Esto ye lo referente a Castiella, porque Carlos tamién heredó tolos reinos y territorios de so pá Felipe, el so güelu Fernandu y consiguió que lu escoyeran rei de los romanos pa llueu ser tituláu emperador del Sacru Imperiu Romanu Xermánicu. Muncho poder pa un solu home, y asina –y salieron milenta enemigos.
Xuana y Carlos como reis de Castiella
Xuana yera la reina de Castiella, ensin embargu, debío a la so supuesta enaxenación mental y al caberu testamentu robláu pola reina Isabel la Católica, el gobernador de factu del reinu pasó a ser so pá Fernandu, que tamién lo fadría en nome del so ñetu Carlos de Gante, y que “durará fasta quel dicho ylustrísymo principe de Castilla (Carlos) aya hedad de veynte e çinco años". En 1516 morrería Fernandu y Carlos pasaría a ser el nuevu Gobernador de Castiella, que non rei, en nome de so ma, la braera reina. Carlos exercería dende Flandes y a traviés de los sos embaxadores en Castiella, tola presión posible pa que les Cortes castellanes lu titularen rei, cosa qu’a la fin consiguió, pero roblando tamién una cláusula onde se comprometía a dexar el cargu si Xuana recuperaba’l xuiciu (Carlos caltúvola enzarriá en Tordesilles y tuvo d’enfrentase a una revuelta de nobles conocía hestóricamente como “la revuelta de los Comuneros”; reconoció’l títulu rexu de so ma, pero elli foi’l rei dafechu, como enantes fixeren Felipe y Fernandu). Llegaría a Castiella en 1517 y xuraría los sos Fueros, proclamándose rei con 17 años (ya tenía daqué d’esperiencia, pues gobernaba les sos tierres flamenques dende los 15 años).
Les primeres acuñaciones, en Flandes (1517)
Les primeres acuñaciones de los nuevos reis de Castiella foron feches en Flandes, na ceca d’Amberes, a imaxe y semeyanza de les feches pol so pá Felipe y calteniendo mesmamente la métrica aprobada polos Reis Católicos na Pragmática de Medina del Campo de 1497. Acuñáronse pieces de real, mediu real y cuartu de real de plata, con una llei de 895 milésimes. La primer impresión ye qu’esti numberariu foi acuñáu cola fin de sufragar el viaxe dende Flandes a Castiella del nuevu monarca, ensin embargu, nun pue negase la so fuercia propagandística, sobremanera de cara a los sos detractores, al apaecer titulaos como reis ma y fíu, asina como l’apaición de tolos escudos reales xuntos de los Trastámara y los Austria.
Acuñáronse unes 175.000 pieces de real, con un pesu aprosimao de 3,43 gramos. Nel anversu figuen les armes reales de los reinos asociaos a Castiella y Aragón y los de Flandes (los escudos de Castiella, Llión, Granada, Aragón y Dos Sicilies, y pel otru, Austria, Borgoña antíguu, Borgoña modernu, Brabante, Flandes y Tirol) toos baxo una mesma corona real; na lleenda apaecen los sos nomes, IOANA ET KAROL, xunto al consabíu D(EUS) G(RATIA) pa siguir marcando los nomes de los sos domeños (CASTEL LEG), que continúen pel reversu (ARAG ZC RE(GES) ARCHID AVSTR DVCV BVRG B), llindiando les armes de los Páises Baxos borgoñones y la familia de los Habsburgo (cruz de San Andrés, Toisón). Equí tamien apaez l’añu acuñación y la marca la ceca (una man).
 |
|
1 real de 1517. Ceca d’Amberes |
De los medios reales acuñáronse 50.000 pieces d’1,72 gramos de pesu. Lleven nel anversu les iniciales de los reis, ca una cola so corona y la consabía lleenda colos sos nomes y la gracia de Deus, pa llueu seguir nel reversu colos nomes de los reinos que llindien un candelabru coronáu. La marca la ceca vién nes dos cares.
 |
|
Mediu real. Ceca d’Amberes |
Y pa finar, 25.000 pieces de cuartos de real, con un pesu de 0,85 gramos onde apaecen les iniciales coronaes, ca una nuna cara y dambes dos llindiaes polos sos nomes y los sos reinos peninsulares (al ser tan piquiña nun entraben los del Austria, lo que yera de menos, ya que la idega yera reafirmar les sos pretensiones sobre los reinos hispánicos y los sos domeños).
 |
|
Cuartu de real. Ceca d’Amberes |
Les acuñaciones de Castiella (1525-1535-1555)
A decir verdá, poques monedes acuñen los nuevos monarques nos sos domeños castellanos, dafechu, caltiénense nes acuñaciones los tipos aprovaos polos Reis Católicos na Pragmática de 1497. Dizse que la causa primera débese a la solvencia y seguranza que les monedes católiques ofrecíen n’Europa (n’Europa ya yera común falar d’Hispania y non de Castiella y Aragón, precisamente pola xuntanza de dambes dos corones baxo un mesmu tronu, magar que yera Castiella la braera potencia económica y militar de la Península Ibérica). Nel capítulu referíu al numberariu de los Reis Católicos, apaecíen unos maravedinos difíciles de catalogar y que’l profesor David Martínez Chico asitiaba, posiblemente ya nel reináu de Xuana y Carlos. Según José Mª de Francisco Olmos, ye segura esta aseveración, ya inclusu marca l’añu de 1520 como entamu de diches acuñaciones.
