Fernandu V y Xuana I (1506-1516)

     Tres la repentina muerte del rei Felipe I, el 25 setiembre de 1506, el control del reinu pasa a manes del Cardenal Cisneros y el Conseyu Real. La reina Xuana, dolía pola perda del so maríu, nu atendía a razones de gobiernu, poro, nun yera posible nin tan siquier apellidar a Cortes, polo que se barruntaba un perídu d’inestabilidá. La solución final foi llamar de nuevu al defenestráu rei Fernandu V, el Católicu, valiéndose de les normes establecíes nel testamentu de la reina Isabel, que declaraba Gobernador de Castiella y los sos domeños a Fernandu, asina como rexente, en nome de la heredera Xuana I, si ésta anduviere ausente o incapacitada temporalmente pal cargu.

     No que se refier a la estaya numismática, que ye la qu’equí mos importa, detaca l’apaición d’un real de plata na ceca de Granada y de duldosa llegalidá, dafechu, nun tuvo percorríu más allá del so llugar y añu d’acuñación, 1507, casualmente l’añu en que tornó Fernandu a garrar les riendes de Castiella. Siendo sinceros, realmente nun esisten estudios fonderos sobre esta tema, nin la causa del mandaú de la so fechura, nin l’encargáu de dar la orde. Les sospeches indiquen que pudieron ser partidarios de Fernandu dirixíos por un de los más importantes representantes de la Corona nel reinu de Granada, don lñigo López de Mendoza y Quiñones, Conde de Tendilla, de la orde de Santiagu, Capitán  xeneral de l’Alhambra y fortaleces de Granada, y tituláu Marqués de Mondéḥar en 1512.

 

Real de Xuana y Fernandu. Ceca Granada

 

     Nel anversu apaecen los escudos de los reinos de Castiella y Aragón xunto colos de los sos domeños, llindiaos pola lleenda FERNANDS ET GVANA D(EI) G(RATIA). Nel reversu caltiénense los emblemes distintivos de los Reis Católicos, el xugu y les fleches, cola lleenda REX ET REGINA CAST(ELLE) LEGION(IS) AR(AGO) S(ICILIAE).

     La illegalidá de dicha pieza vese al estudiar los títulos. Ye bien cierto que los dos son reis, pero, n’esi precisu momentu, Fernandu ya nun yera rei de Castiella, nin Xuana d’Aragón (Xermana de Foix ostentaba tal títulu por ser la muyer de Fernandu n’esos momentos).

     ¿Propaganda? ¿Moneda de necesidá o emerxencia?. Sábese que la idega de los anteriores reis castellanos, Felipe y Xuana, yera la d’acuñar moneda al so nome (llóxico) pero la muerte Felipe esbarrumbó’l proyeutu que rápidamente mandó parar Fernandu, a la par qu’ordenaba que se siguiere acuñando moneda a nome de los Católicos, cola fin, ente otres coses, de dexar nun segundu planu a la so fiya y reina, de factu, de Catiella. Xuana foi ninguneada pol so maríu y agora diba selo por so pá.

     Aureo y Calicó ye una reputada axencia nel mundu numismáticu español, autora, quiciás, del catálogu de monedes más importante espublicáu nel país. Asina mesmo, tamién ye una detacada casa de subastes. Indico ésto porque, tanto nel so catálogu de monedes del 2020, como nuna de les sos subastes on line, apaez otra moneda emitía a nome de Fernandu y Xuana, concretamente un escudu acuñáu na ceca de Toledo. Nun atopo más información al respeutu per nenyures, polo que yo dexo equí la so semeya, sacada precisamente del so catálogu en pdf:

 

 

Escudu de Toledo. Oro. Ø23 mm. 3,38 g.

Fontes:

     La moneda castellana de los Paises Bajos a nombre de Doña Juana (1505-1506) (1517). Medio de reivindicación de soberanía y propaganda de un golpe de estado. José María de Francisco Olmos

     Numismática española. Catálogo de todas las monedas emitidas desde los Reyes Católicos a Felipe VI (1474-2020). Aureo y Calicó. Barcelona 2019.