2023: Alessandro Manzoni

 

Semeya: collectorcoins

 

Motivu conmemorativu: 150 cabudañu d’Alessandro Manzoni

Volume d’emisión: 82.500         Fecha d’emisión: 26 d’ochobre

 

     Alessandro Francesco Tommaso Antonio Manzoni (1785- 1873) poeta y narrador italianu, representante del Romanticismu del so país. La so obra más conocida ye la novela histórica titulada I promessi sposi (Los novios), considerada una referencia básica de la lliteratura italiana. Escrita na so llingua vernácula, el lombardu, coló pa Florencia a deprender la so llingua y poder asina tornar la so obra al toscanu, llingua que consideraba más culta y carauterística d’Italia que la de so. D’altu llinaxe, la so pasión pola lliteratura y la escritura provienen de la so rama materna, de so ma y del so güelu. Educáu en colexos relixosos, criticó la rixidez educativa de los cures, pero, gracies a ello, algamó  un esquisitu gustu lliterariu. Arriqueciose, culturalmente falando, moviéndose pelos círculos lliterarios de l’alta aristocracia italiana, pasando del clasicismu al romanticismu y convirtiéndose nel lliteratu más detacáu del momentu n’esti segundu estilu.

 

     No que se refier al so aspeutu relixosu, Manzoni declárase anticlerical, cásase cola helvética Henriette Blondel, d’educación calvinista y tornen los dos al sen de la fe católica gracies al ḥansenista xenovés Eustachio Degola, acatando la estricta ortodoxa de la relixón. D’esta estaya son el so poemariu Inni Sacri (Himnos Sagraos) y un tratáu sobre moralidá católica.

 

     Italia tamién –y dedica a Manzoni una moneda de dos euros esti añu 2023.

 

     Nel intre la moneda apaez el bustu del homenaxeáu xunto a un tinteru, una pluma, un pergamín onde apaecen les primeres pallabres de la so obra I promessi sposi y una cañina lloréu, indicativu de la so inmortalidá. So elli, la so robla  y los años de la efeméride 1873-2023 (ésti caberu ye tamién el d’acuñación de la moneda). A manzorga, la marca de la ceca R. Alredor, el nome del país emisor, CITTA’ DEL VATICANO y la marca de la diseñadora Gabriella Titotto (G. TITOTTO) y grabadora  Marta Bonifacio (M.B. INC.)

 

 Nel aniellu esterior, les doce estrelles de la Xunión europea.

 

     Fontes: Wikipedia. Alessandro Manzoni (castellán)

                  Numismática visual (castellán)

                  Numista