Tres coses qu’ensin dubia inflúin na valoración d’una moneda son la so calidá, el so estáu de conservación y la so rareza. De magar que muncha xente opina que ye una materia suxetiva, ya inclusu discutible, lo cierto ye qu’esiste bastante consensu sobre la escala de graduación na conservación de les pieces na numismática, sobre manera na arqueolóxica.
Praúticamente en tolos países onde haya una notable afición al conservacionismu y colleicionismu de monedes, esisten unes tables bien definíes pa clasificar diches monedes según el so grau de conservación. La clasificación española ye bastante completa pal trabayu que mos ocupa, si bien ye cierto que, como en too, pa clasificaciones internacionales nun mos va quedar otra que tirar de clasificaciones britániques y americanes.
Ensin embargu, y a pesar de les susodiches llistes, el grau de conservación d’una moneda tiende a ser una valoración daqué suxetiva otorgada por un espertu y teniendo en cuenta dellos factores como la circulación, el métodu d’acuñación, el metal, etc…
La rareza d’una pieza (por ser escasa o con dalgún defeutu na so acuñación que la fai única) pue descolocamos un pocuñín a la hora de clasificala: podemos atopar monedes antígües catalogaes como perbien conservada y tar desgastada enforma, pero que ye mui escasa y ta fecha d’un material como’l bronce, que dexenera rápidamente col paso del tiempu.
Primer clasificación: La calidá de la moneda
Lo qu’equí miramos realmente ye’l mou de fabricación de la moneda; ye por ello que vamos atopar términos bastante internacionales.
Buillon: Cuando falamos d’esti tipu de moneda referímonos a les pieces fabricaes en metales nobles, oru y plata, destinaes espresamente a la inversión y non a la colleición. Ye por ello que’l so mou de fabricales seya igual que les dedicaes a la circulación, ensin ningún tipu d’aplicación especial. Los Krugerrand sudafricanos o los euros de la Filarmónica de Viena son un claru exemplu.
Los típicos Krugerrand son d’oru con una llei de 900 milésimes y un pesu d’una onza troy (31,10 gr).
La moneda de plata ye menos indicada pa la inversión en metales nobles que la d’oru, pero’l so preciu, más económicu, faise llambión pa los pequeños inversores.
Preba (PRF, Prueba o Proof): Cuando se diseña un cuñu faise una preba acuñando una moneda y asina, tres ver el resultáu, da-y el vistu bonu, modificalu o refugalu. Esti ye’l conceutu básicu d’una moneda de preba. Pero anguañu esti términu más conocíu nel mundu numismáticu como proof, indica una téunica de fabricación dixebrada de la ordinaria. En realidá ye una téunica d’acuñación na que’l cuñu emplégase a una velocidá más llento de lo normal, dándo-y al mesmu cospel dellos güelpes pa sacar una imaxe perfeuta; de magar, el troquel llímpiase cada vez que se fai una moneda. La pieza acuñada pasa llueu per un procesu de pulíu y matización del so campu, quedando ésti rellumante como un espeyu (fondu espeyu) y colos relieves detacaos, en mate; sálvase d’esti procesu namás que’l cantu, polo que sedría l’únicu sitiu pol que se pudiere garrar la moneda si nun queremos que l’efeutu espeyu de la pieza quede marcáu pa siempre pola nuesa güelga dixital. Estes monedes acúñense espresamente pa colleicionistes y non pa la circulación ordinaria. Lo más normal ye que temos ante monedes de plata conmemoratives, anque delles vegaes tamién suelen acuñase monedes tipu cola so aleación de metales ordinaria en calidá proof.
Preba de cuñu de los primeros diseños de la futura (ya presente) moneda d’euru.
Moneda de 2 euros conmemorativos pa circulación ordinaria acuñada en calidá proof. Suelen vendese pa colleicionistes en coincards.
Moneda de plata de 10 euros diseñada esclusivamente pa colleicionistes en calidá proof. Véndense siempre metida nuna cápsula de plásticu y nun estuchín perguapu con una tarxetina certificando la so autenticidá.
FDC (Flor de Cuñu), BU o BUNC (Brilliant Uncirculated): Son les primeres monedes troquelaes por un cuñu nuevu, enantes de perder pol usu un pocu de perfección o fondura de los relieves. Destinaes a colleicionistes, nun lleven tratamientu proof, anque caltienen un rellume propiu de la mesma fabricación. Tampoco tienen porqué tar feches con materiales nobles, dafechu la mayoría d’estes monedes son les propies que vemos circulando pela cai, pero que tovieron la suerte de ser les primeres en salir acuñaes, polo que son apartaes pa la venta espresa a colleicionistes o bien en carteres o bien en coincard. Considérense tamién flor de cuñu toles monedes anteriores al sieglu XIX que nun presenten defeutos.
