Enantes de que los romanos asomaren les ñaples perequí, la esistencia de moneda ente la población astur yera nula. Equí lo que furrulaba yera, principalmente, una economía de subsistencia y, de necesitase, recurríase al troquéu. Asina lo recoyía el xeógrafu griegu Estrabón, qu’aclariaba que los pueblos del norte “en llugar de moneda intercambiaben especies o pequeñes llámines de plata recortaes” (Geographica III). Esto de les llámines de plata vamos miralo más pa llantre.
Ente los años 29-19 e. C. asoceden les conocíes como Guerres Cántabres o Astur-Cántabres, siendo’l períodu de les campañes militares más importantes el de los años 26-25 e. C. Ye n’esta estaya cuando aparecen les primeres monedes nel nuesu territoriu. Les llexones romanes nun se componíen solamente de guerreros; una triba personaxes ausiliares asociaos, principalmente, a la intendencia, marchaben tres d’ellos: ferreros, sastres, cocineros y, como non, acuñadores de moneda. Los llexonarios en campaña, cobraben el so sueldu in situ, polo que siempre había un taller de tipu ambulante pa con ellos. Según trabayos de Leandro Villaronga, les primeres pieces llabraes n’Asturies foron de cobre y de los tipos sesterciu, dupondiu y as. Que foren talleres ambulantes los encargaos de tal llabor suponse pola falta de marques identificatives d’una posible ceca, magar qu’hai dellos autores qu’asitien ya unes tempranes ceques nos llugares d’Asturica Augusta y Lucus Asturi, pola aparición de pieces n’escavaciones arqueolóxiques n’estes zones. Lo que pasa ye qu’estes villes entá nun esistíen como tal, ya que foron fundaes tres la guerra y pacificación del territoriu. Poro, y resumiendu, les primeres llabres aparecíes n’Asturies foron les batíes nos propios campamentos romanos xunto coles monedes que ya portaren los mesmos llexonarios al llegar. Da la casualidá de qu’estes guerres foron les úniques na Hispania entamaes por Roma como Imperiu y non como República, polo que la inmensa mayoría de les llabres atopaes son precisamente de calter imperial.
Enantes de too: ¿y eses llámines de plata?
Esta afirmación d’Estrabón paez descolocamos un pocu. Partimos del fechu de que los astures intentaben ser autosuficientes (cazaben pa la carne y les pieles, tendríen un cachín de güerta y dalgún animal dométicu, magar de lo que-yos diere la propia viesca). Y emplegaríen el troquéu pa conseguir coses que necesitaren y propies d’un artesanu: preseos pal campu, armes u obxetos d’orfebrería más trabayaos como torqueses, perendengues o diademes. No que se refier a la plata, ye un metal que nun yera un res bayurosu pel norte (non como l’oru) polo que falar d’ella como elementu d’intercambiu n’esa estaya ye, a lo menos, curioso. Santos Yanguas llanza, nel so estudiu sobre les acuñaciones de P. Carisiu, una idega qu’enllaza cola fama de “bandoleros” de los nuesos antepasaos. Yanguas da la posibilidá de que los astures traxeren pal so tarrén eses llámines de plata de les sos incursiones a les poblaciones de vacceos asitiaos a la oriella’l riu Dueru.
La presencia de monedes n’Hispania ya data dende la presencia de colonies griegues y fenicies nel Mediterrániu, continuando cola dominación cartaxineas y que xunpuso el so pasu a les poblaciones indíxenes peninsulares, bien por ser teritorios conquistaos, bien por comerciu pola so prosimidá. Poro, cuando Roma fincó les sos sandalies na Iberia, gran parte de la población ya sabía manexase coles perres. El restu del territoriu hispánicu diría conociendo esta “novedosa” ferramienta comercial a medida de diben siendo conquistaes polos nuevos amos del mundiu conocíu. Les principales ceques hispániques, ya dende los mesmos griegos, pero principalmente colos cartaxineses y lluéu los romanos, asitiábense a lo llargo’l ríu Ebru, principalmente pela zona Zaragoza y, suponse, que dende equí llegaren a ser conocíes polos habitantes de la cuenca del ríu Dueru, primeramente por víes comerciales y depués por conquista. Equí entren en xuegu los nuesos amigos los vacceos como tresmisores haza los astures, los cualos, a traviés de les sos razzies, atroparíen tolo que pudieren de tierres del Dueru pa llevales con so pal so país, incluyíes les monedes de plata. Según l’estudiu de Santos Yanguas y a falta de claros estudios arqueolóxicos ya históricos, entra na dubia de si foron los propios vacceos los que cortaren en llámines les poques monedes de plata que pudieren llegar al so territoriu, o bien foron los propios astures los que, desconociendo realmente pa que val una moneda, les cortaren en tirines pal so comerciu de troquéu, porque la plata sí sabíen pa qué emplegala.
