Colleicionar monedes

      Hai un gran erru n’esti mundillu de confundir colleicionista de monedes con numismáticu, dalgo que tol mundiu diz asina a lo xole. La numismática ye una ciencia, una estaya de la historia y l’arqueoloxía dedicada al estudiu del pasáu a traviés de les monedes. Un colleicionista, a priori, ye eso, un atropador con una afición. Ello nun quita q’un mumismáticu tenga (y tién) una escelente colleición de monedes, o q’un colleicionista termine siendo, a lo menos, un aficionáu a la numismática.

      Otra dixebra ente la ciencia y la colleición ye’l mou d’orientar l’atropamientu de pieces; normalmente la primera faise de cara al cuidáu y conservación d’un patrimoniu que, realmente, ye de tous pero en manes privaes o museos; la segunda suel tener, delles vegaes, un calter inversor o simplemente por apreciu a una disciplina.

      Centrándonos entós no que se refier al colleicionismu, hemos de tener en cuenta, no primero, d’a ú queremos empobinar o dirixir la nuesa afición (y como nun hai onde escoyer… ¿eh, ho?). Too depende de colo qu’entamemos. Enantes de qu’esistiere l’euru, la base más cenciella pa un colleicionista qu’escomencipiare yera la d’atropar pieces de l’anterior moneda del Estáu español, la peseta, sobre too les pieces con dellos tipos que s’acuñaron a partir de 1989 (cada añu salía una moneda nueva dedicada a una comunidá, un personaxe… en valores de 5, 10, 25, 50, 100 o 200 pesetes, polo que se podía facer una colleición curiosina). Ya inclusu de xuru que per casa aparecien monedes anteriores dedicaes al Mundial de fútbol de 1982 o hasta duros de Franco, nada raro teniendo en cuenta que siempre aparecen perres nos llugares más raros o menos esperaos (nel 2017 inda atopé per casa una moneda de 25 pesetes de Barcelona 92 y una peseta Franco).

La moneda d’anguañu ye l’euru, polo qu’enteamar una colleición pa un novel ye más cenciello, basta con rebuscar nos monederos de xemes en cuandu p’atopar monedes d’euru, o céntimos, de dellos países europeos (na menos que 23 nel añu 2018).

Otra cosa ye que seyamos un pocuñín repunantucos y nos preste tener una colleición bien curiosa y de bona calidá no referente al so estáu de conservación; entós equí ya tendríemos qu’averanos a una tienda especializada de numismática, onde podremos atopar verdaderes ayalgues.

De tolos mous, vamos facer equí un pequeñu llistáu de les posibles colleiciones que podemos facer y que nun seya difícil atopar pa cualisquier curiosu. Ya de primeres tenemos que pensar si queremos colleicionar monedes de circulación o non circulables, esto ye, les emitíes pelos gobiernos pal usu cotidianu de la xente o les acuñaes específicamente pal colleicionismu, normalmente en metales nobles (oru y plata); si estes monedes les queremos del Estáu español o estranxeres, y sobre too si les queremos nuevines, ensin circular o que circularen, pero con bona calidá.

Avisu: Has de tener dos coses clares pa facer la to colleición: a lo primero, el to presupuestu; pués facer una colleición perguapa con poques perres o gastate un dineral. Y segundo, si na to colleición quies que prime la calidá de les pieces, paciencia; nun merques lo primero que veas, si nun te peta, solo por atropar; busca y compara.

Moneda de circulación

Son les monedes que s’empleguen cotidianamente. Tolos países del mundu emiten esti tipu de monedes polo que ye una de les colleiciones más asequibles pa entamar l’afición. Tan solo con colleicionar la bayura d’euros y céntimos de la XE ya podemos rellenar delles fueyes y álbunes. Son colleiciones que puen allargase nel tiempu, ya que cada añu suel salir una nueva emisión pa reforzar l’anterior y que si bien puen camudar daqué el so diseñu, lo más normal ye que caltengan el mesmu tipu y camude solamente la fecha grabada nel exergu. Podemos dixebrales en dos grupos:

Circulada

     Son pieces que ya pasaron por delles manes, lo que fai que tengan raspiones, zones desgastaes, manches, etc... Evidentemente, el so valor material nun pasa del so valor facial (un euru ye un euru) mas ye la colleición más fácil de facer y la más barata. Amás, en delles ocasiones, podemos atopar pieces de la mesma tirada, lo que nos permite escoyer la que tea meyor conservada, y devolver a la circulación les desechaes ensin costes adicionales.