Detácase bien una proof d’una FDC n’esti leb búlgaru d’época socialista.
Segunda clasificación: Los estaos de conservación
La escala o tabla d’estaos de conservación nació cola fin de clasificar les monedes vieyes, ya qu’hasta hai bien poco el colleicionismu numismáticu taba restrinxíu a eruditos ricos. Cola posibilidá de viaxar de la clas media y la obrera, nació n’éstes curiosos qu’atropaben sobre too moneda estranxera trayía de les sos aventures per Europa, principalmente. La posibilidá de mercar tamién en tiendes especializaes a bon preciu monedes de tol mundu y, sobremanera, el nacimientu del euru, fexo qu’estes tables de conservación s’aplicaren de mou xeneralizáu.
Al nun esistir una escala propia n’Asturies, ye normal dexar equí la nomenclatura española. Estos son los graos de conservación ordenaos de meyor a pior:
Ensin Circular (SC. Sin Circular): Pieces destinaes a la circulación pero que dafechamente nun lo fixeron. Sedríen les siguientes en salir de los cuños tres les FDC, polo que tendrá los relieves más suaves pol desgaste del troquel. Pueden tener dalguna marca o señal debío a que son envasaes delles xuntes en cartuchos palso tresporte. Éstes son les típiques que podemos mercar nes tiendes numismátiques y suelen venir en fundes de plásticu o cartones diseñaos esprocesu pa la so venta.
Escelente bona conservación (EBC): Pieces con escasa circulación; nun deben tener raspiones nin güelpes apreciables a pesar del usu o manipulación. Nun se debe apreciar desgaste nos relieves y conservar el rellume orixinal anque se-y detecte pátina.
Perbona Conservación (MBC. Muy Buena Conservación): A pesar de notase que circularon, caltién los relieves perbien conservaos y les lleendes son llexíbles. Nótase, eso sí, un llixeru desgaste nos detalles más sobresalientes del grabáu. Pue tener pátina.
Bona Conservación (BC): Pieces bastante desgastaes pol usu, sobre too la figura central; puen tener tamién dalgún raspión o güelpe, marques de ferruñu o pátina fonda. Inda se-y puen lleer les feches y lleendes. El so valor numismáticu ye claramente inferior al MBC.
Regular Conservación (RC): Son pieces totalmente desgastaes pero que, con un pocuñín de güeyu, dexa a la vista dalguna pista pa la so catalogación (feches, lleendes…). Nun valen pa una colleición, salvo que seya una moneda RR (per rara). Puen uncluyíse monedes doblaes, partíes, abollaes y con raspiones.
Mala Conservación (MC): Monedes perdesgastaes onde ye praúticamente imposible identificar los debuxos y les lleendes; puen tener una gran pátina, el metal ya nun relluma y detáquense imperfecciones: grietes, abollones, cantu erosionáu, etc… L’únicu mou d’aldivinar el tipu moneda que ye, ye gracies a la identificación del metal o aleación, el pesu o el tamañu de la pieza.
Nota: Si la moneda anda ente dos categoríes pue indicase de dos maneres, o con una barra inclinada ente les sigles de la categoría (ex: EBC/MBC), o bien añadiendo un signu “+” o un “-” al llau de la valoración (ex: MBC+, MBC-).
Los estaos de conservación según la escala británica
La tabla británica ye meticulosa enforma, en dellos casos nun hai equivalente na española, pero ésta, tirando de maxín, suple esa carencia emplegando los símbolos + y –
Proof: Como n’España, nun ye un estáu de conservación, sinon una téunica de fabricación. Póngola equí porque normalmente, tamién n’España, esti tipu de monedes de preba van dir identificaes precisamente col términu inglés proof.
FDC (Fleur de coin): Moneda cuyu cospel orixinal foi golpiáu por cuños frescos, o seya, nuevos, que nun sufrió desgaste ningún conservando toles sos carauterístiques orixinales; bien centrau el cuñu y unos diseños claros. Nuna pallabra, impecable.
UNC (Uncirculated): Pieces destinaes a la circulación pero que dafechamente nun lo fixeron. Sedríen les siguientes en salir de los cuños tres les FDC, polo que tendrá los relieves más suaves pol desgaste del troquel. Pueden tener dalguna marca o señal debío a que son envasaes delles xuntes en cartuchos palso tresporte. Éstes son les típiques que podemos mercar nes tiendes numismátiques y suelen venir en fundes de plásticu o cartones diseñaos esprocesu pa la so venta. Equival a la nuesa SC.
