2015: Spyridon Louis

Motivu conmemorativu: 75^u Cabudañu de Spyridon Louis

Tirada: 750.000               Fecha d’emisión: 23 d’avientu

     Spyridon Louis (1873 –1940), conocíu pol nomatu de Spyros, foi un corredor griegu que ganó la medaya d’oru na maratón de les primeres Olimpiaes de la era moderna en 1896.

     De vendedor d’agua nes cais d’Atenes, pasó a ser seleicionáu pol coronel Papadiamantopoulos pa competir n’esti evento que se facía por primer vez. Louis completó los 40 Km en 2h, 58 min y 50 s, superando a deportistas internacionales perconocíos como Albin Lermusiaux y Teddy Flack, ganadores de medayes en carreres de media distancia y al corredor favoritu de Grecia, Kharilaos Vasilakos, ganador de la prueba de maratón nos Xuegos Panhelénicos, convirtiéndose asina n’héroe nacional al conseguir la única victoria griega n’atletismu.

     Ésta foi la única competición de carauter oficial que fexo Louis a lo llongo la so vida. Tres los xuegos, tornó pal so pueblu pa trabayar primeru de granxeru y finar como axente de policía.

     Nel intre la moneda aparez una imaxe de Spyros Louis y la copa que recibió, col estadiu Panatenaicu de fondu. Alredor del diseñu aparez la lleenda 75 ΧΡΟΝΙΑ ΜΝΗΜΗΣ ΣΠΥΡΟΥ ΛΟΥΗ (75 años en memoria de Spyros Louis) y el nome del país emisor ΕΛΛΗΝΙΚΗ ΔΗΜΟΚΡΑΤΙΑ (República Helena). Sobre la copa aparez l’añu d’emisión 2015 y, a mandrecha, la marca de ceca de Halandri. Sol grabáu aparez el monograma del artista George Stamatopoulos (ΓΣ).

     Nel aniellu esterior les doce estrelles de la Xunión Europea.