En resume: los astures pudieron conocer les monedes nes sos incursiones a la meseta; pudieron emplegales nes sos transacciones comerciales, bien como moneda, bien como llámines cortaes, pero non del mou que toos conocemos, sinon como un elementu más a intercambiar.
Publiu Carisiu: la conquista y les primeres monedes
Si hai un personax avenceyáu a les guerres astures esi ye Publiu Carisiu, llegáu imperial na Provincia Ulterior, y promotor d’una de les principales víes d’accesu dende la meseta haza l’intre del nuesu territoriu y conocía anguañu col nome de Vía Carisa n’alcordanza de so. Tamién foi’l promotor de la construcción d’Emerita Augusta (Mérida, Estremaura) ciudá diseñada pa los veteranos de les guerres astur-cántabres y xunía posteriormente cola futura capital romana d’Astura, Asturica Augusta (Astorga, Llión) pela conocía anguañu como Vía de la Plata.
Na primavera del añu 26 e. C., l’emperador Octaviu Augustu abre les puertes del Templu de Xanu en Roma (indicativu del Estáu de Guerra) y parte pa Hispania cola fin d’aplastar a los caberos pueblos independientes del norte: astures y cántabros. Mientres que’l propiu emperador dirixe la ofensiva escontra los cántabros, encárga-y al so llegáu de la Ulterior, Publiu Carisiu, el mesmu llabor escontra los astures. El final ya lu conocemos, asina que vamos dir a lo que mos ocupa realmente.
Moneda tipu caetra
Les primeres monedes qu’entren nel territoriu astur vienen nes faltriqueres de los llexonarios romanos provenientes de la Lusitania. Traeríen con só bayura tipos, pero de xuru que’l más popular sedría’l nomáu de caetra. La caetra yera un tipu d’escudu emplegáu poles poblaciones indíxenes del noroccidente ibéricu. Yera d’un tamañu perpequeñu pa nomala escudu (dafechu, los guerreros astures llevábenla colgada delantre’l pechu na marcha y tener asina les manes llibres). Tamién yera propia de lusitanos y galaicos ya vencíos, poro, nun yera un res raro vela en pieces romanes, tan collacios éstos de grabar les armes de los enemigos ganaos en guerra.
La so representación apaez en sestercios, dupondios, ases y, probablemente, semis; toes feches en cobre ya ensin marca de ceca o taller. La so datación, dafechu, anda ente los años 27 y 19 e. C. (dellos autores ponen de tope’l 23) y magar qu’hai un gran debate abiertu sobre los llugares onde pudieren ser batíos, solo pueo decir que la mayoría de los alcontraos apaecieron en talleres asitiaos na futura Gallaecia, principalmente nes ya mentaes Bracara Augusta y Lucus Augusti. Baráxase tamién la idega de que una parte pergrande d’estes pieces fueren acuñaes en talleres ambulantes destinaos a les propies llexones (dellos ases apaecíos y del mesmu tipu dixébrense na so fechura y el metal emplegáu; unos son perfinos, propios d’una ceca fixa y otros bien toscos, fechos de mou rudimentariu. Refuercia esta teoría el que los fechos en ceca lleven mayor cantidá de plombu frente a los ambulantes, que lleven más cobre). Trátase ensin dubia d’un numberariu de guerra, col propósitu d’abastecer de moneda a los llexonarios, non solo como estipendiu pol so llabor, sinon como emplegu pa la merca cotidiana, mientres dure la contienda, la cual foi bien llonga ya que Publiu tuvo d’enfrentase una segunda vegada a los astures nel 22 e. C. y teniendo de ser ausiliáu por Cayu Furniu, llegáu de la Tarraconense. Asina y too, l’alzamientu en revueltes de los astures durarán hasta’l 19 e. C. lo que fai que dos llexones, la VI Victrix y la X Gemina s’acantonen nos llugares conocíos anguañu como Astorga y Llión, pa la vixilancia y seguranza del territoriu. Perestos caberos años ye Agripa, xenru d’Augustu, el que dirixe les operaciones, y son estes operaciones les que faen, según dellos estudiosos, que les monedes de la caetra sigan emitiéndose como pagu a la tropa mientres que dure’l conflictu.
