixinó que’l Gobiernu afitare unos cambios pa estes divises en moneda
nacional; nun foi custión vana: si –y sumamos el períodu de la Guerra
d’Independencia y la entrada de les tropes franceses en 1823 pa restituir
l’absolutismu na persona de Fernandu VII, sumao too ello a la perda de les
colonies americanes y la so plata, ello fexo que pel estáu español la mitá del
numberariu circulante fuere estranxeru.
La qu’anguañu denominamos Primer Guerra
Carlista, fexo que se toviere qu’acuñar moneda de mou urxente pa poder pagar la
soldada de les tropes mercenaries isabelines, d’ello ocupose la ceca de
Barcelona, batiendo unes pieces de plata col pesu y llei de la de 4 reales,
pero a la que nomaron peseta, pues asina yeren conocíos los 4 reales en
Catalunya (con esti nome tamién acuñó nel so momentu y tamién n’esta ceca’l rei
Xosé I Bonaparte). A estos mercenarios se-yos reconoció lluéu col perconocíu
nomatu de peseteros.
 |
1 Peseta d’Isabel II (1836)
|
Aparte Barcelona, na España isabelina
furrulaben les ceques de Jubia/Xubia (A Coruña), Madrid, Pamplona, Segovia y Sevilla,
y la de Manila nes Islles Filipines.
A partir d’equí voi dexar un mensax claru:
en toles páxines web, asina como llibros especializaos na tema, aseguren que
tolos bustos aparecios nes dixebres pieces y tipos correspuenden a la reina
Isabel II y que van camudando según va creciendo la neña. Yo, que vos voi
decir, en 1835 Isabel tenía 5 años… a min nun me parez que dellos bustos nes
monedes seyan d’una neña, pero n’otros sí… Siempre creyí que los primeros
bustos nes monedes yeren de la so má Mª Cristina como rexente, pero va ser que
non. Poro, la clasificación voi facela como manden los cánones, la de les
monedes ye Isabel II.
Primer serie: la preconstitucional (1833-1836)
La reina vilda Mª Cristina asumió la
rexencia del reinu mientres la so fia nun algamare la mayoría d’edá. Pa fincar
a Isabel bien nel tronu y corta-y el pasu al so cuñáu Carlos, acombayó col
seutor lliberal pero calteniendo y dirixendo la xefatura del estáu al estilu
del so defuntu Fernandu VII. Poro, les monedes que s’acuñen n’esta estaya
sedrán una semeya del numberariu fernandín.
El cobre: Los maravedinos
Nacíu d’oru de la man del rei de Castiella
Alfonsu VIII allá pel añu 1173, el maravedí va morrer como puxarra cobre
n’estos tiempos cola reforma monetaria de 1848 (magar que realmente diba dexase
d’acuñar nel añu 1858, porque dicha reforma quixo ser revolucionaria, pero como
que nun cuayó). Eso sí, emplegáu foi emplegáu pol pueblu hasta’l nacimientu de
la nueva moneda, la peseta, en 1869.
L’aspeutu xeneral del tipu la moneda ye’l
mesmu que se diseñare en tiempos del rei Carlos III y emplegáu polos sos
sucesores, camudando eso sí, el bustu y títulu del monarca de turnu. Ensin
embargu, los maravedinos d’Isabel diben trayer la novedá de que toles sos
lleendes van dir escrites en castellán en perxuiciu del llatín, incluyíu’l
l’ordinal, que vién con númberu arábigu. Les ceques encargaes de diches
acuñaciones diben ser les de Xubia, Madrid y Segovia. Los grabadores de diches
monedes fueron Mariano González de Sepúlveda y Remigio Vega.
Nel anversu aparez el bustu de la reina y la lleenda
ISABEL 2ª POR LA GRACIA DE DIOS col añu d’acuñación. Nel reversu aparecen les armes del escudu hispánicu, esto ye, solo los
emblemes de Castiella y Llión, con escusón central de la Casa de Borbón del que
salen cuatro filigranes a semeyanza de cruz (dafechu, se-y conoz col nome de
Cruz de Don Pelayu); la lleenda esterna, REYNA DE LAS ESPAÑAS Y DE LAS INDIAS
col valor facial de la pieza (4 u 8 maravedinos) y la marca de la ceca (Xubia,
Madrid o Segovia). El cantu ye
estriáu.