A partir de 1525, apaecen maravedinos, acuñaos nes ceques de A Coruña y Segovia, que caltienen los tipos de los anteriores, el castiellu (con granada) y el llión como emblemes de los reinos de Castiella y Llión y camudando los títulos de los Católicos polos de los nuevos reis IVANA ET CARLOS REGINA ET REX. Arriquecíos en plata, son conocíos como “de vellón ricu”. Apaecen tamién les marques de la ceca y la del ensayador.
La pieza de 2 maravedinos, tién un pesu aprosimao de 4,80 gramos y unos 24 milímetros de diámetru. La de cuatro, unos 9,60 gramos y 30 milímetros. La llei ye d’unos 22 granos y mediu de plata (88,50 milésimes) frente a les anteriores, de tan solo 7 granos de plata (24,30 milésimes).
 |
|
2 maravedinos de Segovia
|
 |
|
4 maravedinos de Segovia |
La so acuñación duró solo hasta 1528 y pue certificase que foron les primeres monedes acuñaes en Castiella a nome de los nuevos monarques. Tres elles, curiosamente, volvieron a acuñar vellón a nome de los Reis Católicos.
La moneda de plata de referencia n’Europa ye’l thaler austríacu, y quien diz Austria diz Habsburgu, y quien diz Habsburgu diz Carlos. En 1520 ya tenía asegurada la corona imperial romano-xermánica (foi coronáu en 1530) polo qu’aprovechó esti fechu pa esparder la nueva moneda per tolos sos domeños cola so efixe y títulos, tanto los llocales como l’imperial. Nel casu de Castiella, la moneda referente yera’l real de los Reis Católicos, una moneda reconocía en toa Europa, pero d’unos 3,40 gramos de pesu y 27 milímetros de módulu y que la facía mínima frente a les pieces que ya se movíen pel continente, d’unos 30 gramos y 40 milímetros. Carlos I, como rei de Castiella, hebo de modificar el sistema castellán p’adutalu al thaler. Pa ello y tomando como base la Pragmática de los Católicos de 1497, introdució una nueva moneda de referencia, con un pesu aprosimáu de 27,45 gramos, y a la que tuvo que “bautizar” col nome de real d’a ocho y del que saldríen los sos submúltiplos de dos y cuatro reales. Pa nun perder pesu n’Europa, caltuvo los diseños aprobaos en Medina del Campu polos Reis Católicos, incluyíes les lleendes, poro, les nueves y modernes monedes castellanes llabraríense a nome de los sos güelos (Pragmática de 1537, sancionada por Xuana I y Carlos I como reis de Castiella).
 |
| Real d’a 8 a nome de los Reis Católicos. Ceca de Sevilla |
La única moneda de real emitía a nome de Xuana y Carlos, ye posterior al 1550 ya inclusu dellos estudiosos dátenla ya dientro de los primeros años del reináu de Felipe II. Fuere lo que fuere, estes acuñaciones son bien rares y escases (los caberos estudios falen d’un erru a la hora acuñales al emplegar el cuñu diseñáu pa los escudos, la nueva moneda d’oru del reinu. Nel reversu caltienen los símbolos identitarios de los Reis Católicos, el xugu y les fleches, xunto cola lleenda REX REGINA CASTELLE LEONIS (o lo qu’entrare). La novedá ta nel anversu, onde apaecen los sos nomes IOANA ET CAROLUS D(EUS) G(RATIA) con un novedosu escudu onde amás de les típiques armes de Castiella, llión, Granada, Aragón y Dos Sicilies, apaez l’escudu Navarra xunto a la Cruz de Xerusalén (Fernandu invadió Navarra, proclamándose rei. El títulu de rei de Xerusalén diba asociáu al de Sicilia dende 1277). La talla de la pieza, 931 milésimes de plata, 3,38 gramos de pesu y 24 milímetros de módulu. Segura ye la so acuñación en Sevilla, anque’n dellos cartafueyos apaez tamién Toledo.
 |
|
1 real de Xuana y Carlos (1550-1566) |
La moneda d’oru de Castiella yera l’escelente de la granada acuñáu polos católicos según la Pragmática de 1497, conocíu tamién col nome de ducáu castellán. Yera una moneda que –y prestaba al rei Carlos por ser poderosa y apreciá n’Europa, tanto, que la saca d’escelentes, sobremanera haza Francia, yera constante. Francia facía una de les peores monedes d’oru d’Europa, tosques, feches con oru ensin afinar y de 22 quilates, pero a la que igualaba con los ducaos y florines europeos, dándo-y un valor más altu del real. La idega yera conseguir monedes d’oru finu canxeaes pola de so, fundiles y facer más escudos franceses, quedando’l restu del oru como beneficiu. Sorprendentemente, la xeneralización de los escudos franceses faen que les monedes d’oru bonu desapaezan (o bien son atesoraes, o bien fundíes) y consiguen ser les monedes preferíes hasta de los mercenarios pa les sos retribuciones. L’esmolecimientu de los tesoreros castellanos ye tal que recomienden al rei que faga ducaos de menor llei, 18 quilates, pero Carlos quier una moneda fuerte, digna d’un emperador y refuga cualisquier idega. Ensin embargu, hebo d’acatar la petición de les Cortes de Valladolid de 1537, onde se regulaben les carauterístiques de la nueva moneda castellana, ya nomada escudu, y que tendría una llei de 22 quilates (916,7 milésimes d’oru finu) a 68 pieces por marcu (unos 3,38 gramos de pesu) y equivalente a 350 maravedinos. El módulu rondaría los 23 milímetros. Les ceques encargaes de la so acuñación sedríen les de Burgos, Cuenca, Granada, Segovia, Sevilla y Toledo, toes elles identificaes na moneda cola so respeutiva inicial, esceutu Segovia, que va col so consabíu acueductu. Apaez tamién la marca del ensayador.
