2019: Patrimoniu de la UNESCO: sutartinės

Semeya: Eurocoin

Motivu conmemorativu: sutartinės (cancios polifónicos lituanos) 

Volume d’emisión: 500.000         Fecha d’emisión: 4^u trimestre

     Los sutartinės son cancios polifónicos del nordeste de Lituania interpretaos por muyeres. Les melodíes de los cancios son cencielles, con cinco altures tonales, y la so lletra comprende dos estayes dixebraes: un testu principal significativu y un estribillu que pue tener pallabres de circunstancia. Hai unos cuarenta estilos y formes distintes d’interpretar los sutartinės. Los sos mous d’interpretación principales son: en segundes paraleles con dos canciaores; en canon estrictu con tres canciaores, qu’entonen xuntes dos frases de la melodía a intervalos escalonaos; y, caberamente, con dos grupos de canciaores nos que la canciaora principal de ca grupu interpreta el testu principal, a la par que’l primer grupu cancia l’estribillu, enantes de que’l segundu grupu lu repita. Los testos poéticos aborden abondos temes relacionaos col llabor, les fiestes del calendariu, los casorios, la familia, les guerres y dellos sucesos hestóricos o de la vida diaria. La coreografía ye bien cenciella y los movimientos son acompasaos, ya incluso estremadamente sobrios en munchos casos: les canciaores evolucionen en círculu o en forma d’estrella, garrándose pelos brazos y golpiando’l suelu colos pies. Los sutartinės interprétense en circunstancies solemnes, asina como en fiestes, conciertos y aconceyamientos. La so interpretación contribúi a promover l’aprovechamientu compartíu de valores culturales y confier un sentimientu d’identidá cultural, continuidá y autoestima. Hai una versión instrumental masculina de los sutartinės na qu’empleguen zanfoñes, trompes, trompetes llargues de madera, xiblates y xistros.

 

     Los sutartinės foron declaraos Patrimoniu de la UNESCO nel 2009, poro, esta moneda conmemora el so décimu aniversario.

 

     Nel intre aparecen tres tiestes de muyeres arrodiaes d’una especie espiral que va enanchando al final pa incluyir delles figures xeométriques y de la natura en pequeño. Entemediu d’esta simboloxía tradicional aparecen el nome del país emisor LIETUVA, l’añu d’emisión 2019 y el nome de los cancios SUTARTINĖS, a la par que la marca de la ceca. El diseñu ye obra del pintor lituanu Lludas Parulskls.

 

     Nel aniellu esterior, les doce estrelles de la Xunión europea.

 

     Fontes: Unesco.org: sutartinės (castellán)

                   Diariu oficial de la XE, a traviés d’Eurocoinland