     Si somos viaxeros o conocemos xente que suel viaxar, una colleición de monedes del mundu tamién ye bastante afayaíza, pues les monedes suelen representar los valores más baxos de la divisa d’un país, siendo los más altos emitíos en billetes. Equí los riesgos ya son un pelín mayores, si les pieces nun son de bona calidá, pues… ye lo qu’hai; aparte que tamién tenemos que tirar de publicaciones especializaes en monedes mundiales o páxines web orientaes a tala fin pa saber si la to colleición ta completa, o si los tipos pertenecen a la mesma serie, etc… Tampoco ye difícil mercar monedes estranxeres en tiendes numismátiques y on line.

Evidentemente nun podemos esperar qu’esti tipu de colleición algame un valor inversor de futuru, salvo que pasen munchos años o les pieces tengan dalgún erru d’acuñación o seya una variante escasa, pero esto nun suel ser mui normal en monedes d’anguañu. Lo que realmente alimenta esta colleición ye’l so valor sentimental.

Ensin circular

      Delles monedes emitíes pa circular son apartaes pal mundu numismáticu. Son vendíes en cartones plastificaos pa protexeles del ambiente y los pequeños raspiones y conservales tal como salen de la fábrica monedes. Esto ya fai que’l so valor de mercáu seya un pelín más altu que’l so valor facia, pero ya tendremos una serie que col tiempu dirá algamando cierta revalorización. 

Monedes tipu encartonaes

 

      Esisten tamién unes monedes de plata emitíes pola FNMT que son válides como moneda de circulación con valores de 12, 20 y 30 euros pero que naide usa, primero porque hai que solicitales nos bancos y segundo porque los solicitantes suelen ser colleicionistes, polo que tamién puen integrase n’esti grupu d’ensin circular. Nos bancos van cobranos el valor facial de la moneda, pues nonmás vienen precintaes nuna bolsina plásticu ensin nenguna proteición (polo que ye recomendable metela nun cartón o, meyor, nuna cápsula). Tamién esiste otra opción que ye mercala nuna tienda numismática dientro d’un cartón proteutor a un coste superior al facial. Col tiempo, estes colleiciones algamen un valor mayor non solo pola so conservación, sinon pola xuba del valor de la plata nos mercaos económicos.

12 € de plata y col cartón

 

Moneda conmemorativa non circulable

      Son monedes acuñaes específicamente pal mundu del colleicionismu. Tan feches con metales preciosos, oru, plata y más raramente, platín o titaniu. El so valor facial nun concuerda col valor de mercáu. Ello ye debío a que por ser acuñaes esclusivamente pa colleiciones, la so tirada suel ser escasa y vienen meyor protexíes pala so conservación: la moneda va dientro d’una cápsula plásticu tresparente y fuerte, la cual va dientro d’un estuche de xoyeru bien forráu y una caxa cartón como envoltoriu. Aparte, tamién trae un certificáu d’autenticidá seriáu. Pa xustificar el so altu preciu comercial, aparte d’eti envoltoriu tan finolis, la propia moneda tá acuñada d’un mou especial: aparte de ser una auténtica obra d’arte, el so acabáu la define como de preba (proof n’inglés), esto ye, que la moneda recibe un pulíu final peles dos cares, que-y da un rellume especial nomáu d’espeyu. ¡Cuidáu con esto! ya que, si tocamos la moneda coles manes, alón espeyu; solo el cantu nun ta pulíu, poro, nun hai problema si la garramos perehí, pero lo meyor ye nun sacala de la cápsula. 