No que se refier a la presencia d’esti tipu de moneda en territoriu astur, detacar la so presencia n’Astorga y Llión (alcordémosnos: campamentos romanos), porque lo que ye na Asturies d’anguañu, tan solo apaeció un as nel castru Cuaña.
L’anversu de la pieza nun tién dubia, el bustu del emperador Augustu cola lleenda IMP AVG DIVI F (Emperador Augustu, fíu del divinu; esti ye, Xuliu César) los símbolos de la palma y el caducéu.
No referente a los reversos, éstos camuden según el tipu de moneda. Pue aparecer l’escudu caetra solu o acompañáu d’otres armes.
Reversu d’un sesterciu cola caetra y delles filigranes alreor
Reversu d’un dupondiu onde apaez una caetra partía pela mitá por dos soliferrea (llances) y allendá por un puñal y una falcata (espada)
Reversu d’un as solo col escudu caetra
En dellos cartafueyos numismáticos atribúinse estes monedes a Publiu Carisiu, por asociales a les guerres astur-cántabres. Si bien ye verdá qu’estes monedes foron emplegaes pa pagar la soldada de los llexonarios y que Carisu yera llegáu d’Augustu na Lusitania, nun tienen porqué emparexase los fechos. Dafechu, estudios d’anguañu asocien estes monedes al llegáu Antisiu, encargáu por Augustu de la ocupación militar de los territorios galaico-portugueses al norte del riu Dueru (nun hai muncho apaeció una llámina escrita de bronce nel Bierzu na que se denomina a estes tierres Provincia Transduriana, un nome claramente provisional, o que nun cuayó, ya que tres la ocupación total del norte peninsular Roma tituló los nuevos dominios col nome de Gallaecia). Antisiu llevantó un campamentu nel llugar de la futura ciudá de Lucus Augusti (Lugo) y ellí montó un casa de llabra de moneda d’onde salieron, na so mayoría, les perres pa pagar a la so tropa y, de xuru, a les de Carisiu.
Numberariu a nome de Publiu Carisiu
Solo l’emperador tenía la potestá de mandar acuñar moneda. Otra cosa yera que delegare en dellos de los sos llegaos la puesta en praútica de dicha aición. Por norma, la ceca imperial taba asitiada en Roma, pero como que l’imperiu yera bien pergrande como p’abastecelu de numberariu salío solo de la capital. Poro, lo más praútico, yera poner en marcha dellos talleres en dellos llugares señalaos. Nel casu d’Hispania, y gracies al sentíu praúticu de los romanos, los talleres ibéricos emplegaos antanu por griegos, cartaxineses ya inclusu pueblos indíxenes (por asimilación) continuaron col so llabor, primeru en tiempos de la República romana y llueu col Imperiu (El taller o ceca más vieyu conocíu na Península ye’l de la colonia griega d’Emporión, Ampuries, en Girona). Otros diben abriéndose a medida que’l territoriu se romanizare, detacando nel norte la de Caesar Augusta (Zaragoza).
Publiu Carisiu, como llegáu d’Octaviu na Lusitania, ya exercía’l control de les dixebres ceques de la zona, incluyíes les ya esistentes na parte galaica. Les más detacaes yeren les de Bracara Augusta (Braga) y Lucus Augusti (Lugo). Más allantre elli mesmu abriría la d’Emerita Augusta (Mérida).
La llabra de moneda carisiana foi bayurosa y de dellos tipos y valores. Continuaría de xuru emitiendo monedes del tipu caetra pal pagu de la soldada de los sos llexonarios, asina como otros gastos de guerra, pero tres la supuesta victoria y entamu de la construcción de la futura Mérida, diseñó los sos propios tipos onde apaecen claramente el so nome y títulos. Eso sí, nel anversu siempre apaez el bustu del emperador Augustu. Batió quinarios, denarios, dupondios y ases y se-y supón la so llabra na ceca d’Emerita Augusta.
