2016: Nueva Reforma de 1866

Motivu conmemorativu: 150^u Aniversariu de la Nueva Reforma de 1866

Volume d’emisión: 85.000 pieces           Fecha d’emisión: Avientu

     El sistema de seleición del Conseyu Xeneral andorrán databa de la Edá Media; el Conseyu Xeneral y el Comunal, taben controlaos por un seleutivu grupu de famílies o cases poderoses (nomaes focs), dexando de llau a un bon númberu de famílies de condición más probe (y conocíes col nomatu de casalers). Los graves abusos de l’alministración asina como’l control d’ésta de los bienes y propiedaes comunales afitó un malestar xeneral nel país, lo que fexo que los casalers, unes 600 families frente a 179 focs ya ensin representación nos Conseyos, se quexare al copríncipe del llau español l’obispu de la Seo d’Urgell José Caixal y Estradé. El 14 d’abril de 1866 fínase la reforma empobinada por Guillem d'Areny Plandolit y Antón Maestre y el 22 sal p’alantre’l Decretu debío a la urxencia ante’l deterioru de la situación y cola idega d’evitar males mayores. Esta democratización del país cola Nova Reforma fexo que’l pueblu andorrán algamare una participación más activa nos temes de gobiernu. Los principales cambeos foron:

     - Drechu de votu pa tolos xefes de família

     - Incompatibilidá ente’l cargu de Conseyeru Xeneral y el de Conseyeru del Común, asina como la duración de los cargos por cuatro años.

     - Renovación de los conseyeros -Xenerales o del Común- cada cuatro años.

     - Llimitación del númberu de conseyeros del Común en cada parroquia.

     - Creación del cargu de Comisionáu del Pueblu, cola fin de fiscalizar o controlar a l’Alministración y les cuentes públiques.   

     El copríncipe francés Napoleón III aprobaralu dos años más tarde, el 10 d’abril de 1868.

     Esta Nueva Reforma marca un fechu perimportante na historia d’Andorra, ya que suposo la tresformación política y social del Principáu a los tiempos d’anguañu.

     Nel intre la moneda aparez  la sala principal de la Casa la Vall, sée del Parllamentu d’Andorra. Arrodia’l diseñu la lleenda 150 ANYS DE LA NOVA REFORMA DE 1866; so ella l’añu d’emisión 2016 y na base’l nome del país emisor ANDORRA.

     Nel aniellu esterior, les doce estrelles de la Xunión Europea.