4 maravedinos. Madrid y Segovia
8 maravedinos. Xubia, Madrid y Segovia
Les marques de les ceques n’estos maravedinos son un pocu particulares; a Segovia identificámosla pol so famosu acueductu, a Jubia pola inicial del so nome y a Madrid poles iniciales D.G. No referente a estes iniciales madrilanes esisten un par de teoríes nel mundín numismáticu; per un llau, la teoría xeneralizada ye que son propies del Departamentu de Grabáu, pero ente dellos estudiosos garra con más puxu que les sigles puedan pertenecer al ensayador de la ceca de Madrid José Duro Garcés. Seya d’ún o del otru, no que nun hai dubia ye de qu’identifiquen a la ceca Madrid.
La plata: El real
El real de vellón pasa a ser la unidá de cuenta del sistema monetariu español en llugar del maravedí col cambiu afitáu a 1 real de vellón igual a 34 maravedinos. D’aquel real d’a 8, dueñu y señor de los mercaos internacionales, queden namás que l’alcordanza y dos nomatos: Pesu pa los americanos y Duru pa los españoles. La perda de les colonies americanes foi un grave revés pa la llegada de plata a les ceques peninsulares, non en baldre, y como ya diximos, la mayor cantidá de moneda de plata que circulaba pel reinu español yera estranxero, principalmente francés, lo que yera un braeru enguedeyu pa la facienda hispana, ya que les fluctuaciones del dineru en dichos países incidía direutamente nos mercaos nacionales.
No referente al diseñu atopamos un anversu col bustu de la reina y la lleenda ISABEL 2ª POR LA GRACIA DE DIOS y l’añu d’acuñación. Nel reversu, la lleenda REYNA DE ESPAÑA Y DE LAS INDIAS, llindiando el típicu escudu de la monarquía hispánica, incluyía esta vez la identificación del reinu de Granada, coronáu y col collar identificativu del Toisón d’oru. A dambos dos llaos del escudu aparez el valor de la pieza. Llindiando al vellocín del collar apaercen la marca de la ceca y la de los ensayadores. Al igual que los maravedinos, los grabadores de les monedes foron Mariano González de Sepúlveda y Remigio Vega.
Barcelona, Madrid y Sevilla foron les ceques aú batieron la plata; les sos respeutives marques yeren les iniciales de la ciudá.
La primer moneda acuñada a títulu d’Isabel II foi la de 20 reales. Esta moneda yera la suplente del ya desaniciáu pero recordáu real d’a 8 o duru, iconu imperial y divisa internacional d’aú nació’l dólar USA. Foi acuñada solo en Madrid ente 1834 y 1836 y caltién les mesmes identificaciones nes cares col valor 20 RS. Nel cantu lleva la lleenda DIOS EL REY DE LOS REYES.
Les monedes de 2 reales caltienen los tipos de les anteriores, camudando
les marques de les ceques (foron acuñaos nel añu 1836 en Madrid y Sevilla) y el
valor 2 RS.
L’oru pasa a nomase real tamién
Nos vieyos tiempos del Imperiu la moneda
d’oru hispana yera conocía col nome d’escudu. La marcha haza una xuntanza
metrolóxica con Francia y el so sistema métricu, asina como la necesidá
d’afitar la unidá de cuenta española nel real, fexo que desapareciere esta
nomenclatura imperial y qu’a partir d’agora les monedes áurees tamién se
conozan como reales. El cambiu quedó afitáu a 1 escudu igual a 40 reales de
vellón, dalgo, que por ciertu, afitare ya Xosé I a entamos del sieglu XIX.
Ante la dificultá d’atropar oru que teníen
les ceques, l’únicu valor que s’acuñará n’esti períodu sedrá’l d’80 reales, dexando pa prau los
valores superiores de 320 y 160 reales. Poro, sedrá l’antígua moneda de dos
escudos, conocía col nomatu de Doblón,
la que se bata nes ceques de Madrid (1834-35-36) Sevilla (1835-36) y Barcelona
(1836) cola conocida lleenda nel anversu
d’ISABEL 2ª POR LA GRACIA DE DIOS.
No que se refier al reversu, recupérase l’escudu de Carlos III con ún central propiu de la monarquía hispánica y escusón de la Casa Borbón y allendáu polos escudos d’Aragon, Reinu de les 2 Sicilies, Austria, Borgoña Moderna y Borgoña antígua, Parma Farnesio, Toscana medicci, Brabante, Tirol y Flandes; coronáu y col collar del Toisón d’oru. Inclúi nel mediu campu el valor facial de la pieza; la marca de la ceca y la de los ensayadores, asina como la lleenda REYNA DE ESPAÑA Y DE LAS INDIAS arrodien el diseñu.