10 € de preba (proof)

 

Pelo fácil güei: l’euru de circulación

      La colleición d’euros ye la más fácil de facer güei. Como ya dixe, non más hai que rebuscar pel monederu de xemes en cuandu. Lo primero que debemos de tener claro ye saber qué países acuñen euros y qué tipu tienen pa dirixir y xestionar la nuesa colleición; pa ello hemos de facemos con una guía numismática onde podamos atopar toa esta información. Si bien ye cierto qu’esisten llibros espublizaos al respeutu, nun podemos negar qu’anguañu lo más fácil ye tirar d’internet. Un bon sitiu pa buscar ye na web del Bancu Central Européu, que menos. Tamién na Wiquipedia, aunque delles vegaes podemos atopanos con que nun salen espublizaes les semeyes de dalgunes monedes, aunque sí la información. Tamién esisten delles webs centraes na tema, mesmamente ésta onde tas lleendo lo qu’equí te cuento (tienes el llistáu de países a mandrecha).

      Una vez atopada la información, habrá que dir montando la colleición. Y equí, como en too, pues gastar más o menos perres. Lo más barato ye colleicionar lo que te llegue a les manes (ta claro, una moneda de 2 euros valte 2 euros… y asina) pero atópeste con delles dificultaes: nun yes a xuntar tola serie d’un mesmu país, l’añu d’acuñación nun coincide, delles pieces tan gastaes pol usu… pero bono, pa entamar a enviciate n’esti mundín ye lo más fácil, tiempu tendrás de facelo más en serio. Ten en cuenta qu’estes monedes tan en circulación y que, a medida qu’atopes otres de meyor calidá o a la fin te decidas a facer les coses más en serio, pues devolveles al mercáu ensin coste adicional.

      Si nos pico’l meruquín y queremos facer una colleición seria, entós ya tenemos que rascanos el bolsu un pocu más. A lo primero saber que tolos estaos faen tiraes de monedes que nun pon en circulación precisamente p’abastecer el mercáu del colleicionismu. Centrándonos nos tipos de les monedes que circulen pela cai, hai dos mous d’atopales: una ye con tola serie monedes (d’1 céntimu a 2 euros) nuna tirina plásticu y separaes ente elles, que ye la más barata (unos 10 euros, según el país emisor, nel 2017) y otra ye lo que se denomina una cartera, estuche o cartón, onde vienen toes sellaes en plásticu y cartón como si fuere una tarxeta o postal; esta ye más cara, sobre los 15 o 20 euros, pero ye que aparte de la calidá ensin circular de les pieces, hai que suma-y el que ya vengan aislaes pa evitar qu’aferruñen o s’estropien con axentes esternos (aire, humedá..) o que-y fagamos dalgún raspión al manexales. Aparte, y ya siendo un pocu meticulosos, veremos qu’en tola serie coincide l’añu d’emisión o acuñación de les pieces, colo que ganamos un pocu más de calidá na nuesa colleición.

     Esiste tamién una versión más cara de les series, la fecha en calidá de preba, serie llimitada nun estuchín y con certificáu d’autenticidá seriáu.

 

      ¿Onde mercar? Pues lo meyor ye n’una tienda numismática, bien física (lo meyor) bien on-line (hailes fiables; l’engorru vién si nun nos convez el productu y queremos devolvelu; sobre too hai que lleer les condiciones pa ver si nos cobren un plus por ello. Tamién hai que tener en cuenta los gastos d’unvíu… pue que nun nos tenga cuenta). O tamién si conocemos a daquién que vaiga viaxar y pue facete’l favor… Desconfía de páxines tipu e-Bay si nun tas afayáu, aparecen falsificaciones abondes y bones, y nun les venden por 4 perres, non.

      Avisu: Decidais lo que decidais, habéis de tener en cuenta que les tiraes de dellos países nun tan a la man de tous; les tiraes de los estaos que nun pertenecen a la Xunión, pero que tienen permitío acuñar euros (Andorra, Mónacu, Sanmarín y Vaticanu) suelen tener unos precios descomanaos, sobre too los de El Vaticanu, como non, onde pues atopar series con un preciu en mercáu d’hasta 400 euros; y nun te lo pierdas, qu’hai cola pa mercales. Si tú yes ún d’estos, o quies selo, ya te recomiendo que te llances a mercar cartones y facer una colleición de calidá.