Santos Yanguas, dixebra en dos series les emisiones de Carisiu coincidiendo coles dos guerres escontra los astures. La primera d’elles, ente’l 26 y 25 e. C., ye la propia invasión romana del territoriu astur que finaría cola toma de Lancia, capital del país. Carisiu vendió-y esta victoria a Augustu como rotunda, y funda nel añu 25 e.C. una ciudá pal descansu de los sos eméritos (d’ehí el nome d’Emerita Augusta). L’emperador da como válida la vitoria y tranca el Templu de Xanu en Roma (señal de la fin de la guerra) y autoriza al llegáu la emisión de moneda pa sufragar tolos gastos post bélicos asina como pal sofitu de la nueva urbe.
La primer serie
Les monedes de la vitoria fainse en plata trayío de Riotintu (Huelva), quinarios y denarios, representando nel so reversu toa una triba de diseños d’aspeutu triunfal (principalmente trofeos y armes de guerra de les tribus norteñes y romanes. Hai una alta probabilidá de qu’estes monedes ya foren acuñaes nun taller asitiáu n’Emerita Augusta.
 |
| Quinariu de plata (réplica). Web todocolección |
Podríamos tar ante una moneda de “reconciliación” ente l’emperador y los veteranos de les dos llexones, la V Alaudae y la X Gemina, co-fundadores de la nueva colonia (estos llexonarios llucharon escontra Octaviu baxo les órdenes de Marco Antoniu, polo que pa ellos foi un castigu que los recompensaren con tierres en Hispania y non na Península Itálica, llugar onde recibieron la so recompensa los soldaos lleales al nuevu césar. Principiu básicu de proteición, llóxicamente).
Nos denarios, apaez nel anversu Octaviu colos títulos IMP CAESAR AVGVSTVS, mientres que nos reversos varíen los diseños, dedicaos a grafiar dixebres armes ganaes al enemigu, pero calteniendo la mesma lleenda P CARISIVS LEG(ATUS) PRO PR(AETORE).
 |
|
Semeya: Jesús Vico |
 |
| Semeya: Imperiu Numismáticu |
 |
| Semeya: José A. Hierro |
Ensin embargu, los ases acuñaos na colonia van facer referencia a la so fundación, apaeciendo nel reversu la puerte d’entrada de la muria a la ciudá xunto cola mesma lleenda de los denarios P CARISIVS LEG(ATUS) PRO PR(AETORE)
Segunda serie
La supuesta vitoria escontra los astures nun foi del too verdaera. El segundu enfrentamientu entama a causa de la crueldá del llegáu pa cola comunidá indíxena. Carisiu intenta sofocalo, pero ye vencíu y arrodiáu nel so campamentu de Picu Curriechos, hasta que foi socorríu pol nuevu llegáu imperial de la provincia Tarraconense, Cayu Furniu. Los astures foron nuevamente vencíos allá pel añu 22 e. C., mesmu añu en que foi destituyíu Carisiu por incompetente.
Esta serie va carauterizase, principalmente, pola so fechura en cobre, propio de les monedes básiques de circulación emplegaes pal pagu la tropa y el mercadéu cotidianu. Ye por ello que l’asemeya más a les acuñaciones de caetra, esto ye, acuñaciones propies d’un estáu bélicu y que, si facemos casu a dellos estudiosos, van coesistir n’esta segunda brenga. Detácase tamién que n’esta serie a Augustu se-y titula TRIBVNI POTEST, fechu acaecíu en Roma allá pel 23 e.C.
Pa los dupondios Augustu apaez cola lleenda AVGVST TRIB POTEST y nel reversu grábase solo la lleenda P CARISIVS LEG(ATUS) AVGVSTI
No referente a los ases, esisten delles variantes tanto pol anversu como pol reversu. Según l’anversu, na catalogación rexistrada por Sutherland, apaecen 13 variantes; nun camuda’l bustu l’emperador pero sí la lleenda CAESAR AVGVST TRIBVNI POTEST, onde puen apaecer más o menos lletres. Nel reversu grábase namás q’una lleenda con dos diseños, ún cola lleenda P CARISIVS/ LEG (en dos llínies) o P CARISIVS/ LEG/ AVGVSTI (en tres).
