2019: Escudu Nacional: Sol Naciente

Semeya: Collectorcoins

Motivu conmemorativu: Serie Escudu Nacional de Letonia: Sol Naciente

Tirada: 307.000              Fecha d’emisión: 17 setiembre

 

     Dientro del escudu nacional letón rescampla el Uzlecošā Saule (Sol Naciente). El diseñu orixinal d’esti sol ye obra del artista letón Ansis Cīrulis (1883–1942) y apareció representáu por primer vez nel estandarte del Batallón de Fusileros Letones Daugavgrīva en 1915, el cual taba al serviciu del zar (Letonia d’aquella, yera una provincia del Imperiu rusu). En 1917 tamién foi emplegáu como símbolu identitariu de l’Autonomía de Letonia. Tres la so independencia en 1918, el Sol entró a formar parte del Escudu Nacional de Letonia, diseñáu pol artista Rihards Zarinš, como símbolu del nacimientu d’una nueva nación.

Bandera del Batallón Daugavgrīva

     Sirve tamién esta pieza pa homenaxear precisamente al pá del diseñu orixinal, al mentáu Ansis Cīrulis, pola so contribución artística a la cultura letona, ya que’l Sol Naciente tamién foi emplegáu nel primer sellu de correos letón y ta integráu na decoración interior del Salón d’Embaxadores nel castiellu de Riga. Cancios populares, poemes y trabayos artísticos inmortalizaron, más si cabe, esti símbolu.

     Nel intre la moneda aparez el Sol Naciente con unes lletres estilizaes nel so intre, BL, abreviatura de Brīvā Latvija (Letonia llibre) col so nome letón UZLECOŠĀ SAULE y el nome del país emisor LATVIJA col añu d’emisión 2019. El diseñu la moneda ye obra del artista Ivars Drulle. La moneda foi acuñada na Koninklijke Nederlandse Munt (Países Baxos).

     Nel aniellu esterior les doce estrelles de la Xunión europea.

     Fontes: Numismática visual (castellán)

                   Diariu oficial de la XE (castellán) a traviés d’Eurocoin.