Serie Rexones Etnográfiques Lituanes: Žemaitija

Semeya: Eurocoin

Motivu conmemorativu: Rexones etnográfiques de Lituania: Žemaitija 

Volume d’emisión: 500.000         Fecha d’emisión: 3^er trimestre

    Lituania apúntase tamién a la bona idega d’homenaxear les sos rexones como anda faciendo Alemaña o la so vecina Letonia. Ensin embargu, el casu lituanu tién daqué especial, ya que les llendes d’estes rexones ye de lo más impreciso; nun conformen unidaes alministratives nin polítiques al estilu de, por exemplu, les Comunidaes Autónomes o les provincies del Estáu español, sinon que se rixen por aspeutos históricos y etnográficos del tipu tradiciones, estilu de vida local, cancioneru, cuentos ya inclusu la fala del territoriu (ésta última non tan rigurosa). Hai cinco rexones lituanes, poro, vamos ver cinco monedes conmemoratives del fechu.

     La primer rexón escoyía ye la de Žemaitija en lituanu (Žemaitėjė na fala samoxitana, Capitanatus Samogitiae en llatín, Samogitia en castellán y Samoxitia n’asturianu) que vién a significar Tierres Baxes. Asitiada na parte occidental del país apegada al mar Bálticu, llindia al norte col ríu Venta que la separa de la rexón letona de Curlandia; al sur, el ríu Neman y l’antígua rexón prusiana de Borusia; la parte oriental pega con otres dos rexones lituanes, pero les llendes ente elles nun tan definíes totalmente. La so fala, el samoxitiu, ye considerada pol Estáu lituanu como un dialéutu, pero talamente ye una llíngua báltica con tres variantes.

     Nel intre aparez l’escudu identificativu de la rexón, un osu rampante d’aspeutu fieru, pero de xuru que cautivu pol collar y l’argolla que lleva; data del sieglu XVI, ye por ello que tea tamién coronáu. Nos sos llaos aparecen un caballeru con espada que simboliza la valentía, el sacrificio y el patriotismu, y una dama con un ancla simbolizando la esperanza; fina con una estola y la lleenda PATRIA UNA. Riba, el nome del país emisor LIETUVA; baxo, el nome de la rexón homenaxeá ŽEMAITIJA. L’añu d’emisión aparez sol caballeru y la marca de la ceca al llau la dama.

     Nel aniellu esterior, les doce estrelles de la Xunión europea.

     Fontes: Wikipedia: Samogitia (castellán)

                   Diariu oficial de la XE, a traviés d’Eurocoinland (castellán)

                   Numismática visual (castellán)