Choice EF: Pieza con desgaste mínimu, imperceutible ensin ayuda de lupes, nes zones de másimu rozamientu. Aparte, ta perbien acuñada y, en casu la plata, caltién el rellume orixinal. Equival a una EBC.
EF (Extremely Fine): Desgaste casi inperceptible, como l’anterior, pero ensin nenguna otra peculiaridá. Una EBC-.
Near EF: Desgaste visible nes zones d’altu relieve pero que nun aparez nel restu la moneda, calteniendo el diseñu una másima definición y afiláu, ya inclusu pue conservar el brillu d’orixe en delles zones protexíes de la moneda como los caracteres o les partes internes del diseñu (les ranures del relieve, por exemplu). Sedría una MBC+
Choise VF: Pieza a mediu camín ente VF y Near EF con una bona definición del diseñu amén de cumplir con unes caracteurístiques escepcionales d’escelencia tales como’l centráu y calidá del güelpe. Una MBC.
Good VF: Pieza a mediu Camín ente VF y Near EF con una bona definición del diseñu, pero ensin esi aspeutu particularmente afiláu del EF. Una MBC-.
VF (Very Fine): Pieza onde tolos detalles son visibles a pesar de vese un desgaste xeneralizáu en tol diseñu. Una BC+.
Near VF: A Camín ente VF y Good Fine. Pieza na cuala s’aprecia un desgaste xeneralizáu en tola superficie’l diseñu y con perda de dalgunos detalles de mediana importancia. La lleenda aparez completa. Una BC.
Good Fine: Pieza col diseñu y la lleenda más o menos completa, pero na que se detecta un desgaste xeneralizáu. Una BC-.
Fine: Pieza con desgaste xeneralizáu, pero cola suficiente información pa descubrimos cómo yera orixinalmente. Parte de la lleenda ye illexible. Una RC+
Near Fine: Ente Fine y Fair. Una RC.
Fair: (Xustu n’inglés). La mayor parte de los detalles de la pieza y la so lleenda tan desaparecíes, malapenes se ve dalguna lletra y s’adivina el diseñu xeneral aun tando mui borrosu. Aún asina, anquen un tengamos nin idega de como yera la moneda, podemos clasificala con bastante aprosimación esforzándomos un pocuñín. Una RC-
Poor: Pieza ensin valor estéticu y, poro, ensin valor numismáticu. Pieza que solo podría ser clasificada por un espertu, si pagare la pena perder el tiempu con ella. Una MC.
En dellos catálogos ingleses puede aparecer un indicativu del tipu F/VF, qu’indica realmente que l’anversu tién una calidá F y el reversu una VF. Suel indicase cuando les diferencies ente danbes dos cares son nidies.
Los estaos de conservación a la americana
Hai dellos años, el Dr William Shelby diseñó una escala pa clasificar les monedes partiendo d’unos valores numberaos de 0 a 70 y que foi documentada na guía de Estándares oficiales de graduación de l’ANA pa les monedes de los Estaos Xuníos. La ANA ye la American Numismatic Association. La cultura numismática nos Estaos Xuníos ye descomaná, hasta’l puntu de que los meyores catálogos de monedes de tol mundu y toles estayes, tan ellí espublizaos (como exemplu valga que les meyores colleiciones y guíes de monedes tipu columnariu del Imperiu Hispánicu tiénenles ellos). Por ello nun ye un res raro atopar información de monedes catalogaes con esti sistema.
El sistema ye bien cenciellu inclusu pa xente novato na tema, ya que, básicamente, básase’n dar una puntuación a una pieza según la so conservación, 70 sedría la másima y 0 la peor. Pa facilitar un pocuñín l’asitiamientu de la moneda y poder comparala coles escales clásiques (la inglesa, caro) el númberu va venir precedíu por un par de lletres, abreviatura de cierta calidá. Vémoslo equí:
MS (Mint State, Estáu Impecable): Emplégase pa clasificar les pieces Ensin Circular, Rellumante Non Circulá (BU) esto ye, ensin desgastes. La presencia de raspiones o manches na moneda nun afecta a esta cualidá, pero sí a la so calidá de conservación que va fixándose con una numberación añadía:
MS-70: Ensin circular y en perfeutes condiciones, ensin desgastes, defeutos o raspiones provocaos inclusu pol meru contáutu con otres monedes (como pue pasar nos cartuchos d’almacenaxe). Moneda perfeuta.