Otra colleición: los 2 euros conmemorativos

 

      Una auténtica colleición en sí mesma, ya que tolos años los países emisores d’euros saquen ente una y tres monedes d’esti tipu. Al igual que les otres, el meyor sitiu p’alcontrales ye nos mercaos especializaos, porque éstes son un poco más difíciles d’atopar en circulación fora del so país emisor, aparte de que tamién s’acuñen en menor cantidá. Lo prestoso d’esta colleición ye disfrutar de la bayura de diseños de los distintos países, asina como el descubrimientu de parte de la historia, personaxes destacaos, natura, patrimoniu o los símbolos identitarios de los nuesos países vecinos. Ya inclusu munchos d’ellos fain les sos propies subcolleiciones pa disfrute de nos, como Alemaña, que cada añu saca una moneda dedicada a ún de los sos Landers (estaos), o España, al Patrimoniu de la Humanidá de só.

      Lo mesmo que nel casu anterior, bono ye tener una guía pa orientanos, aunque n’esti casu tendremos el problema de nos quedaría anticuada ca añu. Poro, lo meyor ye buscar n’internet un blog que vaiga actualizando cada añu les nueves acuñaciones (nel casu d’ésti, tienes que dir a un país de la llista, a mandrecha y una vez n’elli pinchar nel enllaz monedes conmemoratives).

      Atopales nuna tienda numismática delles vegaes ye daqué difícil, sobre too les ya vieyes; ye más fácil atopales en tiendes on line, pero tamos nes mesmes qu’anantes, los costes en gastos o posibles devoluciones. Realmente lo meyor pa estos casos ye facer una merca grande pa que, a lo menos, los gastos d’unvíu nos compensen.

La peseta, otra que pue ser afayaiza… o non

      Partiendu del fechu de que’l nuesu campu d’aición ye l’Estáu español, nun tendremos dificultá pa dedicanos a colleicionar pieces de l’anterior divisa: la peseta. Agora, eso sí, hai que tener en cuenta qu’esta moneda ya ta desaniciada, poro, ya hai que movese per otros llares y n’otres condiciones. Según per onde nos movamos y qué queremos atropar, podemos atopanos con gastos más o menos cuantiosos (que nadie piense q’un duru va costanos 8 céntimos d’euru, non home, non).

     La peseta tién una historia de 134 años (1868-2002) que nun ye poco. A pesar de que ye una historia ya finada, ye un campu pergrande pa cualisquier colleicionista, pues la bayura d’estayes, series, tipos, etc… fain que podamos escoyer una riestra caleyes y direiciones pa orientar la nuesa colleición.

      Lo primero, como siempre, una guía de la peseta. Hai una bayura d’elles en mercáu; la más conocía ye la de los hermanos Guerra. Pero igualmente tamién podemos atopar muncho pela rede: webs, blogs, foros… güeyaína perequí y güeyaína percuyá y a ponemos a trabayar. N’esti mesmu blog tienes les estayes de la peseta a mandrecha y un pocu d’hestoria de los sos anicios pinchando equí o riba nel apartáu La peseta.

      Como siempre, hai que ver les perres que queremos gastar y qué calidá –y queremos dar a la colleición. Si queremos facer una que seya curiosina y barata, lo meyor ye dedicase a atropar les monedes de les series del rei Xuan Carlos I (de 1975 a 2001), son perfáciles d’alcontrar a bon preciu inclusu ensin circular. Amás, solo la última serie, dende 1989, ya ye rica enforma no que se refier a tipos. Otra mini colleición d’esti rei ye la conocía como La del Mundial, dedicada precisamente al mundial de fútbol del añu 1982. Colleicionando monedes de Xuan Carlos I ún pue dir decatándose de los cambeos acaecíos dende’l so ascensu al tronu en 1975 al 2002, añu nel que la peseta dexó sitiu al euru; vese sobre too no referente al escudu nacional (el primeru foi el del aigla, qu’inda aparez na peseta de 1982, la de la serie del mundial) o inclusu la desaparición de la so efixe por mor al protagonismu de dellos eventos (los del 92) como otros personaxes de les artes, o monumentos y Comunidaes Autónomes.

 

     La estaya propia de la dictadura franquista tamién tién les sos series especificaes, la postguerra y les dos series cola efixe de Franco (d’adultu y de vieyu), aparte de les monedes que mandó acuñar en plena Guerra Civil. Tamién les de la II República tienen les sos series ennates de la guerra y durante la mesma. Equí ya se puen atopar ya dalguna piecina cara, por exemplu, la moneda de fierru de la II República. Otru grupu propiu de la época ye el referíu a les monedes de necesidá, emitíes por gobiernos autonómicos, conceyos ya inclusu comercios y fabriques. Esti campu ye pergrande enforma, pero hai que dir con pies de plombu, ya que les emisiones suelen ser percares y circulen abondes falsificaciones.