 |
|
1 escudu. Ceca de Toledo |
L’escudu real qu’apaez nel anversu ye toa una declaración d’intenciones frente al so sempiternu rival Xicu I de Francia. Xunto a les armes de Castiella, Llión, Aragón y Dos Sicilies, apaez la Cruz de Xerusalén, identificándose asina Carlos como rei de Xerusalén, títulu asociáu al reinu de Nápoles (la Sicilia continental) y les Cadenes de Navarra, territoriu de permanente conflictu ente Francia y Castiella. L’escudu va rematáu con una corona real y non imperial, puesto que les pretensiones de Carlos parten dende los sos domeños hispánicos (y los de so ma) y non dende’l tronu imperial. Esto queda bien claro nel reversu la moneda, de nuevu la Cruz de Xerusalén, pero sobre too, la novedosa lleenda HISPANIARUM REGES SICILIAE, dexando bien nidio qu’elli y so ma mandaben en toa Hispania (incluyía Navarra y esceutuando Portugal) amás de los territorios itálicos pertenecientes a la Corona d’Aragón. No que se refier a la numisma castellana, ye la primer vegada qu’apaez dicho títulu d’Hispaniarum, nin los Reis Católicos lu emplegaren, pero dende agora va ser divisa indispensable de los futuros monarques hispánicos.
En 1543 y dexuru qu’al so pesar, Carlos mandó francer los cuños de los escelentes católicos, desaniciando asina los ducaos castellanos y dexando como única moneda áurea del reinu al escudu.
El numberariu de los reis na Corona d’Aragón
La coronación de Carlos como rei d’Aragón foi más complexa que la de Castiella. Fernandu II nun tenía descendencia varona y les muyeres nun podíen heredar el títulu. La principal preocupación de Fernandu yera caltener la xuntanza con Castiella, onde la so fia Xuana ya taba reconocía como reina. A la fin, les Cortes aragoneses cedieron a les pretensiones del rei, pero dexando bien nidio qu’esti casu nun diba creyar xurisprudencia nin diba camudar los Fueros aragoneses, Tan solo yera un “contratu” ente les Cortes y Fernandu. Xuana xuraría como heredera al tronu aragonés. A la muerte de Fernandu, entamose una griesca dientro les mesmes Cortes aragoneses que pa simplificala, finó col xuramentu de Carlos como Carlos I d’Aragón y dexando de llau a Xuana, que d’heredera al tronu pasó a ser la ma del rei (pero reconocía como reina de Castiella xunto al so fíu).
La llabra de numberariu aragonés centrose na ceca de Zaragoza; la so marca ye CA (Caesar Augusta). Si bien ye verdá que s’acuñó dineru de vellón a nome de Carlos, los reales de plata y ducaos d’oru veníen acuñaos a nome de Xuana, primero, y Carlos como reis d’Aragón y los sos domeños. Les Cortes de 1519 promulgaron l’aprovación de llabra de reales y mediu reales cola llei y talla de los castellanos.
Los reales mayores lleven nel anversu la Señal d’Aragón coronada cola lleenda IOANA ET KAROLUS DEUS GRATIA REX ARAGONVM (o lo qu’entrare). Nel reversu va la cruz de San Xurde cantonada con cuatro cabeces de moru xunto a la Cruz d’Iñigo Arista cola lleenda TROPEA RENVM ARAGONUM y l’añu acuñación. La marca la ceca vién en daluna de les dos cares, y dellos, col so valor nominal (en númberos romanos) y la R de real. Apaez tamién la marca del ensayador Luis Sánchez (LS).
 |
|
1 real de 1520 |
 |
|
1 real (variante) tamién de 1520 |
 |
|
4 reales (R IIII) de 1547 |
 |
|
10 reales (R X) de 1554 |
El mediu real lleva nel anversu los monogrames reales coronaos, I pa Xuana y K pa Carlos, xunto cola marca la ceca y la lleenda indicativa de los sos nomes col título real aragonés. Nel reversu vién la Señal d’Aragón con Cruz d’Iñigo Arista y la consabida lleenda.
 |
|
Mediu real |
En 1528 autorízase la llabra de ducaos y medios ducaos d’oru, cola llei y pesu de Castiella. A nome de los nuevos monarques acuñáronse monedes de dos ducaos (dobles ducaos). El diseñu de la pieza ye una semeya de los ducaos zaragozanos del rei Fernandu II colos bustos enfrentaos de los monarques, n’esti casu, Xuana y Carlos, nun anversu llindiáu pola lleenda IOANA ET KARLOS DEI GRA(TIA) RE(GINA ET) RE(X) AR(AGORUM) y una C de la ceca. Nel reversu vién la Señal d’Aragón coronada y llindiá pola marca la ceca CA y la lleenda colos sos domeños, Aragón, Valencia y Barcelona.
