2021: Roma, capital d’Italia

Semeya: collectorcoins

Motivu conmemorativu: 150 aniversariu de la titulación de Roma como capital d’Italia

Volume d’emisión: 3.000.000         Fecha d’emisión: Xineru

     Segunda metá del sieglu XIX ya Italia avanza haza la so xuntanxa (o rexuntanza si se tién en cunta la primer xuntanza nel sieglu III e. C.). La bona diplomacia esplayá del Conde de Cavour nel norte y les fazañes militares de Garibaldi pel sur finaron na xuntanza de les dos zones baxo’l gobiernu del rei Vitor Manuel II. Entemediu quedaba Roma, ciudá gobernada pol papa y protexía pol emperador francés Napoleón III. Los intentos de conquistar la ciudá por parte italiana foron en baldre; solo cuando Francia perdió na Guerra de Sedán escontra l’Imperiu alemán nel 1870, tovieron vía llibre. El papa punxo resistencia armada y la ciudá foi tomada poles armes. La perda primero de los Estaos Pontificios y lluéu de Roma, fexo que’l papa Pío IX s’autorrecluyere nel Palaciu Vaticán a mou de protesta hasta que nun se reconociere un Estáu Vaticán independiente, lo que nun asocedió hasta 1922. Tres la ocupación, Roma y el Lacio pasaron a formar parte del nuevu Reinu d’Italia y La Ciudá Eterna convirtiose na so capital.

 

     El gran Monumentu Nacional a Vitor Manuel II, asítiase na Plaza Venecia de Roma, foi diseñáu en 1885 por Guiuseppe Sacconi, inauguráu en 1911, pero fináu ente 1924 y 1927. Popularmente ye conocíu col nomatu de Il Vittoriano, pero tamién como Altar de la Patria, pola so bayura d’obres escultóriques de calter identitariu pa cola nación italiana y el fechu de la xuntanza. Ún d’estos apartaos ye’l dedicáu a la Tumba del Soldáu Desconocíu, construyía tres la Primer Guerra Mundial y sobre la que s’erixe una estatua dedicada a la Diosa Roma, obra d’Angelo Zanelli. Ye precisamente la tiesta de la diosa, la figura principal del diseñu d’esta moneda de dos euros.

 

     Nel intre la moneda apaez el bustu de la Diosa Roma. Alredor, la lleenda ROMA CAPITALE y los años 1871-2021 (años del fechu y l’acuñación de la moneda). A manzorga, la marca identificativa del país emisor RI y la marca de la ceca R. So’l bustu, la marca de la diseñadora Uliana Pernazza UP.

     Nel aniellu esterior, les doce estrelles de la Xunión europea.

 

     Fontes: Wikipedia. Vittoriano (italianu)

                                     Xuntanza italiana

                   Numismático visual (castellán)

                   Diariu de la XE a traviésd’eurocoin (castellán)