 |
|
Fonte: kripkit |
Tres la pacificación del territoriu nel añu 19 e. C., ye de suponer qu’a los llexonarios equí asitiaos, faciendo ya funciones de tipu policial, asina como de vixilancia y custodia del oru sacáu de los nuesos montes, se-yos asignare personal civil con funciones de tipu alministrativu, asina como la llegada de comerciantes y homes de llabor, encargaos d’organizar y diseñar toles obres civiles necesaries (víes, acueductos, civitas y villaes) acompañaos a la par de familiares y artesanos. En fin, qu’esti trasiegu de xente va facer que’l dinero circule y s’esparda per tol territoriu. Nel casu de los indíxenes, el so ancestral troquéu va seguir siendo el so mou de comerciar, dexando’l numberariu pa casos imperativos (de xuru que los romanos tamién –y veríen bones ventaxes al sistema autóctonu).
Una de les causes, quicias la más importante, de que los romanos conquistaren tol noroeste peninsular, foi la presencia d’oru nel llugar. Sabíen que los autóctonos sacábenlu de dellos ríos pol sistema del batéu, poro, yera de suponer qu’esti agua pasaba por dalgún filón aúreu nel intre los montes. Esbarumbando montañes con métodos mineros de derrabe, convirtieron l’Astura nuna de les principales suministraores d’oru del Imperiu.
Ayalgues alcontraes n’Asturies en cronoloxía col Imperiu Romanu
L’Imperiu Romanu nació a finales del sieglu I e.C. (nel añu 27) y duró hasta’l V d. C (añu 476) poro, ye de llóxica qu’a lo llargo d’estos 500 años la llabra moneda ufriere dellos cambios, tanto nel tipu como na calidá. N’esta estaya, la facultá de batir moneda n’oru y plata yera esclusiva del emperador, polo que’n toes elles debía aparecer la so efixe o la de dalgún miembru detacáu de la so familia (lo que mos facilita sobremanera la so clasificación).
En tiempos del primer emperador, Octaviu Augustu, les monedes d’oru batíes foron nomaes áureu y el so dixebru, quinariu áureu; les de plata foron el denariu y el so dixebru, el quinariu, y en bronce sedríen el dupondiu, el sesterciu, l’as y el semi. Esti sistema, con dellos retoques, perduró hasta’l sieglu III d.C., ufrinendo depués una dexeneración de la so lliga nes monedes d’oru y plata en delles reforemes ente los sieglos III y IV.
Siguiendo entós esta cronoloxía de les reformes y los emperadores asitiaos n’elles, fago equí un llistáu d’ayalgues alcontraes n’Asturies y ya clasificaes polos especialistes al día de güei.
Entamando pola primer estaya (sieglu I e.C. al sieglu III d.C.) atopamos delles ayalgues:
N’escavaciones nel castru Cuaña apaeció un as de caetra, acuñación típica de la estaya de les guerres escontra los Astures;
En Banduxu (Proaza) y el castru d’Esteiro (Tapia) apaecen monedes de Carisiu.
Nel castru d’Arancedo (El Franco) apaecen monedes d’Augustu y Tiberiu.
L’ayalga de Coyanca (Carreñu) caltenía áureos a nome de Nerón, Vespasianu, Traxanu y Adrianu, dataos ente los años 54 y 138 d.C.
Dos sestercios d’Adrianu aparecieron tamién nel dragáu de la Ría d’Avilés allá pelos años 30 del sieglu XX.
La triba monedes alcontraes pel territoriu astur dataes nel sieglu II d.C. fai suponer qu’esistió una bayurosa circulación de monedes ente los ciudadanos romanos y romanizaos, ya qu’ente la población indíxena la cosa nun cuayaba y seguíen col so ancestral sistema.
Nel añu 214 l’emperador Caracalla empobina una reforma monetaria cola fin de sanear les arques del estáu. Apaez una nueva moneda, l’arxenteus antoninianu, con una base de plata pero amestá con cobre, lo que fai que la so llei se rebaxe y seya de pior calidá; esta moneda ta catalogada como la precursora del vellón. A ello hai que suma-y que les esplotaciones d’oru astures ya nun dan un res. Estos cambios fain que la xente desconfíe y que se dedique a atropar y guardar les monedes antígües, de meyor calidá, y que dexe pal día a día la puxarra. Ye por ello l’aparición d’ayalgues con un bon númberu de pieces, escondíes, quicias, por dalgún aforraor.