     Les estayes anteriores a la Guerra Civil (dende’l nacimientu de la peseta col Gobiernu Provisional hasta Alfonsu XIII) ya suelen tener pieces de ciertu valor y cares pal bolsiellu, hai que tener en cuenta que los materiales emplegaos nes acuñaciones yeren l’oru, la plata y el cobre. Aún asina, delles vegaes podemos alcontrar pieces a un bon preciu.

 

     Pa finar, decir que tamién hai dellos colleicioniste que prefieren centrase en colleiciones más pequeñes p’algamar una meyor calidá de les pieces; ye’l casu de xente qu’atropa, por exemplu, duros de la peseta en plata. Pa esti tipu de colleicionismu ya hai que tener muncha paciencia, percorrer tiendes y feries especializaes y tener perres aforraes (si bien dellos tipos son asumibles, un duru curiosín d’Amadéu anda pelos 20 euros, otros son bien caros).

 

Moneda vieya peninsular y colonial

     Ampliu abanicu tenemos equí, dende les primeres monedes aparecíes pela península de la man de los griegos, hasta les de la reina Isabel II (tres d’ella vendría la peseta). Podemos especializanos n’estayes, reis, tipos, metal de fechura... Ya tamos falando d’un campu a la medía d’un numismáticu o d’un colleicionista que manexe ciertu poder económicu (vamos ver, lo normal n’estes colleiciones ye gastar unos 150 o 200 euros por pieces que delles vegaes tienen un estáu de conservación BC o menos, asina que ya podeis imaxinavos el preciu d’una pieza en bon estáu). Los llugares más afayaízos p’atopar estes monedes suelen ser subastes o tiendes especializaes (dambes dos tamién esisten on line).

     Hai un mundín na numismática española ente maravedinos, escudos y reales, asina como períodos na hestoria: monarquía hispánica, Guerra de la Independencia, columnarios... O tamién moneda íbera, griega, visigoda o romana nel territoriu hispanu. Una colleición perguapa n’esti sen ye la de los reales d’a ocho de plata, o los denominaos columnarios, acuñaos nes antígües colonies d’América, una de les más cotizaes a nivel mundial, sobre too nos Estaos Xuníos, que pa eso foi la so primer divisa y la madre del dólar. Ensin embargu, la estaya que más seguidores tién ye la qu’abarca el reináu de Fernandu VII pola bayura d’acuñaciones de tou tipu y metal qu’esti odiáu rei dexó pala posteridá.

      Por norma, les pieces d’estes colleiciones tan circulaes y bastante deterioraes, mas trátase d’una de les colleiciones más rentables y valioses de toes, ya pola escasez de pieces, la conservación y calidá de les mesmes, ya inclusu pol metal usao na so fabricación (principalmente plata, cobre y oru en menor medía). Tamién ye verdá que’l desembolsu pue ser mayor, d’ente unos pocos d’euros a dellos miles.

Moneda conmemorativa non circulable española

      Tolos años la FNMT-RCM fai una serie de monedes d’oru y plata (o d’ambos dos xuntos) conmemorando dellos eventos o efemérides y van dirixies dafechu pal mundu del colleicionismu. El so valor mercantil ye bastante mayor al del so valor facial, polo que ya tamos falando d’una colleición que necesita más aporte de capital. Lo bono que tién ye que ye una colleición que va revalorizándose a mediu plazu, gracies a lo llimitao de la so emisión, unes 20.000 pa les de plata y unes 3.000 pa les d’oru y a la xuba del valor del metal con que ta fabricada col pasu del tiempu. Quiciás lo negativo seya que son colleiciones que necesiten unos cuidaos más personales ya que sobre too, les monedes de plata, son de calidá preba (proof). 

