2015: Akseli Gallen-Kallela

Motivu conmemorativu: 150^u Aniversariu del nacimientu de Akseli Gallen-Kallela

Tirada: 500.000                  Fecha d’emisión: 22 d’ochobre       

     Akseli Gallen-Kallela (1865–1931) artesanu, illustrador y pintor finlandés, perconocíu poles sos illustraciones del Kalevala, el poema épicu nacional finés. El so trabayu considérase perimportante nel surdimientu del sentimientu nacional d’esti país. Estudió arte en París y d’esta época son cuadros como Neñu con un cuervu, Vieya y gatu o Démasquée. Tres esti periodu realista, torna a la so fixación infantil pola epopeya finlandesa del Kalevala, de la que salieron obres como’l trípticu Aino, La forxa del Sampo y Má de Lemminkäinen. D’esta tema tamién salieron los sos frescos pal pabellón de Finlandia na Esposición Universal de 1900 en París.

     Nel intre la moneda aparez la figura d’un cisne de Tuonela (poema de Jean Sibelius), nadando sobre unes foles. A mandrecha, les iniciales del país emisor Fi. Alredor, en semicírculu, el nome del conmemoráu AKSELI GALLEN KALLELA dixebráu por una paleta pintor onde aparecen l’añu nacimientu del artista 1865 y l’añu d’emisión 2015, a la par de la marca de la ceca de Vantaa.

     Nel aniellu esterior les doce estrelles de la Xunión Europea.