2022: Sofitu a Ukraina

 

Semeya: coindatabase

Motivu conmemorativu: Sofitu d’Estonia por un estáu llibre y soberanu ucranianu 

Volume d’emisión: 2.000.000         Fecha d’emisión: 4^u trimestre

 

     El Eesti Pank, Bancu Central d’Estonia, decidió sofitar, a la so manera, la causa ucraniana escontra Rusia (los estonios saben muncho d’esto). La idega foi acuñar una moneda faciendo referencia a la tema y sacar una parte d’elles en formatu coincard pa colleicionistes, cola fin d’unviar los beneficios xeneraos na so venta al Bancu Central d’Ukraina.

     El Eesti Pank, quixo tamién que’l diseñu la moneda fore fechu por un ucranianu, poro, púnxose’n contautu cola dirección de l’Academia d’Artes d’Estonia, onde cursaben estudios dellos xóvenes ucranianos refuxaos. Al momentu, l’academia fexo un concursu públicu ente tolos sos estudiantes y nes sos dixebres disciplines. A la fin la ganadora foi Daria Titova, estudiante orixinaria de la ciudá de Kharkiv (Járkov).

     En tiempu record, el Eesti Pank aprovó’l diseñu y púnxose al llabor. En branu salieron les coincard con una tirada de 40.000 pieces y al preciu de 18 euros (cola idega de sacar más si tién bona acoyía). La moneda en sí, ta acuñada n’Eslovaquia, mientres que la tarxeta y l’ensamblao final pa la so venta, ta fecho en Polonia. El diseñu de la tarxeta ye obra de Vladimir Taiger, que tamién asesoró a los mozos ucranianos pal diseñu de la moneda.

Semeya coincard: numismática visual

     La tirada total de l’acuñación va ser de 2 millones, sumando les que van ponese’n circulación coles apartaes pa la coincard. Les de circulación van salir a finales d’añu y nun van tardar un res n’espardese per toa Europa, como avisu de que la guerra entá ta ehí.

     Nel intre la moneda apaez una neña, como símbolu de tenrura, protexendo un paxarín. Al so llau vese tamién una espiga trigu (Ukraina ye l’horru d’Europa). Riba a manzorga, la lleenda SLAVA UKRAINI (Gloria a Ukraina, en llingua ucraniana, pero alfabetu llatín). Baxo, el nome del país emisor y l’añu acuñación 2022.  

     Nel aniellu esterior, les doce estrelles de la Xunión europea.

 

     Fonte: Numismática visual (castellán)