 |
|
Doble ducáu |
Otra variante de dos ducaos indica nel reversu la lleenda de Xuana y Carlos reis d’Aragón, n’esti casu con lletres llatines y la marca del ensayador LS.
 |
|
2 ducaos (o doble ducáu). Variante |
Esiste una serie d’ostentoses pieces d’oru y de medíes desorbitaes pa ser emplegaes como moneda. Lo más probable ye que fueren feches a mou de medalla como agradecimientu a los reis por dalgún fechu (al paecer, la de 100 ducaos trataríase d’una medaya obsequiu de les Cortes de Monzón de 1528, n’agradecimientu por sofitar les obres de la Canal d’Aragón). Al igual que nes monedes, lleven los bustos enfrentaos cola marca de la ceca C, pero cola lleenda IOANA ET KAROLVS REGES ARAGONUM TRVNFATORES ET KATOLICIS. Y nel reversu, la Señal d’Aragón coroná (estola col so nome ARAGONVM na de 100 ducaos) y marca del ensayador LS; alreor, la lleenda IOANA ET KAROLVS EIVS FILVS PRIMO GENITVS DEI GRACIA R(E)X (Xuana y el so fíu primoxénitu, rei pola gracia dios).
 |
|
20 ducaos |
 |
|
50 ducaos |
 |
|
100 ducaos |
Condáu de Barcelona
Los reis aragoneses ostenten tamién el títulu de Condes de Barcelona dende la xuntanza de dambos territorios col casoriu del conde Ramón Berenguer IV y la reina Petronila d’Aragón allá pel 1137. Ríxese pol so propiu Fueru, el cual esixe que l’herederu del títulu tién de xuralu en persona delantre les Cortes catalanes, lo que faen Carlos y Xuana El 16 d’abril de 1519.
En moneda de vellón, acuñáronse diners, doblers (dos diners) y malles (mediu diner). La pieza más piquiñina ye la malla, d’unos doce milímetros de módulu. La so escasa relevancia fae que los sos diseños se reduzan a una cenciella B col nome BARCINONA alreor y a la senyal catalana nel reversu.
 |
|
Malla |
Los diners y doblers, aceuten un diseñu un pocu más ricu, polo qu’aprovechen a grabar nel anversu el bustu coronáu del conde (ensin so ma), pero llindiáu polos nomes d’ambos dos IOANNA ET CARLVS (o lo qu’entrare) y un reversu con una cruz pasante con círculos y puntos nos cuarteles, con una B, como marca de la ceca y el nome del Condáu, BARCINONA.
 |
|
Diner |
Nun hai acuñaciones de plata, poro no que se refier al oru, la moneda catalana rexíase pola métrica aragonesa y yera conocía col nome de principat (equivalente al ducáu aragonés). Gracies a la fisonomía de los monarques grabá nes monedes y a que delles monedes, les de mayor valor, vienen con añu acuñación grabáu, pue facese una pequiña cronoloxía de la evolución de los diseños.
Los medios principats lleven un diseñu bien cenciellu; nel anversu, les iniciales de los condes llindiaes polos sos nomes IOANNA ET CAROLVS y un reversu cola senyal de Catalunya arrodiá pola lleenda COMTES BARCINON(A).
 |
| Mediu principat |
Un diseñu posterior, inclúi’l título de reis d’Aragón R ARAG.
 |
| Mediu principat (variante) |
La moneda de cuatro principats trai nel anversu unos xóvenes reis, con un Carlos con ropaxe de Flandes y una lleenda que los identifica como reis d’Aragón y condes de Barcelona. El reversu ye esclusivu pa grabar la divisa del emperador, les Columnes d’Hércules y la lleenda PLVS OVLTRE (por ULTRA).
 |
| 4 principats (sobre 1519) |
Los principats dataos de 1521, detaquen principalmente por llevar nel reversu l’escudu de la Corona d’Aragón (Aragón, Catalunya y Dos Sicilies). Nes lleendes grabaes identifiquen a Xuana (primeru) y Carlos como reis d’Aragón y condes de Barcelona.
 |
|
1 principat |
Nos valores mayores, apaez un cetru ente los monarques y una identificación del Toisón d’Oru sobre les sos Tiestes.
 |
|
Doble o 2 principats (1521) |
 |
|
2 principats (variante de 1531, con marca de ceca B) |
Un segundu tipu de 1532, introduz ya l’escudu de les Corones de Castiella y Aragón xuntos. Detacar nel escudu del doble principat, que la preferencia de reinos ta camudá, equí manda Aragón.
 |
|
1 principat |
 |
|
2 principats |
Estos dos principats de 1536 ya vien con novedaes. Nel anversu, Carlos ya ye emperador, indicao asina pola corona que lleva na so tiesta, zarriada, frente a la abierta que porta so ma (como reina d’Hispania). Vese tamién que porta barba (la cual –y disimulaba’l so prognatismu). Nel reversu, y de refuerzu, l’aigla imperial arropia los escudos hispánicos (esti diseñu ya apaeciere nos escudos acuñaos pol emperador en 1535 pa financiar la so espedición militar a Túnez). Ensin embargu, les lleendes siguen indicando que son reis d’Aragón y condes de Barcelona.
