L’Ametlla del Vallès ye un conceyu asitiáu
a unos 35 kilómetros al noreste de Barcelona ciudá. Dende entamos del sieglu XX,
alterna la so vida agrícola cola de ser un centru de branéu.
Durante la Guerra Civil (1936-1939)
asitiose al lláu de la República, como’l restu Cataluña y sábese qu’acuñó les
sos propies monedes pola falta suministru de les mesmes por parte los dos
gobiernos (el central y el de la Generalitat). Les monedes de necesidá emitíes
foron de 25 y 50 céntimos, asina como de 1 peseta.
La de 25 céntimos foi fecha en latón y
acuñada solo en una primer emisión de 1937. Al ser una pieza relativamente
asequible, nun suelen aparecer falsificaciones d’ella; nun paga la pena. Otra
cosa son los otros valores.
Les monedes de 50 céntimos y 1 peseta
foron feches n’aluminiu Y se fixeron tres emisiones, polo qu’esisten variantes.
N’esti casu hemos de tener cuidáu con posibles falsificaciones, porque los
precios se disparen un pocu. Como referencia (2015) una serie completa de les
tres monedes pue salinos por unos 1.400 euros.
La primer serie ye la más llaboriada;
aparez nel so anversu el nome del conceyu emisor xunto al so valor nominal y
too ello en catalán. Nel reversu apréciase l’escudu del conceyu.
25 céntimos
50 céntimos
1 peseta
La segunda serie (solo pieces de 50
céntimos y 1 peseta) tién unos anversos más toscos, lleven grabáu non más que’l
valor nominal de la moneda: el de 50 céntimos aparez nel campu central de lo
que pue asemeyase a una bandera, y la peseta presenta’l so nome en castellán
(peseta y non la catalana pesseta) asina como un 8 (o dellos) troquelaos
caberamente de mou artesanal. Dellos estudiosos espliquen esta rareza a que
pudiere que les monedes s’acuñaren en 1938, indicándolo asina, pero otros
refuguen el fechu, ya que estes marques solo aparecen na moneda de 1 peseta de
la segunda serie y perrarísimamente na de 50 céntimos, pa lluéu desaparecer na
tercer serie. Tamién ta comprobao qu’esi 8 vién troqueláu una o delles vegaes
nel anversu la pieza ya inclusu hai pieces con dicha marca nel reversu, daqué
raro pa marcar una fecha ¿non?.
50 céntimos
1 peseta
La tercer serie ye igual que la segunda,
ameyorada ya ensin los 8. Mantién el nome de peseta en castellán.
50 céntimos
1 peseta
No hay comentarios:
Publicar un comentario