24/10/14

Amadéu I


    
Amadéu I de Saboya
Dos años y tres meses duró'l reináu d'Amadéu n'España. Tres la revolución que fexo abdicar a Isabel II, los políticos españoles llanzáronse a la gueta d'un rei pal país (la Constitución de 1869 referíase a España como una Monarquía Constitucional). Depués de sopesar dellos candidatos, el 16 de payares de 1870, col sofitu del seutor progresista de les Cortes, Amadéu de Saboya ye escoyíu rei col títulu Amadéu I d'España.

10/10/14

1 peseta (1869-1873)

Semeya: www.coindatabase.com

El Gobiernu Provisional

     Tres el derrocamientu de la reina Isabel II confórmase un Gobiernu Provisional, que ye’l que toma les riendes d’actualizar España en materia monetaria. El 19 d’ochobre de 1868, el Ministru de Facienda del Gobiernu del xeneral Serrano, Laureano Figuerola, robla’l decretu pol que s’implantaba la peseta como unidá monetaria nacional adscrita al Sistema Métricu Decimal nel contestu de la Xunión Monetaria Llatina.

     Centralízase tamién la producción de monedes nuna sola ceca, la de Madrid, semiente de la posterior Fábrica Nacional de Moneda y Timbre-Real Casa de la Moneda (FNMT-RCM). La ceca Barcelona caltiénse solo pa la producción de monedes de cobre.

2/10/14

La Peseta, 133 años d'hestoria (1868-2002)

Una perrona de 1870
     Alcuérdome de bien mozu cuando mio pá me falaba de reales, perrines y perrones. “Una peseta son cuatro reales”, decíame elli. ¡Reales! ¿Qué yeren reales?; pues yeren unes monedes que circulaben pel Estáu español enantes de l’aparición de la peseta en 1868 y cuyu cambiu foi afitáu pol gobiernu de la época en: una peseta igual a cuatro reales. “Una perrina son cinco céntimos y una perrona diez”. ¡¿Céntimos?!; ¡¿perrines y perrones?!. La peseta dixebábase en cien céntimos, fraición que tovía me tocó ver, pero apenes emplegar, ya que foron desaniciaos bien llueu de la circulación, en plena Transición democrática y que los nuesos mayores tamién tornaben a reales: "un real, veinticinco céntimos; dos reales, cincuenta". ¡Ah!, y perrines y perrones yeren los nomatos colos que conocíen a les monedes de 5 y 10 céntimos de 1870, pol llión grabáu n’elles (la xente decía qu’asemeyaba más a una perra que a un llión). Col pasu del tiempu el diseñu de los tipos foron camudando delles vegaes, pero’l nomatu caltúvose.

Entamu. A mou Presentación

     Decíen los nuesos antepasaos que les Ayalgues yeren riqueces escondies polos moros. Otres vegaes, yeren rapacines (princeses) encantaes y con riqueces, que vivien, o taben prisioneres, en cueves. Y pa finar, el maxín astur completó’l cuadru con un Cuélebre, que facía de guardián de l’Ayalga.


  Representación d'un cuélebre na Ilesia de San Meteriu de Sietes (Villaviciosa) añu 1555. Semeya d'Ástur Paredes