2016: Eino Leino

Motivu conmemorativu: 90^u Cabudañu d’Eino Leino

Tirada: 1.000.000                  Fecha d’emisión: 25 d’abril      

     Armas Einar Leopold Lönnbohm, nomáu Eino Leino (1878, Paltamo -1926, Tuusula) foi un escritor, poeta y periodista finlandés. Ta consideráu como ún de los escritores más destacaos de Finlandia pola so amplitú lliteraria qu’atropa noveles, poemes y obres de teatru. El 6 de xunetu, día del so nacimientu, ta catalogáu como el día d’Eino Leino en Finlandia, izándose la bandera nacional nel so honor.

     Leino espublizó más de 70 llibros de poemes y cuentos, siendo’l más famosu el poemariu Helkavirsiä (creau ente 1903 y 1916) y nel qu’emplega fondamente mitoloxía y folclor finlandés.

     Nel intre la moneda aparez un fuéu vivu, daqué constante na vida d’Eino sobre un atizador. La robla del conmemoráu va xunto al añu d’emisión 2016. A manzorga, les iniciales del país emisor Fi y la marca de la ceca de Vantaa.

     Nel aniellu esterior les doce estrelles de la Xunión Europea.