Numberariu nel Reinu Astur

Repartu d'Hispania pel 813. Mapa orientativu

     A mou de resume, de toos ye sabío que tres la cayía del Imperiu Occidental romanu, los territorios europeos controlaos por Roma pasen a ser “repartíos” ente los dixebros pueblos y tribus d’orixe xermánicu y europeo oriental (los conocios como bárbaros) que ya llevaben años afincaos n’estos territorios, gracies a la agora permeable frontera imperial. No que se refier al emplegu de moneda ente estos pueblos, toos ellos tiraben de les emisiones acuñaes por orde de Roma, hasta que la debilidá del sistema monetariu, aparexáu al políticu, fexo que “los bárbaros” s’encargaren de la llabra de numberariu, nos sos talleres llocales, pa’l so mercadéu diariu. De primeres acuñaron monedes d’oru (sólidos) a nome del César de turnu, calteniendo, de primeres, les mesmes dimensiones y llei que les orixinales, pa llueu dir dexenerando, tanto na fechura del diseñu, como na cantidá de metal noble na so aleación, ye la estaya conocía como la de los sólidos “d’imitación”.

 

Sólidu oficial d’Honoriu

Sólidu d’imitación. Ceca MD (Mediolanum, Milano; Italia)

     Col tiempu y ya ensin el control de Roma, los nuevos señores d’Europa (proclamaos, o autoproclamaos, reis del territoriu que controlaben) vieron la necesidá de buscar una nueva moneda que s’adautare a la realidá del momentu, sobremanera el numberariu necesariu pa’l menudéu y merca cotidiana de los sos súbditos, poro, lo primero que fixeron foi abandonar l’oru como patrón de referencia y xuplilu pola plata. Los primeros a ponese a ello foron los britanos, a metanes del sieglu VII, con una serie de monedes en plata y llimitada que pasó a ser masiva, a finales del sieglu cola acuñación de les conocíes como sceattas de plata. 

Sceatta d’Aldfrith de Northumbria, 685-704 DC

     Ensin embargu, diba ser nel Reinu de los Francos (zona central de l’actual Francia) onde esti procesu imparable de cambiu, diba xenerar una solución bien válida y esportable a otres zones d’Europa, gracies sobre too al esposigue del Imperiu Carolinxu: Ente los años 670 y 750, esti procesu de cambiu, ya imparable, dio como resultáu l’afitamientu del denariu de plata como divisa de referencia; pa que resultare efeutivu nel emplegu diariu, la llibra carolinxa (de 420 gr) diba dixebrase’n 20 partes iguales nomaes sueldos (que’n realidá nun yera una moneda física, sinon de cuenta), y ca ún d’éstos, en 12 dineros (de 2 gr), y ca dineru, en 2 óbolos.

Dineru de plata carolinxu 793-812 DC

     La particularidá hispánica y astur

     Sabemos ya que los suevos foron los primeros n’emitir moneda  propio n’Hispania (dafechu, foi’l primer pueblu bárbaru n’autoproclamase reinu siendo tovía vasallos de Roma, poro, sedría’l primeru d’Europa). Acuñaríen, como tóos, moneda d’oru, “sólidos d’imitación” anque tamién moneda propia de plata, la siliqua del rei Rekhiariu, a semeyanza de los movimientos arxénteos europeos, pero que nun diben tener continuación al ser sustituyíos polos visigodos nel control de la península. Éstos, que tamién emitieron sólidos d’imitación romanos de primeres, finaron acuñando la so propia moneda d’oru nomada tremis y dexando de lláu la plata y el bronce (conformábense coles monedes atropaes a suevos y bizantinos, asina como lo acuñao por Roma). 

Siliqua de rekhiario 448-456 DC

     No que se refier al territoriu astur, sobremanera al tresmontanu, sábese que nos principales asentamientos urbanos (digamos ciudaes, más bien oppidum) habría un importante movimientu de numberariu (mercaos populares, intercambios comerciales…) y como asina atestiguen la gran cantidá d’ayalges atopaes pel país n’estos tiempos d’anguañu. Ensin embargo, la mayor parte de la población vivía disperso (dafechu, tres la marcha de les tropes romanes y la llegada de los estranxeros bárbaros, la xente tornó a la seguranza de los vieyos castros) polo que tuvo de recuperar el so ancestral sistema del troquéu (la verdá ye qu’enxamás lu abandonaron del too, pero agora diba rescamplar de nuevu y con fuercia). Y de nun ser asina,  sedría’l desaniciu del reinu visigodu el causante de l’ausencia de cualisquier estructura de producción y distribución de moneda ya que tres d’ellos, nun se tién constancia de nenguna entidá llocal que xupliere esta carencia, lo que mos fai suponer que, colo qu’había, más los intercambios por troquéu, yera de sobra (tamién ye cierto que, l’esbarrumbe d’una entidá política superior, como foi la visigoda, fai que l’intercambiu comercial ente zones dixebres amenorgue enforma o desapaeza, calteniéndose nonmás que’l propiu, básicu a la mayor).

