2021: Serie Patrimoniu de la Unesco: Reserva de la Biosfera de Žuvintas

 

Semeya: collectorcoin

Motivu conmemorativu: Programa sobre l’Home y la Biosfera de la Unesco: Reserva de la Biosfera de Žuvintas

Volume d’emisión: 500.000         Fecha d’emisión: 2^u trimestre

 

    L’área protexíu de Žuvintas ye l’únicu parque nacional lituanu que ta catalogáu como Reserva de la Biosfera por parte la Unesco.  Asitiase al sur de les tierres baxes de Lituania central y ta conformada de llagos, humedales, turberes y pinares. Tién una estensión d’unos 92 km² (602 si sumamos to’l perímetru de proteición que tién alreor).

     El Programa sobre l’Home y la Biosfera de la Unesco, más conocíu pol títulu de Reserves de la Biosfera, naz nel añu 1971 cola idega de conciliar la vida humana col Mediu Ambiente a traviés d’un desarrollu sostenible. La ONG recueye nun cartafueyu una tribal lugares xeográficos carauterísticos de los dixebros hábitats del planeta (terrestres y marinos) cola fin de caltener y preservar la so biodiversidá, ensin escaecer el so desarrollu económicu ya humanu. La creación d’esta rede mundial céntrase tamién na investigación, educación y compartición d’información ente reserves.

     Esta ye la cuarta moneda lituana dedicada al so patrimoniu Unesco xunto coles de los cancios y dances, los cancios polifónicos (sutartinės) y el Monte les Cruces.

     Nel intre apaez principalmente un avetoru a la caza d’un sapu bermeyu; nos xuncos, un carricerín ceyudu y esnalando unes grulles con un cisne. Riba, el nome del país emisor LIETUVA. Nos xuncos, l’añu emisión.  Baxo, el nome de la reserva ŽUVINTAS cola identificación UNESCO. A manzorga, la marca de la ceca. El diseñu ye d’Eglė Ratkutė y Ernestas Žemaitis.

     Nel aniellu esterior, les doce estrelles de la Xunión europea.

     Como curiosidá pa los colleicionistes, indicavos q’una partida d’unes 500 pieces vienen con un erru d’acuñación. Nel cantu de les monedes de 2 euros lituanes, vienen grabaes les pallabres LAISVĖ * VIENYBĖ * GEROVĖ * (LLIBERTÁ * UNIDÁ * BIENTAR *) pero nes del erru vienen grabaes DIEVS * SVĒTĪ * LATVIJU (DIOS * BENDIGA * LETONIA) propies de les monedes letones (la ceca lituana acuñó les monedes letones y estonies na emisión conxunta del 2018, dedicada al nacimientu de les tres republiques). Tres les disculpes, el Bancu Central lituanu ufre la posibilidá de cambiales… pero va ser que non, los erros en numismática tan percotizaos y dalgún va sacar un bon plizcu na reventa, poro, curiáu con posibles engaños.

 

     Fontes: Wikipedia: Áreas protegidas de Lituania (castellán)

                   Diariu oficial de la XE, atraviés d’Eurocoinland (castellán)

                   Numismática visual (castellán)

                   Numismática visual (nota del erru. Castellán)