2022: Sociedá de Lliteratura d’Estonia

 

Semeya: coindatabase

Motivu conmemorativu: 150 Aniversariu de la Sociedá de Lliteratura d’Estonia

Volume d’emisión: 1.000.000         Fecha d’emisión: 9 marzu

 

     Eesti Kirjameeste Selts (EKmS), Sociedá de Lliteratura d’Estonia, foi una influyente asociación d’intelectuales estonios con sée na ciudá de Tartu. El so cometíu foi promocionar la llingua y lliteratura n’estoniu, cola fin d’arriquecer la vida social del país y afayar al pueblu na comprensión de la so historia y tradiciones. Los estatutos de la Sociedá aprováronse nel 1871, faciendo la so primer reunión na ciudá de Viljandi en marzu de 1872. Esi mesmu añu fincaríense definitivamente en Tartu. Baxo la direición del so primer presidente, Jakob Hurt, la Sociedá centrose n’atropar poesía popular estonia. En 1881 produzse la primer dixebra del grupu: Carl Robert Jackobson, enfréntase a Hurt por causa de la direición a tomar nun futuru, faciendo que Hurt cole con dellos collacios y Jackobson salga presidente. A partir de 1887, con Hugo Treffner como presidente, organícense concursos lliterarios. La segunda gran dixebra del grupu apaez tres el procesu de “rusificación” del territoriu bálticu, dellos miembros opten por una postura moderada, mientres qu’otros opten por una radical y de refuga. El 28 d’abril de 1893, les fuercies zaristes clausuren la Sociedá.

     Nos sos 18 años d’andanza, la Sociedá espublizó unos 100 artículos, atropó documentos antíguos, monedes y preseos etnográficos, axuntó una bayurosa biblioteca y organizó conferencies a esgaya.

     Nel intre la moneda apaez un llibru abiertu onde puen lleese les primeres pallabres del presidente Hurt: KUI ME EI SAA SUUREKS RAHVAARVULT, PEAME SAAMA SUUREKS VAIMULT (“Si nun podemos ser una gran nación en númberu, debemos ser grandes n’espíritu”) col añu fundacional de 1872. Riba, la lleenda 150 EESTI KIRJAMEESTE SELTS (Sociedá de Lliteratura d’Estonia) y l’añu acuñación 2022.  El diseñu ye obra del artista Riho Luuse.

     Nel aniellu esterior, les doce estrelles de la Xunión europea.

 

     Fonte: Numismática visual (castellán)

                 Hmong.es: Sociedad de Literatura de Estonia (castellán)