2022: Emisión común na XE. Programa Erasmus

Motivu conmemorativu: 35 Aniversariu del Programa Erasmus.

Volume d’emisión total: 37.146.500          Fecha d’emisión: 1^u xunetu

 

     El European Region Action Scheme for the Mobility of University Students (n’inglés, Plan d’Aición de la Comunidá Europea pa la Movilidá d’Estudiantes Universitarios) y más conocíu equí como Programa Erasmus, ye un plan de xestión de les dixebres alministraciones publiques cola fin de sofitar y facilitar la movilidá académica de los estudiantes y profesores universitarios pel espaciu de la XE, Suiza, Macedonia del Norte y Turquía. Nació en 1987 de la man d’una asociación estudiantil europea ya integrose, en 1995 nun plan de mayor envergadura nomáu Sócrates, Sócrates II dende’l 2000 y nomáu Lifelong Learning Programme (LLP) dende’l 2007. El LLP dixébrase’n cuatro subprogrames: Comenius (pa rapazos d’escueles y colexos), Erasmus (pa universitarios), Leonardo da Vinci (pa la FP) y Grundtvig (pa estudiantes adultos).  ¿Por qué Erasmus? Pues val con garrar les iniciales d’esi nome n’inglés tan llargu y xuntales. ¿Acrónimu casual?

     Pa cellebrar la efeméride del so 35 aniversariu, la Comisión europea, a petición de les Cases de la Moneda europées, decidió sacar una acuñación conxunta pa esti añu 2022. Polo xeneral, los países de la eurozona solo puen acuñar dos monedes conmemoratives de 2 euros al añu, ensin embargu, esiste la esceición de facer una tercer acuñación si ésta ye conxunta (como ye’l casu) pa conmemorar dalgún fechu perrelevante pa Europa o la Xunión europea. Poro, dellos países van tener tres monedes acuñaes esti añu.

     Pa’l diseñu la moneda, los servicios de la Comisión europea fain un concursu públicu. N’esti casu, podíen participar tolos alumnos que tovieren formándose col Programa Erasmus. Un xuráu de profesionales escueye dellos diseños, ya perfilaos por grabadores numismáticos y los presenta a votación, vía web, ente los ciudadanos de la Xunión. Los diseños escoyíos, foron los seis siguientes:

 

Más info detallao de los diseños: Numismática visual

 

     Finalmente, ganó el diseñu númberu 6, ya definíu pol grabador xeneral de la Monaie de Paris, Joaquin Jimenez y favoritu ente los votantes ya dende’l prencipiu.

     Refierse’l grabador, nel so diseñu, al amestáu de los dos elementos principales del Programa Erasmus: la inspiración intelectual, representada pol propiu Erasmu, y la so influyencia n’Europa, simbolizada por unos faros d’aú salen unos faces de lluz que conexonen unos con otros, representando asina los intercambios intelectuales y humanos ente los estudiantes europeos. En referencia a Europa, los cruces ente los rayos, orixinen nueves estrelles nacíes de la sinerxía ente países. El númberu 35, nun estilu gráficu contemporáneu, surde ente les estrelles. El restu del diseñu confórmenlo la lleenda (nel idioma qu’escueya ca país), los años de la efeméride y l’acuñación, asina como les marques insertaes poles dixebres Cases de la Moneda a petición de los países emisores. Apaecen tamién les iniciales del grabador Joaquin Jimenez (J.J.)

     Nel aniellu esterior les doce estrelles de la Xunión europea.

     A la fin, 19 países de la zona euru acuñaron la moneda: Alemaña, Austria, Bélxica, Eslovaquia, Eslovenia, España, Estonia, Finlandia, Francia, Grecia, Irlanda, Italia, Letonia, Lituania, Luxemburgu, Malta, Países Baxos, Portugal y Xipre.

 

     Fontes: Wikipedia: Programa Erasmus

                Numismática visual: Presentación idea. Votación diseños. Diseño ganador. Países emisores.