 

     Nuevos invasores y el nacimientu del Reinu d’Asturies o de los Astures

     El norte cantábricu siempres foi un mal de tiesta pa tolos invasores. A Roma costó-y lo suyo, y la romanización del llugar nun foi tan fondera como nel restu la Península. Vándalos asdingos, suevos y visigodos nun foron a domeñar el tarrén de mou efeutivu, sicasi los periodos de paz tenso vivíos sedríen gracies a alcuerdos ente ellos y xefes llocales. Col desaniciu del reinu visigodu, tres la batalla de Guadalete, Asturies quedaría llibre de toa presión estranxero… hasta la llegada d’unos “nuevos amos”. Y tamos nes mesmes, a ninguna entidá llocal –y da por acuñar nengún tipu de moneda, el troquéu y l’autoconsumu manden na economía asturiana. La llegada de los árabes y bereberes del Magreb  a Asturies tampoco debió ser de lo más traumático pa los llugareños, ya que’l númberu de soldaos musulmanes llegaos al nuesu país sedría bien escasu. Sábese que’l supuestu Gobernador y la so tropa, asitiáronse en Xixón, por ser la ciudá más importante. El restu d’Asturies, quedó llibre de cualisquier tipu de control (a esceición de dalgún pasu haza la Meseta), non solo polo mentao, la carencia tropes, sinon pol particular mou de vida norteñu, más dáu a la dispersión poblacional, y opuestu al sureñu peninsular, más daos a la concentración de población en grandes urbes. Cinco años cunten que tovieren equí los sarracenos, ensin pena ya ensin gloria, intentando controlar un tarrén xabaz y probetayu, en comparanza coles magnífiques Toledo, Mérida o Córdoba.

     Y nun vamos metemos n’enguedeyos históricos, toos sabemos de la fazaña de Cuadonga, de Pelayo, de les razzies del so xenru Alfonsu y de la definitiva consolidación del nuevu país astur so’l gobiernu del segundu Alfonsu, que, por ciertu, foi’l primeru en titulase rei d’Asturies, ya que tolos anteriores yeren princeps (en llatín vieyo, vien a ser “el primeru na llucha o nel combate”, equiparándolu nós al vocablu caudillu). El caberu rei del reinu xuníu diba ser otru Alfonsu, el terceru, ya que tres la so muerte el reinu astur diba dixebrase ente los sos tres fíos, naciendo, xunto col reinu d’Aturies, el de Llión y el de Galicia. Y lo que vién ye tamién sabío: el más fuerte, el rei de Llión, machaca a los otros dos, quédase con too y asitia la corte en territoriu cismontán, na ciudá de Llión, por cunta de la seguranza de les fronteres del sur y pola suya propia, caro. Y llegamos al añu 1073, reinando en Llión Alfonsu VI, pa ver la primer moneda acuñada por un rei n’estos territorios… pero eso ye otra historia.

     ¿Nun hubo moneda n’Asturies dende’l 711, batalla de Guadalete y fin de los visigodos, hasta’l 1073? Sí; haber, hubo, pero non de producción propio. Seguimos calteniendo la idega del troquéu como base económica principal, y llueu vamos incluyir moneda residual romana, bizantina, sueva y visigoda. A ello, agora, podríamos incluyí-y la moneda musulmana oficial n’Hispania (al-Andalus), compuesta de dinares (oru), dírhams (plata) y felous (cobre) acuñada masivamente polos Omeya, sobremanera nos tiempos d’Abd al-Rahman II y trayía nes razzies de los caudillos astures, anque ye verdá que nun hai constancia d’esto nin en documentos,  nin en excavaciones arqueolóxiques, y eso que ta confirmao que families mozárabes ya inclusu musulmanes, colaron d’al-Andalus haza’l reinu d’Asturies y residir, principalmente, pela ribera cristiana del ríu Dueru. ¿Acasu esta xente nun vino con perres?

Dirham d’Abd al-Rahman II 822-852

     Más tarde y gracies al esplendorosu reináu d’Alfonsu II, podríemos tamién emplegar monedes principalmente d’orixe francu. Alfonsu “presentó” el so reinu cristianu na corte carolinxa, lo que fexo que munchos francos colaren p’Asturies, bien como artesanos, comerciantes o peregrinos, que s’allegaben a la basílica de El Salvador, na novedosa capital astur d’Uviéu y enllena de reliquies de santos, rescataes de tierres musulmanes, pa posteriormente, dir haza Compostela, onde, supuestamente, acababen d’alcontrar el sepulcru del apóstol Santiagu. Ensin embargu tampoco hai constancia arqueolóxica de tala presencia.