MS-67,68,69 (Ensin circular Xema Magnífica): Moneda coles más mínimes marques o imperfeciones. Rellume intautu.
MS-65,66 (Ensin circular Xema): Ensin circular que caltién tol rellume en perfeutu estáu, con dellos raspiones por contautu con otres pieces nel so almacenaxe.
MS-64 (Non circulá Elexible): Marques o deficiencies moderaes. La so guapura visual ye peralta.
MS-63 (Non circulada Selecta): La so guapura visual ya ye más ordinaria que la MS-64.
MS-60,61,62 (Non circulada): Ensin circular ya ensin desgastes, pero con marques de contáutu, manches na superficie y perda de rellume.
A
partir d’equí la escala va dirixida a les monedes en circulación, entamando
poles marcaes poles siegles AU (de Almost Uncirculated, casi ensin
circular) pa monedes casi nueves. Unos exemplos:
AU-55: L’únicu defeutu que tién la moneda ye un desgaste perllixeru na zona más alta del diseñu; tién de caltener la mayoría del so rellume.
AU-50: Atopamos un pocu más de desgaste nos puntos altos del diseñu y la perda de dalgo menos de la mitá del rellume orixinal.
Per baxo, les abreviatures aseméyense ya a les conocíes britániques: EF, escelente estáu
de conservación; VF, bon estáu de conservación; F ya ye una pieza
regular; asina que VG, G y AG son siegles propies pa pieces que van de mui
regular a males. Equí unos exemplos:
EF-40: Apercíbese nel desgaste que ye una moneda usada, asina aún toles sos carauterístiques son bien nidies y tan bien definies.
VF-30: Desgastes na superficie y les partes altes del diseñu, la mayuría de les lletres y los detalles son visibles.
VF-20: Los detalles más finos del diseñu tienen un desgaste apreciable, pero los detalles más importantes caltiénense nidios.
F-12: El desgaste de la pieza ye apreciable ya nes lletres y detalles, pero inda vemos una bona parte del diseñu.
VG-8: Desgaste xeneralizáu; dalgunos detalles son visibles asina como los bordes de la moneda.
G-4: Moneda perdesgastada, anque’l diseñu y la lleenda tovía son visibles. Munchos de los detalles tan desaparecíos.
AG-3: El desgaste ye tal que malapenes puen identificase les lletres, la fecha o les lleendes.
La meticulosidá de los americanos ye heriede de los británicos, llevándolos inclusu a clasificar por separao l’anversu del reversu, polo que’n dellos catálogos podemos atopamos con una clasificación del tipu MS-65/63, lo qu’indica una mayor calidá de proteición del anversu, que, por ciertu, ye’l que manda a la hora clasificar la calidá d’una moneda (un reversu meyor rebaxaría la clasificación de la moneda: una MS-60/61, quedaría en MS-60). Nel tipu anterior podría sacase una media MS- 64.
Tercer clasificación: sigles de pieces rares (usaes en dellos cartafueyos)
Una pieza rara ye aquella qu’escasea, hai poques. Normalmente suelen ser monedes acuñaes en tiempos d’antanu, de la Grecia clásica, romanes, íberes, hispániques, andalusíes… monedes que nun s’acuñaben en grandes cantidades y de les qu’anguañu queden bien poques pola so desaparición a lo llargo de tantos sieglos. Oru, plata y cobre son los metales más emplegaos na so fabricación (antes el valor del dineru taba fixáu pol material de la so fechura). Delles vegaes, nos catálogos numismáticos de pieces rares, al pie de la moneda suel venir una sigla cola qu’identificar el grau de dicha rareza (ta nidio, a mayor rareza, más cara):
Tabla graos (Escala rareces universal por Q. David Bowers)
Quentin David Bowers ye un numismáticu norteamericanu especializáu en rareces. La so meticulosidá nel estudiu de monedes plasmose nuna práutica tabla qu’entama con una llista graos, de menor a mayor según la rareza de la pieza. Visto’l grau, echamos mano de la tabla y sabremos la cantidá de pieces, aprosimao, acuñaes y poro, la so clasificación.
Fontes: Sólidus Áureus (castellán)
www.supercoleccionistas.com (castellán)
Foru Imperio Numismático (castellán)
Catálogo de monedas de España y euros (castellán)
Blognumismatico.com (castellán)
Wikipedia: Krugerrand
Oroinformación.com (castellán)
Web FNMT. com (castellán)
No hay comentarios:
Publicar un comentario