Gobiernu d’Euzkadi

     Alcontrándosese aislada del restu la zona republicana, l’Autonomía d’Euzcadi decide formar un Gobiernu Vascu de coalición ente’l Frente Popular y el PNV. Creó un exércitu propiu (Gudaris) controláu pol PNV y claramente dixebráu del restu del exércitu republicanu (dafechu, l’exércitu del PNV rindiose a Franco definitivamente en Santoña, Cantabria, mientres que los soldaos socialistes, comunistes y anarquistes vascos llucharon y morrieron defendiendo Santander y lluéu Asturies). Formó tamién una marina guerra, asina como un cuerpu de policía (la Ertzantza, primeramente, nomada Policía Militar d’Euzkadi). Mesmamente, controló les Relaciones Esteriores con delegaos en Francia y Reinu Xuníu principalmente; estendió pasaportes y acuñó moneda propia. El 19 xunu de 1937 cae Bilbo y, a primeros de xunetu, el restu Bizcaia en manes rebeldes, finando asina la contienda militar n’Euskadi.

     Les monedes vasques foron acuñáes pola ceca de Bruseles (Bélxica) tres gana-y el concursu a la de París (Francia). El mandáu del Gobiernu Vascu féxose a traviés del so delegáu en Francia, Rafael Picavea. El pedíu concretu foi de 6 millones de pieces d’una peseta y 2 millones de 2 pesetes. Los diseños del tipu foron obra del escultor y grabador Armand Bonnetain y los cuños salieron del taller de Alexandre Everaerts, xefe del Departamentu de Grabáu. Los cospeles foron fabricaos pola empresa S.A. des Usines à Cuivre et à Zinc de Liège (anguaño nomada Copperweld Tubing Europe SPRL) en Chenée, Liexa. Tardáronse siete selmanes n’acuñar tala cantidá de monedes (ente xineru y febrero de 1937) y el so coste final foi de 2.125.000 francos belgues, la mitá per delantre y el restu a la entrega.

     La fin de la guerra n’Euskadi impidió qu’aparecieren nueves acuñaciones con nuevos diseños de Bonnetain pa valores d’una, dos y cinco pesetes vasques.

1 peseta (1937)

2 pesetes (1937)