Croacia (República)

 Enllaz: 2euros conmemorativos croates

 

Primer serie (2023)

      El primeru de xunetu de 2013 Croacia ingresa na Xunión europea y el primeru de xineru del 2023 ingresa na eurozona.

 

     El Bancu Central croata convocó un concursu públicu pal diseñu de los sos euros. Ente los requisitos, la presencia de símbolos nacionales croatas, la presencia de Nikola Tesla nún de los diseños (a petición popular), la presencia de la kuna (fuina) y el mapa xeográficu del país. Asina, el cuatro febreru del 2022, foron presentaos los diseños de les monedes tipu croates, agrupaes nun esquema 3-3-1-1, esto ye, un diseñu común pa les monedes de cobre, otru pa les d’oru nórdicu y dos diseños dixebraos pa les bimetáliques. Como elementu común en tolos diseños, apaez el tableru d’axedrez, símbolu nacional croata y qu’ellos pinten de blancu y bermeyu. Como curiosidá, tres l’añu emisión apaez un puntu, símbolu gráficu percomún nes escritures eslaves. La casa de la Moneda croata, Hrvatska kovnica novca, ye la encargada de les acuñaciones.

 

Les monedes croates

 

 

      Nos céntimos d’1, 2 y 5 apaecen les iniciales del país HR n’alfabetu glagolíticu, ancestral alfabetu eslavu creáu polos evanxelizadores Cirilu y Metodiu pa tornar l’Evanxeliu cristianu y difundilu pela Gran Moravia, xunto col añu emisión, el none del país emisor HRVATSKA y el típicu emblema nacional croata, los cuadros d’axedrez. El diseñu va llindiáu poles estrelles de la Xunión europea. El diseñu ye obra de Maja Škripelj.

 

 

     Nos céntimos de 10, 20 y 50, apaez el gran inventor croata Nikola Tesla sobre unes ondes magnétiques y l’axedrez croata. Riba vese’l nome del país emisor HRVATSKA y tres la nuca l’añu emisión. El diseñu va llindiáu poles estrelles de la Xunión europea. El diseñu ye obra de Ivan Domagoj Račić

     Pa la moneda d’1 euru optose por grabar una fuina que’n croata dizse kuna y que precisamente –y daba nome a la so ya desaniciada moneda. De fondu, el típicu axedrez. Riba, el nome del país emisor HRVATSKA y en baxo l’añu emisión. El diseñu va llindiáu poles estrelles de la Xunión europea. El diseñu ye obra de Jagor Šunde con David Čemeljić y Fran Zekan.

     Pa la moneda de 2 euros optose por grabar el mapa políticu del país sobre’l conocíu fondu axedrezáu. A un llau va’l nome del país emisor HRVATSKA y al otru l’añu emisión. El diseñu va llindiáu poles estrelles de la Xunión europea. El diseñu ye obra de Ivan Šivak.

 

     Nel cantu de les monedes de dos euros, va graváu’l primer versu del poema pastoral Dubravka, obra del poeta barrocu Ivan Gundulić (1589-1638), natural de Dubrovnik: "Oh guapa, oh quería, oh dulce llibertá":

Los euros polémicos

      Arriba indicamos les monedes d’euru que van ser oficialmente acuñaes pal so emplegu pela eurozona. Ensin embargu, el diseñu de la moneda d’un euru nun foi’l primeru n’aprovase pol Bancu Central croata. Na presentación de febreru, apaecía esta otra moneda d’euru, ganadora del concursu, y obra del diseñador Stjepan Pranjković:

 

     La fuina  y de  fondu, el típicu axedrez. Riba, el nome del país emisor HRVATSKA y en baxo l’añu emisión. El diseñu va llindiáu poles estrelles de la Xunión europea.

 

     Díes depués de la so presentación oficial, descúbrese que la fuina ta sacada d’una semeya rexistrada pol fotógrafu escocés  Iain Leach:

Comparativa ente la semeya y el diseñu la pieza

     El Bancu Central croata decide retirar el diseñu y opta pol segundu finalista… del que se descubre que tamién sacó la so fuina d’internet. Pa evitar más escándalos, el Bancu decide convocar un nuevu concursu, solo pa la pieza d’ún euru, y ganándolu los arriba mentaos Jagor Šunde, David Čemeljić y Fran Zekan.

Enllaz: 2euros conmemorativos croates

 

Fontes: Wikipedia. Croacia. Ivan Gundulić

              https://www.ecb.europa.eu

              https://euro.hr (croata)

              https://croatianmint.hr La Casa de la Moneda de Croacia (Hrvatska kovnica novca) (croata)

              Numismática visual: Primeros diseños, l’escándalu, más polémica y nuevu diseñu. (Castellán)