     La FNMT ye l’únicu organismu autorizáu p’acuñar y distribuir esti tipu de monedes y suel emitir les colleiciones en dellos formatos: mou cenciellu (una moneda d’oru o plata), doble (una d’oru y otra de plata) o múltiple (una d’oru y cuatro de plata de distintos tamaños). Seya cual seya, les monedes vienen toes dientro d’una cápsula plásticu tresparente asitiaes nun estuchín forráu y de tapa dura, enfundao too ello nuna caxina de cartón. Aparte, vienen con un certificáu numberáu qu’acredita l’autenticidá de les pieces, les sos carauterístiques y la serie a la que pertenez el conxuntu. Anque nun lo pareza, esti papelín ye tan importante como la bona conservación de la moneda y los sos envoltorios (cápsula, estuche y cartón), polo que a la hora mercar esti tipu de monedes hai qu’esixílu si nun lu llevare; en casu contrariu, meyor nun mercar. Too esto ye perimportante inclusu de cara a la revalorización de la pieza o la colleición a la que pertenez, asina como pa una posible venta.

Estuche de colleición completu

     Les monedes de plata tan feches con una llei de 925 milésimes y les d’oru de 999 milésimes. Tamién tienen un módulu y un pesu específicu; como nun son de circulación, les carauterístique de fabricación son esclusives del estáu acuñador.

Moneda estranxera

     Nun ye que seya recomendable esti tipu de colleiciones pa un ciudadanu español, salvo no referente a colleicionar euros, más que nada porque nun ye tan fácil atopar monedes de ciertos países (los que nun son europeos principalmente) y porque nos podemos meter nun enguedeyu que pa qué pola pila países y divises que hai pel mundu. Ensin embargu, una colleición curiosina sedría la d’atropar les caberes series de les monedes tipu de los países europeos que güei enplegen l’euru. Nun son difíciles d’atropar en tiendes especializaes en calidá SC y a bon preciu. Otra colleición curiosina ye la d’atropar pieces de países ya desaniciaos (Yugoslavia, Unión Soviética, República Democrática Alemana… ya inclusu del III Reich nazi); son más difíciles d’alcontrar en tiendes, pero per internet hai de too. Si teneis la suerte de viaxar pel mundu ye un bon mou de conseguir pieces d’estes, tanto si circulen como en tiendes especializaes del país. Eso sí, esti tipu de colleiciones suelen ser más bien por gustu y non cola fin d’esperar una revalorización de la mesma, dafechu, de xemes en cuandu sal pela tele el típicu colleicionable per fascículos dedicáu a monedes y billetes del mundu.

Una bona idega pa facer esti tipu de colleiciones ye la de conseguir una guía de monedes mundial. Pa eso, los meyores son los americanos. La editorial Krauser ye una de les más especializaes, nel sen de que hasta tienen espublizaos llibros coles monedes tipu y les conmemoratives de cualisquier país. Tamién podemos tirar de la rede, pero hai muncha puxarra xubío, asina que cuidao.

 

Moneda conmemorativa estranxera

       Nun suel ser una colleición mayoritaria y dafechu nun suel revalorizase cola mesma presteza que la nacional, salvo que tengamos contautos fora. Aparte, son más difíciles d’atopar, inclusu les destinaes a la circulación. Ensin embargu, tán mui de moda les colleiciones de monedes USA: existe una perguapa en cuartos de dólar dedicada a los estaos americanos y asociaos. Hai otra d’a dólar coles efixes de los sos presidentes; n’estos casos el desembolsu de perres ye llevaeru y son fáciles d’alcontrar en tiendes especializaes españoles.

      Otru casu son les monedes estranxeres de plata, oru y prooof: equí el desembolsu ye mayor y la merca de pieces ye un pocu más complexo, ya que non en toles tiendes numismátiques pue mercase esti productu; ye más fácil atopalo per Internet, colo que tendríemos lo más seguro, que pagar un estra pol tresporte. Equí voi destacar les pieces conmemoratives en plata feches en Rusia y Bielorrusia, los grabadores d’estos países son auténticos artistes, herederos de los soviéticos, ya que les monedes d’eti tipu acuñaes na XRSS son tamién verdaderes ayalgues.

Moneda antigua estranxera

      Ye mui difícil d’atopar nes tiendes nacionales; solo con viaxes al estranxeru, internet o dalgún comercial qu’importe esti material ye posible. De toles maneres tampoco ye mui recomendable ya que ye un campu per llimitáu y bien costosu, polo que nun nos resultaría una bona inversión, salvo que seya un caprichu, caro. Probablemente, n’esti tarrén destacaría los Pillar Dollars americanos, como herencia direuta de los reales d’a ocho españoles acuñaos en Méxicu (los columnarios).

