Conseyos Municipales de Menorca

     Menorca foi la única islla balear que se caltuvo fiel a la República. Si na península había problemes col suministru de monedes pal usu cotidianu, ya nun digamos nuna islla que, aparte del agua, taba arrodiada pol enemigu. Ye por ello que los Conseyos Municipales decidieran,en 1937, facer moneda fraccionada pa paliar esa falta. Calculose d’entamu una cantidá de 173.029 pieces, dixebrada en cinco valores nominales: 5,10 y 25 céntimos; 1 y 2,5 pesetes. El coste del encargu ascendería a 111.839,55 pesetes y se pondríen en circulación al añu siguiente (según relata Deseado Mercadal en La Guerra Civil en Menorca). Según dellos cartafueyos numismáticos, sumando les cantidaes de monedes por cada valor, el pedíu nun algamó la cantidá solicitada por 100 pieces .

     El diseñu del anversu y reversu de les monedes foi encargáu al historiador y dibuxante Francesc Hernández Sanz, qu’a la par yera cronista-archiveru del ayuntamiento de Maó. L’acuñación de les mesmes féxose na fábrica de bisutería de Joan Torrent Torres asitiada en Ciutadella (poro, equí tenemos el nome de la ceca). Sábese tamién el nome de los trabayaores encargaos del llabor: Juanito Pons foi l’autor de los troqueles Y Jaume Mesquisa el responsable de la producción. Estos datos tan recoyíos nel artículu Monedes i bitllets encunyats a Menorca durant la guerra civil de Joan Pons Huguet ya incluyíu en Publicacions des Born. La escoyeta de la fábrica de Torrent pa esti llabor foi cenciellamente pola gran cantidá de planches de llatón qu’ellí había almacenaes (efeutivamente; les monedes son de llatón).

     Los cinco valores caltienen el mesmu tipu: nel anversu aparez centráu l’escudu de les municipalidaes arrodiáu por una circunferencia puntos y la lleenda CONSEJOS MUNICIPALES DE MENORCA 1937. Nel reversu aparez a manzorga una cañina d’olivu y a mandrecha la lleenda REPÚBLICA ESPAÑOLA, mientres qu’entemediu vese’l valor nominal de la moneda (lo único que difier a los diseños) sobre una estrella 5 puntes. ¿Y qué ye esa estrella? Realmente, a saber. Dellos estudiosos dicen qu’hai qu’equiparala cola estrella bermeya, símbolu revolucionariu por antonomasia, bien seya pol inclín políticu del Conseyu, de los xestores de la fábrica (delles vegaes los propios sindicatos) o la radicalización común na islla ante la situación estrema na que s’atopaben. Bono, ye posible; dalgún día lo sabremos.

5 céntimos (1937)

10 céntimos (1937)

25 céntimos (1937)

1 peseta (1937)

2,50 pesetes