 |
|
2 principats del emperador (1536) |
 |
|
2 principats de 1542 (XXXXII) ya ensin aigla imperial |
El vieyu Condáu del Rosellón acuña tamién principats barceloneses na so ceca de Perpinyà. Dataos de 1522, nomen a Xuana y Carlos reis d’Aragón y condes del Rosellón.
 |
|
2 principats de Perpinyà (Rosellón). 1522 |
El so numberariu en Nueva España
Los domeños en Les Indies de castiella diben en aumentu, la presencia de colonos, a más y les necesidaes de numberariu na zona, bayuroses. Fabricar moneda en Castiella, pa llueu mandala p’allá, tórnase agora caro y peligroso, pola tema del so tresporte pela mar y los posibles naufraxos. Ye por ello que Carlos I apreba l’apertura de les primeres ceques del Nuevu Mundu en 1535, asitiaes en Santu Domingu y Méxicu. Méxicu entamará a acuñar en 1536, mentantu, Santu Doningu fadralo a partir de 1542. La construcción de diches fabriques, como llueu pasaría coles futures ceques americanes, corrió a cargu del Estáu, cola fin de dexar bien nidio que la prerrogativa d’acuñar moneda yera esclusiva, ya intransferible, del rei. Dambes dos ceques taben autorizaes a batir moneda de plata y vellón, pero nun teníen permitío acuñar con oru (fechu que ya venía prohibío dende 1503, por orde de la reina Isabel I. Alcordémonos de que ya Colón instó a los reis Católicos a abrir una ceca nes tierres recién descubiertes).
No referente a la tipoloxía del so diseñu, diba camudar con respeutu a lo emitío na península. De mou xenéricu, nel anversu dirá grabáu l’escudu heráldicu de los reinos de Castiella, Llión y Granada, dexando bien claro que los territorios americanos pertenecíen a la corona de Castiella. Nel reversu vendría grabada la divisa del emperador Carlos V, les Columnes d’Hércules xuntu a la lleenda PLUS ULTRA. Col tiempu esta divisa convertirase nel “escudu” identitariu de tolos domeños ultramarinos de la corona castellana. Los títulos a incluyir, los nomes de los monarques y los sos domeños CAROLUS ET IHOANA REGES HISPANIARUM ET INDIARUM, bien novedosu, por ciertu, si tenemos en cunta qu’equí apaez primero’l nome del rei enantes que’l de so ma y que xeneralizen los sos domeños peninsulares nomándolos Hispaniae (polo que tamién entren los otros reinos, Aragón y Navarra). Una real cédula del 24 d’abril de 1545, ordena que les monedes acuñaes en Santu Domingu y Méxicu seyan de cursu llegal tanto nes provincies americanes como nos reinos peninsulares. De les monedes de plata feches en Santu Domingu, tan buena e mejor que la de acá y de tanto y más peso, nacen nomatos identificativos, pa diferenciales de les castellanes, como pesu fuerte o pesu duru, que col tiempu cuayaría n’América col nome de “pesu” y na Península col de “duru”.
Ciudá de Méxicu
Los reis Carlos y Xuana, dictaron l’11 mayu de 1535 una orde pola que s’establecía la Casa de Moneda de Méxicu, con espresa autorización de batir moneda de plata y vellón. La moneda de plata a llabrar debía ser en reales y les sos fracciones, en medios y cuartos, asina como en reales d’a dos y d’a tres. Dos años más tarde, por Real Cédula del 18 payares de 1537, autorizose al virrey de Nueva España, Antonio de Mendoza, la suspensión de l’acuñación de reales d’a tres, que podíen confundise colos dobles, y aurorizándo-y l’acuñación de monedes de cuatro y ocho reales de facial. Na práutica, hai que camentar que malapenes s’acuñó vellón, pola so escasa aceutación popular. Les primeres llabres mexicanes entamaron n’abril de 1536. La ceca vendrá identificada con una M. Tamién apaecen les marques de los ensayadores.
Primer serie (1536-1542)
Los estudios de les acuñaciones hispániques nel Nuevu Mundu son d’especial interés nos Estaos Xuníos, non en baldre, foron emplegaes na mayor parte del so territorio cuando ésti pertenecía a la Corona de Castiella, ya incluso introducíu nes posteriores Colonies Britániques del este. Tres la independencia, EE.XX. siguió emplegando les monedes hispanes hasta el “nacimientu” del dólar, semeya del thaler y el real d’a ocho. Nos cartafueyos norteamericanos, esta serie denomínase Early serie y dafechu, los más fonderos estudios d’esta aventura numismática hispánica entamaron ellí, detacando, no referente a les acuñaciones equí estudiaes, Robert I. Nesmith (1891-1972) fotógrafu y miembru de l’American Numismatic Society.
Lo primero a detacar ye la bayura variantes qu’hai d’esta serie. Al paecer, los primeros cuños veníos de Castiella desgastábense bien luego, polo que los propios trabayaores de la ceca tovieron que facer ellos mesmos los suplentes. El primer detalle d’esti cambiu ta nel tipu les lletres de les lleendes, les enviaes dende la Metrópoli veníen con lletres gótiques, mientres que les mexicanes yeren llatines. Los valores acuñaos n’esta serie foron los d’8 reales, 4 reales, 3 reales, 2 reales, 1 real, mediu real y cuartu de real.