Les marques de la ceca, al igual que na
plata, van venir identificaes poles iniciales de la ciudá: Barcelona B, Madrid
M y Sevilla S.
Segunda serie: … Y la Constitución
(1836-1848)
La constante degradación de la política
española fexo que n’agostu de 1836 los sarxentos de la Guardia Real del Palaciu
de la Granxa n’Aranxuez s’amotinaren y obligaren a la reina rexente Mª Cristina
a poner en vigor la Constitución de 1812 y convocar Cortes Estraordinaries.
Estos fechos xeneraron una orde y un decretu llei qu’obligaron a facer dellos
cambios no que se refier al diseñu de los tipos de les monedes: aparez una
alusión a la Constitución y desaparez la referencia a les antígües colonies.
Nueva tirada de maravedinos
El primer cambiu atopámoslu nes lleendes;
nel anversu aparez l’añadíu
constitucional: ISABEL 2ª POR LA GRADIA DE DIOS Y LA CONSTITUCIÓN y nel reversu, desaparez la referencia a les
colonies americanes: REYNA DE LAS ESPAÑAS. Otru cambiu refierse a
l’asitiamientu del valor facial de la pieza, que pasa del reversu al anversu.
Otra novedá ye que s’acuña la serie completa de valores: 1, 2, 4 y 8
maravedinos nes ceques de Barcelona, Jubia, Madrid y Segovia. En Pamplona acuñaranse tamién en 1837 unes pieces d’8
maravedinos que valen de despedida d’esta ceca del reinu de Navarra (dafechu,
la reina Isabel ya nun se titula equí Reina
de Navarra, daqué que si fixeron tolos sos antepasaos, incluyíu so pá).
Hasta l’añu 1842 nun llegaron los punzones y les matrices pa les pieces d’un maravedí, poro, vemos equí un cambiu nel bustu: una perxoven reina que’n 1842 tién 12 años. Nel restu pieces, como na primer tirada, vemos un bustu qu’asemeya más una muyer (y en 1835 la reina tenía 5 años…).
1 maravedí. Barcelona, Madrid, Segovia y Xubia
2 maravedinos. Barcelona, Madrid, Segovia y Xubia
4 maravedinos. Barcelona, Madrid, Segovia y Xubia
8 maravedinos. Barcelona, Madrid, Segovia y Xubia
Los maravedinos de pamplona dixebren un
pocuñín de los sos hermanos: tan fechos de bronce fundíu, polo que’l so pesu
varía en cada pieza. Acúñense solo en 1837 pola necesidá de numberariu n’esi
momentu. Sedría la última moneda acuñada por un xefe del estáu español n’esta
histórica ceca del Reinu de Navarra.
Y una curiosidá: un fallu de grabao nun
maravedí de Segovia; en vez de trayer REYNA aparez RYENA.
Les marque de les ceques, como na tirada
preconstitucional, van venir identificaes poles iniciales de les mesmes,
esceutu Segovia que trai’l so ya perconocíu acueductu y Madrid coles sigles del
Departamentu de Grabáu.
Los reales constitucionales con
variantes
Tres el ya conocíu alzamientu de los
sarxentos y la xura de la Constitución pola reina rexente, les monedes de real
ufrieron los cambios pertinentes; aparez nel anversu la lleenda ISABEL 2ª POR LA GRACIA DE DIOS Y LA
CONSTITUCION xunto col añu acuñación. Nel reversu
lleemos REYNA DE LAS ESPAÑAS, ensin les Indies y caltiense l’escudu igual col
valor facial y coles marques de la ceca y los ensayadores. D’esti tipu
acuñaranse monedes colos valores de 4 y 20 reales.
La moneda de 4 reales foi acuñada solo na ceca Barcelona nos años 1837 y
1838. El cantu ye estriáu.
La de 20 reales equí presentada acuñose nes ceques de Madrid y Sevilla en tres tandes: acuñose en Madrid ente 1837 y 1840, en Sevilla solo en 1842 y de nuevu en Madrid ente 1848 y 1849. Nel cantu lleemos LEY PATRIA REY.
Una primer
variante d’esti tipu ye una pequeña modificación nel títulu del anversu: la referencia a la Carta Magna
reduzse hasta …Y LA CONST., permitiendo ganar tarrén pa facer un llistel y una
grafila más grueses. El restu del diseñu caltiense tal cual. Acuñáronse valores
d’1, 2, 4 y 10 reales.
