2022: Pablo VI

Semeya: euro-coins.tv

Motivu conmemorativu: 125 Aniversariu del nacimientu del papa Pablo VI

Tirada: 81.250           Fecha d’emisión: 6 de setiembre

     Giovanni Battista Enrico Antonio Maria Montini (1897-1978) 262^u  papa de la Ilesia católica y soberanu de la Ciudá del Vaticanu dende’l 21 de xunu de 1963 hasta  la so muerte en 1978, so’l nome de Pablo VI.

     Detacáu estudiante ya dende la escuela, ingresa nel seminariu de Brescia en 1916, pa convertise en sacerdote pel 1920. Insaciable estudiante, fina los sos estudios de doctoráu canónicu en Milán, pasando a estudiar lluéu pola Universidá Pontificia Gregoriana, la Sapienza y l’Academia Pontificia Eclesiástica. Con 25 años, ingresa na Secretaría d’Estáu de la Santa Sée. En 1923, ya yera nunciu en Varsovia, Polonia. De vuelta en Roma, trabayó enforma a les órdenes del papa Pío XI y foi un miembru indispensable na Secretaría pal papa Pío XII. Durante la II Guerra Mundial, dirixó la Comisión d’Asistenca Pontificia, ayuando a toa triba de refuxaos (xudíos, soldaos aliaos evadíos de campos de concentración, anti facistes, comunistes, y tres la liberación de Roma, a soldaos alemanes y perseguíos por collaboraores facistes), foi l’embrión de lo qu’anguañu conocemos como Cáritas. En 1954 foi nomáu arzobispu de Milán, l’area católicu más importante d’Italia, y en 1958, cardenal pol papa Xuan XXIII, al que socedió como papa en 1963. Pablo foi’l que realmente puxó, peslló y punxo en marcha toles directrices aprovaes nel Conciliu Vaticán II. Si como arzobispu en Milán nun tuvo problema a averase a la clas obrera y a los sos representantes sindicales, siendo ya papa nun refugó la idega de fomentar relaciones ecuméniques coles dixebres confesiones cristianes, algamando alcuerdos históricos. Tamién puxó pol averamientu de los laicos a la ilesia, asina como’l respetu a ateos y non creyentes, como a seguidores d’otres confesiones relixoses. Muerre en 1978, en 2014 foi declaráu beatu y en 2018 foi canonizáu.

     Nel intre la moneda apaez el papa colos brazos abiertos, un xestu típicu de so, a la hora saludar a la multitú. Alredor, el nome del país emisor CITTA’ DEL VATICANO y la lleenda PAPA PAOLO VI. A manzorga, los años 1897 (el de la so nacencia) y 2020 (el de la feméride a la par que d’acuñación) y la marca de la ceca de roma R. Nel baxu, les iniciales de l’artista Daniela Longo (D. LONGO) y a mandrecha xunto a la capa, les iniciales de la grabadora Maria Angela Cassol, MAC.INC

     Nel aniellu esterior les doce estrelles de la Xunión europea.

 

Fontes: Wikipedia. Pablo VI

             Numismática visual (castellán)