Otros detalles d’esta serie tan nel nome del rei, KAROLVS, d’aire más xermánicu que llatinu o nel reversu, onde les Columnes d’Hércules van acompañaes d’una parcanta col llema PLVS (ensin VLTRA). Al nun venir marcaes con añu d’acuñación, suel tirase de les marques de los ensayadores pa datales. Según el trabayu de Nesmith (y confirmao anguañu) el primer ensayador foi Francisco del Rincón, identificáu con una R. Foi l’únicu n’acuñar monedes de tres reales; al pocu foron desaniciaes por ser fácilmente confundibles coles pieces de dos reales. Foron suplíes poles de cuatro reales. Tamién foi l’únicu n’acuñar pieces d’ocho reales, yeren difíciles de facer, polo que la so tirada finó siendo bien escasa. Nesmith identifica a Juan Gutierrez como segundu ensayador. Identificáu con una G, los caberos estudios asítienlu más alantre; cenciellamente, Gutierrez apaecerá como primer ensayador na segunda serie. Poro, y según lo que se sabe a día güei, un cuadrante plausible sedría esti:
|
Identificación de los ensayadores de la primer estaya |
||
|
Nome del ensayador |
Marca identificativa |
Años del llabor |
|
Francisco del Rincón |
R |
1536-1538 |
|
Pedro de espina |
P |
1538-1541 |
|
Francisco de Loaiza |
F |
¿1541? |
|
Juan Gutierrez |
G |
1541-1542 |
Les pieces mayores llevaben l’escudu real nel anversu y la divisa de Carlos, les columnes y el lema Plus Ultra, nel reversu. La identificación del so valor podía venir marcada por un númberu o unos puntos.
 |
|
8 reales o Real d’a ocho |
 |
|
4 reales o Real d’a cuatro |
 |
|
3 reales o real d’a tres |
 |
|
2 reales o Real d’a dos |
La fabricación de cuños caseros, delles vegaes provoca fallos ensin importancia pa nos, pero que france colos protocolos reales. Nel casu d’esti toscu real, vese que les armes de Llión ocupen los espacios preferentes del escudu del reinu.
 |
|
1 real |
El diseñu del mediu real ya camuda; nel anversu apaecen los monogrames reales KI, baxo una corona, como identificación de la paridá real ente ma y fíu.
 |
|
Mediu real |
La más piquiñina de toes lleva un diseñu propiu, básicamente porque nin l’escudu nin les columnes entren. Nel anversu apaez el monograma de Carlos K coronáu, y nel reversu el de Xuana I.
 |
|
Cuartu de real |
Segunda serie (1542-1571)
En 1542 llegaron los nuevos troqueles a la ceca mexicana. De primeres, desapaeció toa lletra gótica, siendo toes llatines a partir d’agora. El nome del rei tamién camudó, primero a CHAROLVS, pa llueu pasar a CAROLVS. La divisa del rei ya integra’l lema completu (o abreviáu) de PLVS ULTRA, ya ensin enmarcar nuna pancarta; les columnes, grábense enriba d’unes foles. Esta serie ye conocía nos EE.XX. como Late Serie. Les pieces acuñaes van ser de 4 reales, 2 reales, 1 real, mediu real y cuartu de real. Van acuñase tamién pieces de cobre, maravedinos.
No referente a los ensayadores, a Juan Gutierrez –y toca finar cola primer serie y entamar la segunda, poro les primeres pieces vendrán cola so marca, G. En 1543 foi xuplíu, temporalmente, por ún de los hermanos Del Rincón (Francisco o Alonso) con marca R, pa llueu tornar hasta 1545. D’esta vuelta (1543-1545) son les meyores acuñaciones d’esta serie, con unos trazos y les lleendes bien nidies. Sigue depués una llista ensayadores que se xuplen o sobreponen según circunstancies (al paecer el puestu yera bien llambión, polo que nun yera un res raro qu’apaecieren sobornos, falses denuncies de fraude… La mesma Corona tuvo d’unviar a un funcionariu, Francisco Tello de Sandoval, pa investigar estos casos). El llistáu d’ensayadores d’esta estaya sedría esti:
|
Identificación de los ensayadores de la segunda estaya |
||
|
Nome del ensayador |
Marca identificativa |
Años del llabor |
|
Juan Gutierrez |
G |
1542-43/1543-46 |
|
Alonso del Rincón |
R |
1543 |
|
Alonso de Villaseca |
A |
1546-1547 |
|
Luis Rodríguez |
L |
1547-53/1554-69 |
|
Rodrigo Gómez de Santillán |
S |
1553-1554 |
|
Bernardo de Oñate 1 |
O |
1554-1571 |
1 Oñate collaboraba con Luis Rodríguez pola mala salú del segundu. A partir de 1569, l’ensayador diba ser Cristóbal Rodríguez, fiu de Luis, pero prefirió arrenda-y la prevenda a Oñate.
A partir de 1554, la demanda de moneda fae qu’aumente la producción y amenorgue la calidá de les pieces acuñaes.
