2022: Borselino y Falcone (xueces antimafia)

 

Semeya: collectorcoins

Motivu conmemorativu: 30 cabudañu del asesinatu de los xueces antimafia Paolo Borselino y Giovanni Falcone

Volume d’emisión: 3.000.000         Fecha d’emisión: 17 mayu

 

     Na década de los ochenta del sieglu XX, Italia taba sumía nuna violenta llucha, policial y xudicial, escontra La Mafia siciliana. Munchos policíes, escoltes, abogaos, políticos y xueces ufrieron les amenaces o la violencia de la Cosa Nostra. D’ente toos ellos, el pueblu italianu fai alcordanza de dos personaxes, dos xueces, que lo dieron too, hasta la so vida, por finar con toa esa trama delictiva.

 

     El primeru, Giovanni Salvatore Augusto Falcone (1939-1992). La so carrera xudicial en Sicilia, percorrió del llau de los asesinatos de dellos xueces, como Cesare Terranova en 1979, o el so compañeru Rocco Chinnici en 1983. En 1990 accede al Conseyu Superior de la Maxistratura y dos años más tarde, ye asesináu al españar una bomba de 1000 kg d’esplosivu asitiaos baxo l’autopista que xune Palermo col so aeropuertu. Nel atentáu, morrieren tamién la so muyer, Francesca Morvillo y tres escoltes, Rocco Di Cillo, Vito Schifani y Antonio Montinaro.

 

     El segundu, Paolo Emanuele Borsellino (1940-1992). Criose nel mesmu barriu palermín que Falcone, poro, ya se conocíen dende neños. Foi’l más mediáticu y politizáu de los dos; criáu nel senu d’una familia facista, nun tuvo problemes, ya como xuez, n’acusar a la casta política italiana y a dellos empresarios, d’acombayar cola Mafia. Formó parte d’un departamentu de llucha antimafia conformáu por tres xueces, ún d’ellos el so collaciu Falcone y dos comisarios de la policía, dirixíos a so vez, pol xuez Rocco Chinnici (toos ellos morrieren asesinaos pola Cosa Nostra). Tres l’asesinatu del so vecín Falcone, Borselino asume’l so llabor, pero dos meses más tarde muerre, a la puerte cá so má, al españar un coche-bomba, xunto con cinco escoltes: Agostino Catalano, Vincenzo Li Muli, Walter Eddie Cocina, Claudio Traina y Emanuela Loi, la primer muyer del cuerpu de la Polizia di Stato italiana que fallez n’actu de serviciu.

 

     El grabáu de la moneda foi sacáu d’una semeya fecha pol fotógrafu Tony Gentile y que sirvió pa sacar unos cartelos per Palermo, onde se llee “Nun los matásteis. Les sos idées caminen sobre les nueses piernes”, frase inspirada n’una ya popular de Falcone que decía “Los homes pasen, les idées queden y seguirán caminando sobre les piernes d’otros homes”. La xente ya taba quemao; dafechu, nel funeral d’estáu de Borselino na Sée-catedral de Palermo, el pueblu franció’l cordón policial pa increpar y xiringar al presidente de la República y al xefe policía. Enxamás serán escaecíos pola so determinación, valentía, sacrificiu, amor pol so llabor y llucha pola verdá y la xusticia (esto ye lo que diz Italia na so alcordanza).

 

     Nel intre la moneda apaecen los dos xueces, según semeya de Tony Gentile. Riba, los sos apellíos FALCONE-BORSELINO  colos años 1992-2022 (la efeméride y l’añu acuñación) llindiando la marca identificativa del país emisor RI; a mandrecha, la marca de la ceca R, y a manzorga, la marca del diseñador Valerio de Seta, VdS.

 

     Nel aniellu esterior, les doce estrelles de la Xunión europea.

     Fontes: Wikipedia: Falcone. Borselino (castellán)

                  Numismática visual (castellán)