2014: Serie Patrimoniu de la Humanidá

Motivu conmemorativu: Obres de Gaudí. Park Güell

Tirada: 8.000.000              Fecha d’emisión: marzu

     Antoni Gaudí i Cornet (Reus o Riudoms,1852 - Barcelona, 1926) arquiteutu catalán, másimu representante del modernismu n’esti país. Tenía un sentíu innatu de la xeometría y el volumen. Estudiaba hasta los detalles más nimios de les sos creaciones, emplegando inclusu trabayos artesanales qu’elli dominaba (cerámica, vidriería, forxa, carpintería…). Introdució, asina mesmu, nueves teúniques nel tratanientu del material, como’l so famosu trencadís, fecho con pieces desaniciaes de cerámica.

     Primeros pasos pel neogóticu, másima efervescencia pa col modernismu… esti rellumante arquiteutu creó’l so propiu estilu basáu na observación de la natura. Tola so obra quedó marcada poles sos cuatro grandes pasiones: l’arquitectura, la natura, la relixón y el so amor haza Catalunya. Almiráu tanto por profesionales como por el públicu en xeneral, ente 1984 y 2005 siete de les sos obres foron declaraes Patrimoniu de la Humanidá pola UNESCO.

     Nel intre la moneda aparez una suerte cuélebre asitiáu nuna escalinata y tres d’elli vese la cúpula en forma seta (amanita muscaria) del pabellón d’entrada al Park Güell de Barcelona diseñáu por Gaudí. Alreor del diseñu aparez el nome del país emisor ESPAÑA, l’añu d’emisión 2014 y la lleenda PARK GÜEL – GAUDÍ, xunto la marca la ceca de Madrid.

     Nel aniellu esterior les doce estrelles de la Xunión Europea.