Nos reales mayores caltiense la tónica no referente al diseñu, anversu col escudu real y los nomes de los monarques y reversu cola divisa de Carlos modificada (foles y Plus Ultra).
 |
|
4 reales |
 |
|
2 reales |
 |
|
1 real |
Nel mediu real pasa igual, anversu colos monogrames reales coronaos y el nuevu reversu con foles, pero con un PVS motivao pol espaciu.
 |
|
Mediu real |
Les de cuartu de real son d’estremada rareza, dafechu, solo se conocen pieces ensayaes por Juan gutierrez y en menor medía, por Rodrigo Gómez de Santillán. Caltién el mesmu diseñu que la serie anterior por temes d’espaciu.
 |
|
Cuartu de real |
No que se refier al vellón, Castiella nun unvió cuños pa la so fechura, dafechu, la ceca Méxicu solo taba autorizada a acuñar plata. Pero la necesidá de dinero menudo, malapenes cubierto polos cuartos de real, fexo que pel 1542 el virrei Antonio de Mendoza aprovare una llei pa la so llabra. Elli mesmu encargose del diseñu de les pieces, ya que’n Castiella foi Tesoreru Real na ceca de Granada. Los maravedinos que se movíen per Nueva España, seguramente fueren los acuñaos en tiempos de Fernandu El Católicu, nes ceques de Sevilla y Burgos pel 1505 y con destín inicial de la islla La Española (Santu Domingu). Realmente nun tovieron acoyía nenguna, en dellos escritos de la época queda anotao que los indíxenes refugaben del cobre y atropábenlu pa llueu tiralo al llagu Texcoco (descubrimientos arqueolóxicos posteriores confirmaron el fechu). Dexóse de llabrar a partir del 1552 y prohibiose definitivamente pel 1565, en tiempos ya del rei Felipe II. Les pieces acuñaes foron de dos y cuatro maravedinos, ensin marca d’ensayador (pal cobre nun facía falta).
Nel anversu de la moneda de cuatro marvedinos, apaez el monograma del rei K cornáu y llindiáu por un castiellu y un llión; la lleenda detaca por apaecer CHAROLVS ET IOHANNA. Nel reversu ye’l monograma de la reina I rematáu d’igual mou y la lleenda colos domeños.
 |
|
4 maravedinos |
La de dos maravedinos lleva un anversu con una sola columna coronada cola lleenda PLVS ULTRA de la divisa carlina. El reversu queda pa la identificación de Castiella.
 |
|
2 maravedinos |
Santu Domingu del Puertu
En 1497, nel so tercer viaxe, Colón traxo a la islla La Española el permisu real p’acuñar moneda nel Nuevu Mundu, principalmente escelentes d’oru y según venía definío na Pragmática recién aprobada en Medina del Campo. Ensin embargu, delles desavenencies na islla asina como la desconfianza del rei Fernandu nel almirante, fexo que los Católicos nun permitieran acuñar monedes d’oru nel Nuevu Mundu. El 3 de payares de 1536, una Real Cédula roblada polos reis Xuana I y Carlos I, instaba a l’apertura d’una Casa de Moneda na Real Audiencia de Santu Domingu. Ensin embargu, la dificultá téunica a la hora facer monedes con una metroloxía concreta y la falta personal cualificao, fexo que na práutica el proyeutu nun arrancare a furrular hasta l’añu 1542. La marca de la ceca vién grabada na moneda, nos tiempos de Carlos y Xuana, SP, iniciales del nome oficial de la ciudá onde s’asitió, Santu Domingu del Puertu. Apaez tamién grabada una F, marca del ensayador Francisco Rodríguez (1541-1559).
Les emisiones sacaes n’esta ceca foron de tiraes bien escases, principalmente porque en tol área del Caribe nun había mines de plata. Ensin embargu, la bayura cobre fexo posible acuñar maravedinos y blanques.
Los valores acuñaos pa los reales foron de mediu, un, dos, cuatro y diez, con un valor axustáu a 44 maravedinos por real (en Castiella yera de 34 maravedinos, los diez estra d’América, debíense a un impuestu real). La lleenda grabada debía trayer los nomes y títulos reales, dándose la curiosidá de que nel casu les acuñaciones americanes, el nome de Carlos apaez delantre del de so ma, fechu que nun pasa nes acuñaciones pa Castiella; CAROLVS ET IHOANA REGES HISPANIARVM ET INDIARVM (lo qu’entrare, abreviao o non).
Los reales mayores lleven el mesmu diseñu; nel anversu, los escudos de Castiella, Llión y Granada coronados; nel reversu, la divisa del rei carlos I, les Columnes d’Hércules cola estola PLVS (ensin VLTRA). Coles lleendes hai daqué d’enguedyu, por norma, nel anversu debíen venir los nomes de los monarcas col título real CAROLVS ET IHOANA REGES, dexando pal reversu la identificación de los sos domeños HISPANIARVM ET INDIARVM. Ensin embargu, delles monedes dupliquen el nome y título de los reis en dambes dos cares, escaeciéndose de los territorios.
La pieza de diez reales ye tan rara que realmente nun hai semeyes de tala pieza. Esti debuxu ta sacáu d’un cartafueyu d’Aúreo y Calicó.
 |
|
10 reales (Áureo & Calicó) |
 |
|
4 reales |
 |
|
2 reales |
 |
|
1 real |
La pieza de mediu real lleva un diseñu propiu debío al so menor tamañu. N’elli, apaez nel anversu los monogrames reales coronaos, una K pa Carlos y una Y pa Xuana.
 |
| Mediu real |
No que se refier al vellón, les acuñaciones diben centrase na fechura de maravedinos y blanques, llabrando pieces d’una blanca (equivalente a un maravedí) y dos, cuatro, once maravedinos. Al ser la so pasta mayormente de cobre, foron unes acuñaciones bayuroses, mas impopulares. El patrón impuestu dende Castiella ordenaba facer les pieces con una llei de 7 granos de plata (24,50 milésimes, aprox) y restu cobre, pero la falta de plata y la típica picaresca hispánica (que tamién emigró) fexo que s’emplegaren realmente 3 granos (esto ye, 10,42 milésimes de plata). Obviamente, esta trampa acabó xenerando más problemes que soluciones a los ciudadanos y a la llarga, nun diben ser permitíes en Castiella.