Les pieces d’1 real acuñáronse tamién en dos tandes y dos ceques. Na de
Madrid les acuñaciones van de 1838 a 1841, faciendo un parón en 1840. Na de
Sevilla acúñase en 1840 y lluéu ente 1851 y 1852. El cantu ye estriáu.
Les de 2 reales tamién van espaciaes; en Madrid acúñense ente 1837
y 1842 col mesmu parón de 1840. En Sevilla van de 1839 a 1840 y lluéu de 1850 a
1851. El cantu ye estriáu.
Les pieces de 10 reales foron acuñaos en Madrid de 1840 a 1842 y Sevilla de
1841 a 1843. Decatase del cambiu de bustu en Madrid (1843-44). Nel cantu lleemos LEY PATRIA REY.
Esiste tamién una segunda variante que realmente ye un llixeru cambiu de tipu, ya que camúdase’l bustu de la reina por ún d’aspeutu más xoven que ya vieremos nes monedes d’1 maravedí y que curiosamente va acuñase nos años nos que nun lo foron les de la variante anterior. No que se refier al restu del diseñu, caltién lo de l’anterior, anversu ISABEL 2ª POR LA GRACIA DE DIOS Y LA CONST. y nel reversu REYNA DE LAS ESPAÑAS allendando l’escudu hispánicu cola marca la ceca y la de los ensayadores.
La d’1
real foi acuñada en Madrid de 1844 a 1849, con paréntesis en 1846 y en
Sevilla nos años 1845 y 1850. El cantu
ye estriáu.
Los 2
reales tamién son de Madrid y coles mesmes feches, de 1844 a 1849, con
paréntesis en 1846 y en Sevilla solo en 1845. El cantu ye estriáu.
Los 4
reales foron acuñaos en Madrid en dos tandes, de 1844 a 1845 y de 1848
a 1849. El cantu ye estriáu.
Los diez
reales foron acuñaos en Madrid ente los años 1843 y 1844. Nel cantu lleemos LEY PATRIA REY.
Como nes de plata preconstitucionales, les
marques de la ceca son les iniciales de so, siendo Barcelona, Madrid y Sevilla les
ceques aú batieron plata.
Los 80 reales d’oru
Hai una primer versión que camuda les
lleendes tanto nel anversu: ISABEL
2ª POR LA GRACIA DE DIOS Y LA CONSTITUCIÓN col añu d’acuñación alredor del
bustu real, como nel reversu: REYNA
DE LAS ESPAÑAS alredor del ya conocíu escudu de Carlos III. Foron acuñaos na
ceca Barcelona, nos años 1837 y 38. Aparecen tamién les iniciales de los
ensayadores sol escudu, asina como’l valor facial de la pieza, 80 RS.
El cantu ye estriáu.
Una segunda tirada reduz la lleenda nel anversu a ISABEL 2ª POR LA GRACIA DE DIOS Y LA CONST. fecha nes ceques de Barcelona (de 1838 a 1848), Madrid (de 1837 a 1840) y Sevilla (de 1837 a 1848). La marca de los ensayadores camuda según la ceca y l’añu d’acuñación.
Y de nuevu un bustu más infantil nes acuñaciones madrilanes de 1843 a 1849, los famosos punzones y matrices de 1842.
Les ceques van identificase equí tamién coles iniciales de la ciudá.
Pa nun facer bien llarga esta entrada, voi dixebrala en capítulos entellazaos que van asina:
- Segundu numberariu (1849-1854)
- Tercer numberariu (Reaxuste de 1854)
- Cuartu numberariu (1865-1868)
- Numberariu del Principáu de Catalunya (1836-1848)
- Numberariu de les Islles Filipines
Fontes:
Wikipedia. Isabel II (castellán)
ANTECEDENTES DEL SISTEMA MONETARIO DE LA PESETA. Dr. D. Javier de Santiago Fernández. Catedráticu
d’Epigrafía y Numismática. Universidá Complutense de Madrid. (Castellán)
Isabel II y sus marcas de ceca. www. Numismáticodigital.com (Castellán)
Blog sobre Isabel II de Javier
Martínez (Castellán)
COMPETENCIA ENTRE MONEDAS:EJEMPLOS DEL SIGLO XIX – Joaquín Pérez Cano (Castellán)
No hay comentarios:
Publicar un comentario