D’esta estaya ye l’atopada en San Tiso d’Abres, con antoninianos de Gordián y Filipu I;
La de Grandas de Salime con antoninianos de Galiernu y Cloyo II;
La del castru de Doña Palla, Pravia, que caltién dende denarios republicanos a numberariu de Nerón, Traxanu y Póstumu.
L’aparición d’ayalgues con monedes de dixebres estayes nun ye un res raro, ya que lo que realmente interesaba de la pieza yera’l so conteníu en metal noble, oru y plata, que la procedencia de la mesma, magar qu’estos metales perduren nel tiempu y caltienen un valor intrínsecu propiu, cosa que nun pasa colos cobres.
Pel añu 294 l’emperador Dioclecián trata d’amenorgar esta crisis, creando un nuevu sistema onde acuñará monedes d’oru nomaes áureu y mediu áureu; el arxentus en plata, y, en vellón,l’antoninianu y el follis. D’esta estaya pue que seya l’ayalga de Foxó (Yernes y Tameza).
Ya nel sieglu IV, l’emperador Constantín promueve una nueva reforma y un nuevu sistema, basáu nos sólidus y trientes pal oru, l’arxentus y la silicua pa la plata y el follis pal vellón, xuntu con otres pequeñes monedes. La inestabilidá política del imperiu ye ya palpable y ello fai que creza l’interés de la población por atropar y esconder perres de cualisquier triba. Bien gordo debieron velo los vecinos de Xixón p’amuriar la so ciudá. Les ayalgues atopaes d’esta estaya son bayuroses pero de más baxa calidá, pues taben formaes principalmente por monedes de cobre; apaecen n’escavaciones en Bimeda (Cangas del Narcea), Sarceada (Samartín d’Ozcos), Llangréu, Castiel.lu (L.lena), Santaya d’Ozcos, Serín (Xixón) o Berció (Gráu) a nome d’una bona triba d’emperadores. La falta de numberariu fexo que la población en xeneral tornare al so vieyu sistema del troquéu, enxamás dexáu polos astures.
Llegáu’l sieglu V, l’esbarrumbe del Imperiu romanu d’occidente y les invasiones bárbares faen que la xente torne a la seguranza de les muries de los vieyos castros, recuperando un mou de vida ancestral que nunca desapareciere a pesar de los intentos de romanización. La inestabilidá política, la falta de comerciu tresfronterizu y el consabíu aislamientu xeográficu d’Asturies, fixeron, cenciellamente, que la circulación de moneda desapareciere, y que’l troquéu tornare a ser el sistema dominante. Les ayalgues de Chapipi, alcontrada en Coalla y de Berció, dambes dos en Gráu, tan rellaicionaes direutamente cola llegada de los suevos a la provincia hispana de la Gallaecia. La de Chapipi vién formada por monedes d’oru, solidus y trientes, dataos ente los años 379 y 423 a nome de los emperadores Teodosiu, Honoriu y Arcadiu, xuntu con un aniellu tamién d’oru. La de Berció, entá por estudiar, caltién unes 209 pieces de cobre d’ente los sieglos III y V.
Bibliografía:
Monedas y billetes en la historia de Asturias. Dellos collaboraores. Editorial Prensa Asturiana, SL.
Hispaniae. Las provincias hispanas en el mundo romano. Javier Andréu Pintado,Javier Cabrero Piquero, Isabel Rodà de Llanza (editores). Documenta11. Institut Català d’Arqueologia Clàssica. Tarragona, 2009.
La moneda lucense de la caetra. Pablo Núñez Meneses. Revista OMNI nu 8, Payares 2014.
Las acuñaciones monetales de Publio Carisio, legado de Augusto en Lusitania, y la conquista romana del N.O. peninsular. Narciso Santos Yanguas. Universidá d’Uviéu. Aquila legionis: cuaderno de estudios sobre el Ejército Romano. Nº 4. 2003. (pp. 165-166).
Publio Carisio. Deductor de la colonia Emerita Augusta. Enrique Antón Gil. IES Puente Ajuda, Olivenza.
Casco, hacha y puñal: la panoplia de un jefe astur en una moneda de Carisio. Proyecto MAURANUS por José Ángel Hierro Gárate (www.historiayarqueologia.com)
Wikipedia: Publio Carisio
Guerras Cántabras (castellán)
No hay comentarios:
Publicar un comentario