La blanca va llevar grabada nuna cara el monograma de la reina Xuana, una Y coronada, xunto a la marca del ensayador Francisco Rodríguez F y el so valor, I (ún, polo que delles vegaes apaeza nos cartafueyos numismáticos como moneda d’un maravedí). Na otra cara apaez el monograma de Carlos, una K coronada (que paez una R) ente les marque de la ceca SP. Alredor, la lleenda CAROLVS ET IOANA R(EGES) xeneralmente y en dambes dos cares.
 |
|
1 Blanca |
Nes pieces de dos y cuatro maravedinos el monograma de Carlos va ser xuplíu por un diseñu esquemáticu del so emblema, les Columnes d’Hércules coronaes. La lleenda tamién va intentar incluyir la típica segunda parte de HISPANIARVM ET INDIARVM. La pieza de cuatro maravedinos foi la más llabrada de tolos valores, polo que podemos atopar dos variantes no referente al numberal grabáu: pue venir n’arábigu (4) o en llatín (IIII). Caltiénense les marques del ensayador y la ceca.
 |
|
Dos maravedinos |
 |
|
Cuatro (4) maravedinos |
 |
|
Cuatro (IIII) maravedinos |
La d’once maravedinos ye la más rara de toes, dafechu, nun se debieron acuñar munches. El so atípicu valor débese a un cenciellu cálculu, si un real americanu val 44 maravedinos, la pieza d’once equivaldría a un cuartu de real, pieza que debía acuñase en plata, según la Pragmática de los reis Católicos. N’esta pieza lo que camuda ye la identficación de la reina Xuana, emplegándose un castiellu como identidá del so reinu.
 |
|
Once (XI) maravedinos |
Esiste una segunda emisión de dos y cuatro maravedinos col esclusivu y curiosu títulu de KAROLVS QVINTVS y, abreviao, INDIARUM REX en dambes dos cares, esto ye, nomando al emperador del Sacru Imperiu Romanu Xermánicu y non al rei de Castiella, poro, tampoco a la so reina. Esto ye daqué inusual, pues, anque’l rei y l’emperador seyan el mesmu personaxe, el títulu (más bien el numberal del monarca) grabáu sedría’l d’un rei estranxeru. Ensin embargu, los motivos centrales del anversu y el revesu, faen referencia a los sos reinos de Castiella y Llión.
 |
|
Cuatro maravedinos del emperador |
Fontes:
Monedas hispánicas 1475-1598: [en] Sala de exposiciones del Banco de España [con motivo del] V Centenario del Descubrimiento de América / Textos catalogo: Gonzalo Anes... (et al.). Madrid Banco de España, 1987. Capítulo titulado Función histórico-económica de los valores monetarios expuestos. Mateu y llopis, Felipe
La moneda castellana de los Países Bajos a nombre de Doña Juana (1505-1506) (1517). Medio de reivindicación de soberanía y propaganda de un golpe de estado. De Francisco Olmos, José María
Los reales castellanos acuñados en Flandes. Blog Numismático. Ruiz Calleja.
Juana y Carlos I. Maravedis.net
La heráldica monetaria castellana de Carlos I. Una afirmación de legitimidad dinástica y territorial. De Francisco Olmos, José María
La moneda en el reinado de Carlos I. Dávila Vegas, Victor Manuel. Blog Stasiotika
Cortes de los antíguos reinos de Castilla y León. Reinando Don Carlos I y Doña Juana. Biblioteca virtual Miguel de Cervantes.
Cuadernu de les Cortes de Valladolid de 1537. Archivu Municipal de Madrid.
Un real de Juana y Carlos, Sevilla. Blog Numismático. Ruiz Calleja
Monedas de oro de Carlos I. Blog de la tienda numismática Numismática Mayor 25, Madrid.
Las monedas medievales en el Nuevo Mundo. Mendoza Arellano, José Luis. www.omni.wikimoneda.com nº 6-04/2013
Coinage of the First Mint of the Americas at Mexico City, 1536-1572. Nesmith, Robert I. American Numismatic Society. Digital Library.
The Charles and Joanna Coinage of Mexico City, 1536-1571: A Research Study on the Early Series and Introduction to the Late Series.
La Casa de Moneda de Santo Domingo. Amiana de Castro, Octavio. Academia Dominicana de la Historia.
La primera ceca de Santo Domingo. Blog Numismático. Ruiz Calleja.
Cuatro maravedís de Carlos I y Juana I de Santo Domingo. Foru Imperio Numismático
Numismática española. Catálogo de todas las monedas emitidas desde los Reyes Católicos hasta Felipe VI. 1474 a 2020. Áureo y Calicó. Barcelona 2019.
Numista.es. Llistáu numismáticu del numberariu de Carlos I y Xuana I.
Wikipedia: Carlos V. Xuana I.
No hay comentarios:
Publicar un comentario