La colleición como inversión

      Como cualisquier otru productu, les monedes puen mercase y vendese; poro, hai que tar soyerte a la llei de la oferta y la demanda, pa mercar a bon preciu y vender inda meyor. Pa ello necesitaríemos un arma infalible de tou bon colleicionista, la paciencia.

      A la hora invertir hai que buscar el tipu de moneda a atropar. Principalmente, les más solicitáes sedrán les de metales nobles (ouru y plata) siguíes de les d’antíguu cuñu o d’acuñación escaso (que puen ser tamién de metales nobles) y finalmente les del tipu FDC (Flor de Cuñu) y SC (Ensin Circular). A too ello hai que sumá-y la calidá de la colleición o pieza, siendo perimportante mantenela bien conservada.

      Muncho cuidao coles monedes d’oru y plata conmemoratives, alcordaivos qu’esti tipu monedes dixebren enforma el so valor facial del de mercáu. Esti tipu de moneda ye la que más espuesta ta a la xuba y baxada de los metales nobles nel mercáu internacional, polo que nun ye raro que varíe’l preciu de compra d’un añu pa otru; hai que tener en cuenta que les monedes que s’acuñen n’esti formatu nun varíen les sos dimensiones nin la llei del metal, poro, solo tién en cuenta el valor mercantil de los llingotes d’oru y plata con que se faen. Una moneda que ya tenga unos añinos ya habrá incrementao el so valor. Como remate, indicar que les monedes d’oru tan esentes de pagar l’IVA, poro, el so valor sedrá el mesmu en cualisquier parte del mundu. Non asina les de plata, que tán supeditaes al IVA que-y quiera otorgar el gobiernu de turnu (nel casu español, lleva el valor más altu de dichu impuestu).

      Otru puntu a tener en cuenta a la hora colleicionar monedes, ye’l de la so llimitación, esto ye, el númberu de pieces acuñaes del mesmu tipu. Toles monedes, incluyíes les comunes coles que mercamos, tienen un númberu llimitáu d’acuñaciones; poro, cuantes menos acuñaciones se fagan d’un tipu, más valor algamarán nel mundín del colleicionismu. Nel casu les monedes conmemoratives, el so preciu de mercáu ya ye altu de salida pola so llimitación (nel casu de la FNMT les monedes de valor facial de 10 euros en plata suelen llimitase a 20.000 unidaes y les d’oru de 200 euros, a 3.000). Delles vegaes, nun fai falta que les monedes seyan de metales nobles p’algamar un altu valor nel mercáu, basta que pertenezan a una emisión d’una serie llimitada (esti ye’l casu de les monedes d’euru acuñaes pol Vaticanu, Mónacu o Sanmarín, que son per llimitaes y que van direutamente al mercáu del colleicionismu como monedes FDC y SC); nesti casu, al nun haber metales nobles pel mediu, el so valor de mercáu tará fincáu pola demanda del mesmu asina como’l pasu’l tiempu, gran aliáu, por ciertu, de les bones colleiciones bien cuidaes.

      Esiste tamién un tipu de colleición ya de por sí bien escasu poro, valoratible. Ye’l de les pieces defectuoses o erros. Durante’l procesu de fabricación d’una moneda pue asoceder dalgún fallu bien a la hora grabar el cuñu, bien a la hora d’acuñar el cospel… Estos erros suelen tar bien cotizaos nel mundu’l colleicionismu, sobre manera si la pieza ye rara o escasa.

      La colleición de variantes tamién suel ser común sobre too nes monedes antígues, hai que tener en cuenta qu’antanu acuñábase a mazazu llimpiu y qu’había delles ceques dedicaes a la fabricación de nimberariu nel mesmu país, poro, nun ye un res raro atopar monedes del mesmu valor y añu pero con dalguna diferencia nes cares.