     Vieyos escritos de tiempos d’Alfonsu III, fain referencia a que n’Asturies emplegaben tres tipos de cambios nes merques y valoraciones de bienes. El primeru, toma como referencia pa’l cálculu, el numberariu de monedes antígues. El segundu, toma como referencia medíes agrícoles. Y el terceru, compara los bienes pa trocar. Too esto, xunto a medíes de pesu en metal, conformaríen el sistema financieru del reinu.

     No referente al emplegu de moneda, detaca nos escritos que yera un mou percomún ente la nobleza y el cleru, apaeciendo en merques de faciendes, dotes, valoraciones de ventes… y con términos referíos a solidos, solidos de argenteos, solidos gallicanos (sueldos suevos) o tremises.

Tremis de Sisebutu 612-621 DC

     No que se refier al emplegu de medíes agrícoles, yera percomún facelo en modios (con una capacidá d’8,75 llitros) de cebada (por ser ésti el cereal más común) y los sos submúltiplos, semodio, seccemodio o secemodio (mediu modio) y quartas o quartarios (un cuartu modio). Según deducciones de García de Valdeavellano (1961) un modio de trigo, n’Asturies del sieglu X, equivalía a un sueldu de plata o a una oveya. Como curiosidá, decir que nun apaeció nengún documentu qu’avalare l’emplegu de modios no que güei ye Galicia, quicias porque ellí nun yera común. Una medía de capacidá emplegada tamién pa les transacciones financieres, ye’l metro, medía asturllionesa qu’equivalía a 12 cántaros (detaca un documentu del 904, custodiáu na Sée-catedral de Llión, onde se valoren unes teles por tres modios y un metro de sidra).

 

Modiu, con cereales, representáu nuna moneda romana

     El troquéu yera más emplegáu ente la población, básicamente minifundista, que vivía nuna economía d’autoabastecimientu y subsistencia y conformándose ente ellos con un intercambiu de productos (ya ensin papeles de por mediu, polo que nun esiste constancia escrita d’estos fechos). Sí esisten estos documentos en merques llegales de nobles ya eclesiásticos, ye una época na que los ricos diben entamar a atropar tierres y creyar los conocíos llatifundios. N’esti casu, na merca de pequeñes propiedades a los sos dueños, el valor de la compra nun s’espresaba en moneda, sinon n’obxetos que’l compador entregaba al vendedor, principalmente productos agrícoles, ganao o paños y teles; delles vegaes tamién podía ser un intercambiu de terrenos.

     Les medíes de pesu en metal, solíen ser en llibres y talentos d’oru (libra auri, talenta auri). Lo gracioso de la tema ye que solo salen en documentos referíos a pagar multes.

     Nes actuaciones arqueolóxiques que se van faciendo por Asturies, ye de detacar l’ausencia de monedes ente los restos estudiaos. Sicasi, les poques apaecíes son d’orixe romanu, y práuticamente casi ná suevu o visigodu. Y por supuestu, ninguna de producción propia, d’orixe andalusí o de tipu carolinxu. Ello mos pue llevar a la conclusión de que les monedes apaecíes nos documentos estudiaos, fueren más bien monedes de cuenta que físiques, cola fin de calcular dellos precios. Por el contrario, el territoriu d’al-Andalus yera un fervieru monedes, sobremanera dende la so independencia de Damascu, circulando pieces de producción propia, norteafricanes ya inclusu cristianes (carolinxes).

     En resume y bien claro, los caudillos y reis astures nun acuñaron enxamás moneda. Lo poco qu’había yera romano, bizantín, suevo y visigodo, pero que con el tiempu, hasta estes monedes diben dir desapaeciendo, polo menos no que güei ye Asturies (y atestigüen les excavaciones arqueolóxiques) quedando documentaes, posiblemente, como monedes de cuenta. El troquéu, yera’l sistema monetariu dominante.

 

Bibliografía:

     IN TEMPORE SUEVORUM. Obres y estudios organizaos pola Diputación d’Ourense nel 2018 y qu’asoleyen dellos trabayos.

     ASTURIENSIS REGNI TERRITORIUM. Documentos y estudios sobre el período tardorromano y medieval en el noroeste hispano. Volume 2. MC cabudañu d’Alfonsu III y de la tripartición del territoriu. Alfonso García Leal, Ramón Gutiérrez González y Clara Elena Prieto Entrialgo (editores). Oviedo 2011. La circulación monetaria en el reinado de Alfonso III a través de las fuentes documentales. Alberto Canto García y Fátima Martín Escudero fixeron esti trabayu dientro del preyeuto Materiales de Madinat al-Zahra: producción y circulación de bienes en al-Andalus en época califal. Referencia: HAR2009-1011 (subprograma HIST).

     SACRA MONETA: LA REFORMA MONETARIA DE CARLOMAGNO (781-793/4 DC.) (sacramonetaavg.blogspot.com)

     Etapas de Al-Andalus, según su organización política

     Wikipedia: Sceatta (inglés). Modio (castellán). Cántaro (castellán)