      El colleicionismu de moneda antigua ya ye un pocuñín más abegosu. Necesítase un capital mayor (o más tiempu p’aforrar), y más esperiencia, sobre too pa evitar que nos estafen con una pieza falsa, asina como pa conservar les pieces en condiciones óptimes. Tamién ye un campu onde los colleicionistes han de buscar una bona calidá a bon preciu, esplorando nes tiendes numismátiques asina como nes subastes del ramu. La moneda antígua revalorízase con cierta facilidá aun teniendo un estáu de conservación non mui bonu; ello suel ser debío a la so escasez principalmente. Sábese de munches monedes vieyes que foron desmonetizaes na so época, fundíes y usaos los sos metales pa facer nueves monedes o pa otros servicios. Tamién ye verdá qu’antanu el colleicionismu yera propio de personaxes acaudalaos y que los medios de conservación de les pieces distaben muncho de los d’anguañu, lo que fexo que munches monedes se perdieren irremediablemente.

Dineru aragonés

Ú mercar

      El meyor llugar ensin dubia ye nuna tienda especializada. De man atenderanos cara a cara un profesional del ramu que nos asesorará en tolo concerniente al colleicionismu: merca de pieces, cómo cuidales y guardales, valoración, identificación ya inclusu tasación de pieces rares... Aparte d’esto, como en tou pequeñu comerciu, un bon cliente tendrá un bon aliáu a la hora buscar, reservar ya inclusu canxear pieces; tamién a la hora d’enteranos de novedaes y chollos. Como ye un mecáu relativamente escasu, un bon vendedor conocerá tan bien a los sos clientes como a les sos colleiciones, polo que pue tenenos al corriente de posibles adquisiciones que nos interesen. De toes toes, a la hora mercar una moneda antígua específica (y sobre too de ciertu preciu) lo meyor ye visitar delles tiendes y facer una comparación calidá-preciu enantes de llanzase a la primera de cambiu. Anguaño esto tamién pue facese a traviés d’internet gracies a que munches tiendes numismátiques ofrecen los sos productos con precios y semeyes. La FNMT tamién tién les sos tiendes, tanto física (Aeropuertu Barajas) como virtual www. Fnmt.es. Aparte d’esto, n’estes tiendes hai tamién material abondo pa conservar la nuesa colleición (álbunes, cápsules, llibros...).

      Esisten tamién mercaínos numismáticos en delles ciudaes con fecha ya fixada; suelen ser selmanales o mensuales, lo que ye bastante bono a la hora buscar una pieza determinada, pues nos permite una visita rápida a los distintos puestos. N’esti tipu mercaos nun hai problema, ya que son toos profesionales del ramu. El problema podemos tenelu n’otros mercaos (los selmanales de cada pueblu) onde suel ponese siempre dalgún vendedor d’antigüedaes col que hai que tener cuidao, ya que pue ser un llistucu que nos quiera colar una moneda falsa, o una válida por un preciu más bien altu; o tamién pue nun saber lo que tién ente manes y sacar nos un bon chollu. Estos mercaos son ideales si atopamos dalgún mercader, seguramente estranxeru del Magreb, que nos pueda ofrecer monedes del mundu árabe principalmente. Delles vegaes tamién pon el so kioscu dalgún numismáticu especializáu inclusu en moneda estranxera, non tan fácil d’atopar nes tiendes. Otros mercaos son los d’antigüedaes o los de colleicionismu, pero estos suelen ser anuales y nun se fain en toles ciudaes.

      Internet ye lo cabero n’entrar nel mundín del colleicionismu, ehí tá eBay por exemplu. Nun ye un tarrén mui fiable, salvo les tiendes virtuales d’especialistes, polo que lo meyor ye informase enantes n’una tienda si conocen a daquién que quiera vender dalguna pieza y que seya de confianza.

      Otru llugar, sobre too pa monedes de metales nobles, son les tiendes de compra-venta d’oru ya inclusu tiendes de segunda mano, pero hai que vixilar bien los precios.

     P.D.: Como cualisquier colleición, nun hai norma escrita a seguir, podemos montar la nuesa como nos pete, d’animales, botániques, arquiteutóniques, solo d’un metal específicu, solo cola tema militar, les d’una ceca, o d’una rexón (dende l’antiguedá a güei)… lo importante realmente ye que a ti te preste y que dea sentíu a les tos inquietudes. Ye por ello qu’esto nun ye más q’un artículu orientativu de lo que pues atopate a mou xeneral n’esti mundín. Eso sí: cuídala y arriquézela y sobre too, PACIENCIA.